ޕާކިސްތާނުން ވަކިވެގަތުމަށް މަސައްކަތްކުރާ ބަލޯޗް ރާޖީ އާޖޮއި ސަންގަރް (ބީ. އާރް. އޭ. އެސް.) އިން ރޮއިޓާރޒް އަށް މައުލޫމާތ ދީފައިވާގޮތުގައި ފެންބޮޑުވުމުގެ ހާދިސާގައި އެހީތެރިކަން ފޯރުކޮށްދޭން މިދިޔަ ހޯމަދުވަހު މަސައްކަތް ކުރަމުން ގެންދިޔަ މިލިޓްރީ ހެލިކޮޕްޓަރ ވައްޓާލީ އެ ގުރޫޕުންކަމަށް ބުނެފިއެވެ.
އެހެންނަމަވެސް އެކަމުގެ އެއްވެސް ހެއްކެއް އެމީހުނަކަށް ނުދެއްކުނެވެ. އަދި ރޮއިޓާރޒް އަށް އެގުރޫޕްގެ ބުނުން ކަށަވަރު ކުރެވޭނެ ގޮތެއްވެސް ނުފެނުނެވެ. އެ ޚަބަރާގުޅިގެން ޕާކިސްތާނުގެ ސިފައިންގެ އިސް ބޭފުޅަކު ވިދާޅުވީ ސިފައިންގެ އިސް ބޭފުޅުން ތަކަކާއެކު ދަތުރުކުރި ހެލިކޮޕްޓަރ ވެއްޓުނީ މޫސުން ގޯސްވެގެން ކަމަށާއި ބީ. އާރް. އޭ. އެސް. ގެ ވާހަކައަކީ ދޮގެއް ކަމަށެވެ.
ބަލޯޗިސްތާނުގެ އަސްލު ރައްވެހިންކަމަށް ދައުވާކުރާ މީހުންގެ ހަނގުރާމަވެރި ޖަމާއަތްތަކުން ޕާކިސްތާނުގެ ސަރުކާރުން ވަކިވެގަތުމަށް މަސައްކަތް ކުރާތާ ގިނަ އަހަރު ތަކެއްވެއްޖެއެވެ. އެމީހުންގެ ޝަކުވާއަކީ ބަލޯޗިސްތާނުގެ ގުދުރަތީ މުއްސަނދިކަން އިންސާފުން ބޭރުން ޕާކިސްތާނުގެ އެހެން ރަށްތަކަށް ފޯރުކޮށް ދިނުމެވެ. ބަލޯޗިސްތާނަކީ ގޭހާއި މައުދަންގެ ގޮތުން ވަރަށް މުއްސަނދި ބިމެކެވެ.
ޗައިނާގެ ވިޔަފާރިއާއި ސިނާއަތު ފުޅާ ކުރުމުގެގޮތުން ތަރައްގީކުރަމުންގެންދާ މަލްޓިމިލިއަން ޑޮލަރުގެ މަޝްރޫޢުގައި ހިމެނޭ ކަނޑާއި އެއްގަމުގެ މަގުތައް ގުޅާލުމުގެ ބޭނުމުގައި ތަރައްގީ ކުރަމުންގެންދާ އެއް ދޮރާއްޓަކީ ބަލޯޗިސްތާނުގެ ގުވާދާރުގެ ބަނދަރެވެ. ފުން ބަނދަރެއްގެ ގޮތުގައި ގުވާދާރުގެ ބަނދަރުވެސް ތަރައްގީ ކުރަމުންގެންދަނީ ޗައިނާގެ ތަރައްގީ މަޝްރޫއުގެ ދަށުންނެވެ. ވަކިވެގަތުމަށް ހަނގުރާމަ ކުރަމުންގެންދާ ޖަމާއަތްތަކުން މި މަޝްރޫއަށް ގެންދަނީ އިދިކޮޅު ހަދަމުންނެވެ.
One Response
މިއީ އަހަރެމެން މުސްލިމުންގެ ހާލަކީ. ހާލުގައި ޖެހިފައިވާމީހުންނަށް އެހީވެދޭން މަސައްކަތްކުރާމީހުންނަށްވެސް ހަމަލާދީ ނައްތާލަން މަސައްކަތްކުރަނީ. ނުވިތާކަށް ދޮގުހަދައިގެންވެސް މޮޅުކަމެއް ކޮށްލެވުނުކަމަށް ދައްކަނީ. ދެން އެމީހުންނަށް ވެރިކަން ލިބިއްޖެއްޔާ ރައްޔިތުންނަށް ވާނެގޮތް ދެނެވޮޑިގެންވަނީ މާތް ﷲ