އަންނަ ރިޔާސީ އިންތިޚާބު ކާމިޔާބު ކުރެއްވުމަށްފަހު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ހުވާކުރެއްވުމުގެ ރަސްމިއްޔާތަށް ވަޑައިގަންނަވާނީ ރައީސް ޔާމީން ޢަބްދުލްޤައްޔޫމްގެ އަތްޕުޅުގައި ހިއްޕަވައިގެންކަމަށް އެމަނިކުފާނުގެ އިސް ވަކީލު ޑރ.މުޙައްމަދު ޖަމީލު އަޙްމަދު ރޭ ވިދާޅުވެއްޖެއެވެ.

ޑރ.މުޢިއްޒު އިއްޔެ އައްޑޫ ސިޓީއަށް ވަޑައިގެން ހިތަދޫގައި ބޭއްވެވި ކެމްޕޭން ޖަލްސާގައި ޖަމީލު ވިދާޅުވީ އައްޑޫން ޑރ.މުޢިއްޒަށް ދެންނެވި ހޫނު މަރުހަބާއިން ހާމަވަނީ މި “ފިޔާތޮށި ލަޝްކަރު“ ބައްްޔެއް ނުކުރެވޭނެ ކަމަށެވެ.

މީގެއިތުރުން ޖަމީލު ވިދާޅުވީ ހޯދަންވީ ވައުދަށް ކަމޭ ހިއްތަވާ އަމާނާތްތެރިއެއް ކަމަށާއި ހޯދަންޖެހޭނީ ކުރިން ވާ ވައުދުތައް ހަނދާން ހުންނަ ބޭފުޅެއް ކަމަށެވެ. އެއީ އިސްލާމްދީނުގައި އެކަން އަންގަވާފައިވާ ގޮތް ކަމަށް ވެސް އޭނާ ވިދާޅުވިއެވެ.

ޑރ.މުޢިއްޒަކީ ޕީޕީއެމްގެ ކެންޑިޑޭޓެއް ނޫންކަމަށް ވިދާޅުވެ ސަރުކާރުގެ ބޭފުޅުން ދައްކަވާ ވާހަކަތަކަށް ރައްދު ދެއްވަމުން ޖަމީލު އިތުރަށް ވިދާޅުވީ މުޢިއްޒަކީ ޕީޕީއެމް/ޕީއެންސީގެ ކެންޑިޑޭޓް ކަމަށާއި މިކަން ނިންމާާނީ އަންނަ ނޮވެމްބަރު 17 ގައި ޑރ.މުޢިއްޒު ރައީސުލްޖުމްހޫރިއްޔާ ކަމުގެ ގޮނޑީގައި ބައިންދައިގެން ކަމަށެެވެ.

ޖަމީލު ވިދާޅުވި ގޮތުން މުޢިއްޒު ހުވާކުރެއްވުމުގެ ރަސްމިއްޔާތަށް ވަޑައިގަންނަވާނީ ރައީސް ޔާމީން ޢަބްދުލްޤައްޔޫމްގެ އަތްޕުޅުގައި ހިއްޕަވައިގެންނެވެ.