އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުޙައްމަދު ޞާލިޙް މިއަދު ޕީއެންސީގެ ރިޔާސީ ކެންޑިޑޭޓްގެ ރަނިންގމޭޓް ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފް (ސެމްބެ) އަށް މަރުހަބާ ވިދާޅުވެއްޖެެއެވެ.
ރައީސް ޞާލިޙް ޙުސައިން އަށް މަރުހަބާ ވިދާޅުވީ ހުވަދުއަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު ފަރެސްމާތޮޑާއަށް ވަޑައިގެން ދެއްކެވި ވާހަކަފުޅުގައެވެ.
ޕީއެންސީގެ ރިޔާސީ ކެންޑިޑޭޓް މާލޭގެ މޭޔަރު ޑރ.މުޙައްމަދު މުޢިއްޒުގެ ރަނިންގމޭޓަކަށް ޙުސައިން ކަނޑައެޅުއްވުމުން އެކަމަށް މަރުހަބާ ވިދާޅުވަމުން ރައީސް ވިދާޅުވީ ޙުސައިންއަކީ އެމަނިކުފާނުގެ ރައްޓެއްސެއް ކަމަށެވެ. އަދި މިހާރު ވެސް ޙުސައިންއާ ވާހަކަ ދައްކަވާ ހައްދަވާ ކަމަށް ރައީސް ވިދާޅުވިއެވެ.
“އަޅުގަނޑު އެ ބޭފުޅާއަށް މަރުހަބާ ދަންނަވަން.“
އެއަށްފަހު ރައީސް އެދިވަޑައިގަތީ ރިޔާސީ އިންތިޚާބުގައި ޑިމޮކްރެޓިކް ހަމަތަކާއި އުސޫލުތަކުގެ ތެރެއިން ވާދަވެރި އިންތިޚާބެއްގެ ގޮތުގައި މަސްލަހަތު ނުގެއްލޭ ގޮތަށް ކެމްޕޭން ކުރިއަށް ގެންދެވުމަށެވެ.
