އިދިކޮޅު ޕީއެންސީގެ ރިޔާސީ ކެންޑިޑޭޓް މާލޭގެ މޭޔަރު ޑރ.މުޙައްމަދު މުޢިއްޒުގެ ތަރުޖަމާނަކަށް ޕީޕީއެމްގެ ސެކްރެޓަރީ ޖެނެރަލް މުޙައްމަދު ޠަލާލް ހަމަޖައްސައިފިއެވެ.

ޕީޕީއެމްއިން ބުނީ މުޢިއްޒާއި އޭނާގެ ރަނިންގމޭޓް ފަރެސްމާތޮޑާ ދާއިރާގެ މެމްބަރު ޙުުސައިން މުޙައްމަދު ލަޠީފްގެ ތަރުޖަމާނަކަށް ޠޮލާލް ހަަމަޖައްސާފައިވާ ކަމަށެވެ.

ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން ޢަބްދުލްޤައްޔޫމުގެ ރަސްމީ އިންތިޚާބީ އެޖެންޓަކަށް ހަމަޖެއްސެވީ ޠޮލާލެވެ. ނަމަވެސް ވ.އާރަށުގެ މައްސަލާގައި ޔާމީނަށް އިއްވި 11 އަހަރުގެ ޖަލު ހުކުމާ ގުޅިގެން އިންތިޚާބުގައި ވާދަކުރެއްވޭ ގޮތް ނުވުމުން ޔާމީނާއި ޕީޕީއެމްއިން ވަނީ މުޢިއްޒަށް ތާއީދު ކުރަން ނިންމައިފައެވެ.

މުޢިއްޒު މިހާރު ވަނީ ރިޔާސީ ކެމްޕޭން ވެސް ފަށްޓަވައިފައެވެ. އެގޮތުން މިއަދު ވަނީ ރިޔާސީ ކެންޑިޑޭޓްގެ ހައިސިއްޔަތުން އަތޮޅުތެރެއަށް ކުރައްވާ ފުރަތަމަ ދަތުރުފުޅު ފަށްޓަވައިފައެވެ. މި ދަތުރުފުޅުގައި ވަޑައިގަންނަވާނީ ހއ.އަތޮޅަށާއި ހދ.އަތޮޅުގެ ރަށްތަކަށެވެ.