އޭނާގެ ވެރިކަމެއްގައި އެސްޓީއޯއިން ކޮންމެ އަތޮޅެއްގައި މަދުވެގެން އެއް ރަށުގައި އަސާސީ ރޭޓުގައި ތެޔޮ ލިބޭނެ ނިޒާމެއް ގާއިމުކޮށްދެއްވާނެ ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު މިއަދު ވިދާޅުވެއްޖެއެވެ.
އައްޑޫ ސިޓީއަށް އިއްޔެ ފެށްޓެވި ކެމްޕޭން ދަތުރުފުޅުގައި މިއަދު މަރަދުއަށް ވަޑައިގެން ސަޕޯޓަރުންނާ މުޚާތަބު ކުރައްވައި މުޢިއްޒު ވިދާޅުވީ ބައެއް ރަށްރަށުގައި ތެޔޮ ވިއްކުމުގައި ޕްރައިވެޓް ސެކްޓާގެ ފަރާތްތަކުން އޮންނަނީ މޮނޮޕޮލައިޒްކޮށްފައި ކަމަށެވެ.
“އެކަމުގައި ކޮނެ އަތޮޅެއްގައި މަދުވެގެން އެއް ރަށުގައި އެސްޓީއޯއިން އެންމެ އަސާސީ ރޭޓުގައި ތެޔޮ ލިބޭނެ ނިޒާމެއް އިރާދަކުރެއްވިއްޔާ އަޅުގަނޑުމެން ގާއިމުކޮށްދޭނަން“
އޭރުން މިހާރު އަމިއްލަ ވިޔަފާރިތަކުން ރަށްރަށުގައި އަގުބޮޑުކޮށް ތެޔޮ ވިއްކުން ނިމުމަކަށް އައިސް ރައްޔިތުންނަށް އޭގެ ފައިދާވާނެކަމަށް މުޢިއްޒު ވިދާޅުވިއެވެ.
“އެސްޓީއޯގެ ތެޔޮ އަގުހެޔޮކޮށް ލިބުނީމަ ދެން ޕްރައިވެޓް ސެކްޓާއިން އެކަން ކުރާ ފަރާތްތަކަށް ކޮމްޕެޓިޝަން އުފެދުނީމަ ވިޔަފާރި އުސޫލުން ވާދަކޮށްގެން ރައްޔިތުންނަށް ފައިދާވާނެ އަދި ކުންފުންޏަށް ވެސް ފައިދާވާނެ.“ މުޢިއްޒު ވިދާޅުވިއެވެ.
އެގޮތުން ސަރުކާރާއި ރައްޔިތުންނަށް ހުރިހާ ގޮތަކުން ކުރިއެރުން ލިބޭނެކަމަށް ވެސް މުޢިއްޒު ވިދާޅުވިއެވެ.
