ލީކުވެފައިވާ އެމެރިކާގެ އިންޓެލް ރިޕޯރޓުގައި ބުނެފައިވާ ގޮތުން ހަނގުރާމައެއްގައި ޗައިނާއާއި އިދިކޮޅަށް މަސައްކަތްކުރާ ގައުމުތަކުގެ ސެޓެލައިޓްތައް ބޭނުން ނުކުރެވޭގޮތް ހެދުމުގެ މަގްސަދުގައި ޗައިނާއިން ސައިބަރ ހަތިޔާރު އުފައްދަން ފަށައިފިއެވެ.
ފައިނޭންޝަލް ޓައިމްސް އިން ބުނެފައިވާ ގޮތުގައި މިއީ އެމެރިކާގެ ފަހުގެ ތާރީޚުގައި އެމެރިކާގެ ސިއްރު ލިއުންތަކެއް ވަގަށް ނެގި އެންމެ ނުރައްކާތެރި އެއް ހާދިސާއެވެ. އަދި އެ ލިއެކިއުންތައް ލީކް ވެފައި މިވަނީ ޗައިނާއިން ތައިވާނަށް ޙަމަލާ ދީ ބާރުގެ ބޭނުންކޮށްގެން ތައިވާނު އަނބުރާ އަތުލާފާނެ ކަމުގެ ބިރުވެރިކަމާއި އަދި އެމެރިކާއާއި ޗައިނާގެ ވިޔަފާރިވެސް ބޮޑު މައްސަލަގަނޑެއްގެ ތެރެއަށް ވެއްޓިފައި ވަނިކޮށެވެ.
ލީކުވެފައިވާ ލިއެކިއުންތަކުން އެނގޭ ގޮތުގައި ޗައިނާއިން ތައްޔާރުކުރާ ސައިބަރ ހަތިޔާރުގެ ސަބަބުން ދުޝްމިނުންގެ ސެޓެލައިޓް ތަކުގެ ބާރު ކަނޑުވާލައި އަދި އޭގެ މަސައްކަތް ހުއްޓުވާލައި މުވާސަލާތާއި ފާރަލުންފަދަ ހުރިހާ ޙަރަކާތެއް ހުއްޓުވާނެއެވެ.
ވޯޝިންގްޓަނަށް އެނގިފައިވާ ގޮތުގައި ޗައިނާގެ މަގްސަދަކީ ދުޝްމަނުންގެ ސެޓެލައިޓްތައް ހައިޖެކްކޮށްގެން ނަމަވެސް ދުނިޔޭގެ މުވާސަލާތީ ނިޒާމު ޗައިނާގެ ބާރުގެ ދަށަށް ގެނައިމުވެ.
އޭގެތެރޭގައި ހަނގުރާމައެއް ހިނގާ ދުވަސްވަރު ދުޝްމިނުންގެ ސެޓެލައިޓުން ފޮނުވާ ސިގްނަލްތައް އަތުލުމަށްފަހު އެ ސެޓެލައިޓުގެ ހުރިހާ ކަމެއް ޗައިނާގެ ބާރުގެދަށަށް ގެނައުމާއި ނުވަތަ އެ ސެޓެލައިޓްގެ ބޭނުން ކަނޑުވާލުން ވެސް ހިމެނޭކަމަށް ލީކްވެފައިވާ ރިޕޯޓްގައި ވެއެވެ.
ވޯޝިންގްޓަނުން މިހާތަނަށް މިފަދަ ނިޒާމެއް ގާއިމް ކުރެވިފައިވާ ކަމުގެ މަޢޫލޫމާތު ހާމަ ކޮށްފައެއް ނުވެއެވެ. އޭގެ އެއްދުވަސްކުރިން އެމެރިކާގެ ސްޕޭސް ފޯސްގެ ވެރިޔާ ސޯލްޓޒްމަން ވިދާޅުވެފައިވަނީ ޖައްވުގެ ވެށީގައި ރަޝިޔާއާއި ޗައިނާގެ ސަބަބުން “ ނިއު އީރާ “ އެއްގެ ނުރައްކަލާ އެމެރިކާއިން ކުރިމަތިލާން ޖެހިފައިވާ ކަމަށެވެ.
އަދި އެއީ ޖޭމިންގ އޭ ބުނެފާ އެހިސާބުން ނިންމާލެވޭނެ ނުރައްކަލެއްވެސް ނޫނެވެ. އަދިވެސް 2021 ވަނައަހަރުގެ ފަހުކޮޅު ރަޝިޔާއިން ޓެސްޓުކުރި އެންޓި ސެޓެލައިޓް މިސްއިލަށް އިޝާރާތް ކުރައްވަމުން އޭނާ ވިދާޅުވީ ވޯޝިންގޓަނާއި އިދިކޮޅު ފަރާތްތަކުން ލޭޒަރ އާއި ޑެޒްލަރ ބޭނުން ކޮށްގެންވެސް ސެޓެލައިޓްއިން ފޮޓޯއާއި މައުލޫމާތު ލިބިގަތުމަށް ހުރަސް އެޅިދާނެ ކަމަށެވެ.
ބައެއް ސެޓެލައިޓްތަކުން ޖައްވުގައި އުދުހޭ ސެޓެލައިޓްތައް ކުރިން ބުނެވުނު ސެޓެލައިޓްގެ އޯބިޓަށް ދަމައިގަނެ އޭގެ ޙަރަކާތައް ހުއްޓުވަމުން ގެންދާކަން މިހާރުވެސް އަހަރެމެންނަށް އެނގޭކަމަށެވެ.
މިއީ ޖައްވުތެރޭގައި މިހާރުވެސް ހިނގަމުންދާ ކަންތަކެވެ. ދެން މީގެތެރެއަށް ހަތިޔާރުވެސް ވަނުމަކީ ހަނުހުރެވިދާނެ ކަންތަކެއް ނޫނެވެ. މިކަންތަކުގެ ނިމުން އަންނާނެގޮތަކާއި ދޭތެރޭ ވިސްނާ ފިކުރުނުކޮށް ތިބެވޭކަށް ނޯންނާނެއެވެ.
މިހުސްވި މަހު ކޮންގްރެސްގައި ސޯލްޓޒްމަން ވިދާޅުވީ ޗައިނާއަކީ ޖައްވުގެ ސުޕަރޕަވަރ ކަމުގައި ހަދަން ޗައިނާއިން 2045 އަށް ރާވާފައިވާ ޖައްވީ ޕްރޮގެރާމް ނުހުއްޓި ރޭވިފައިވާ ގޮތަށް ކުރިޔަށް ދާ ކަމަށެވެ.
އެމެރިކާގެ ޖައްވީ ބާރުތަކަށް ޙަމަލަދިނުމަށާއި ފާރަލުމަށާއި މޮނިޓަރ ކުރުމުގެ ބޭނުމުގައި ޖައްވުތެރޭގައި މިހާރުވެސް ޗައިނާ 347 ސެޓެލައިޓް އުދުހެމުން އެބަދެއެވެ. މިފާއިތުވެގެންދާ ހަ މަސްދުވަހުގެ ތެރޭގައި އެކަނިވެސް ޗައިނާއިން ވަނީ 35 ސެޓެލައިޓް ޖައްވުގެތެރެއަށް ފޮނުވާފައެވެ.
One Response
ކޮންމެވެސް ބަޔަކު އެބަޖެހޭ އެމެރިކާއާއި ހުޅަނގުގެ ގައުމުތައްވެސް ސައިޒްކުރަން. މި ދުނިޔެއަކީ އެއްވެސް މީހެއްގެ ވާރުތަ މުދަލެއް ނޫންކަން ދައްކަންޖެހޭނެއެވެ. ދުނިޔެ ބައިބައިވަމުން މިދާ ދަނޑިވަޅުގައި އިސްލާމީ އުންމަތް އެކަތިގަނޑަކަށްވެގެން ދާތަން ހާދަހާ ދެކެން ބޭނުމެވެ. މިހާރުވެސް ހުޅަނގުގެ ސިޔާސީ ތަޖްރިބާކާރުންގެ ބިރަކީ އެއީއެވެ. ބައެއް މުފައްކިރުންގެ އޮޕީނިއަންގައި އިސްލާމީ ގައުމުތައް އެއްބައިވެ އެމީހުންގެ ވިޔަފާރީގައި ކޮމަންމާކެޓެއް އުފެދޭ ދުވަހަކީ އަނެއްކާވެސް އިސްލާމީ ވެރިކަމެއް މިދުނިޔޭގައި ގާއިމް ވެގެން ދާނެ ދުވަހެވެ. މިހާރުވެސް ދުނިޔޭގެ އިގްތިސާދު އޮތީ މުސްލިމުންގެ ބާރުގެ ދަށުގައި ކަމާއި އެހެންނަމަވެސް ބައިބައި ވެފައި އޮތުމުގެ ސަބަބުން ވާގިނެތިިފައި އޮތް ބަލިމީހެއްފަދައިން ވެފައި އޮތީ ކަމަށް އެބޭފުޅުން ނުރުހުމުގައިވެސް ބުނެފައިވެއެވެ. އިސްލާމުންގެ ކޮމަންމާރކެޓެއް އުފެދޭ ދުވަހަކީ އެމެރިކާއާއި ހުޅަނގުގެ ހަތިޔާރު އުފައްދާ ކާރުޚާނާތައް ދާއިމަށް ތަޅުލަން ޖެހޭ ދުވަސްކަމުގައި ހުޅަނގުގެ ވަރަށް ގިނަ މުފައްކިރުން އިންޒާރު ދެއްވަމުން ގެންދަވައެވެ.