ރާއްޖޭގެ ގައުމީ ފުޓްބޯޅަ ޓީމުގެ ކުޅުންތެރިޔާ އަދި ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ) އަށް ފިޔަވަޅެއް އެޅުމަށް ސަރުކާރު ހިންގާ ކޯލިޝަންގެ އެއް ލީޑަރު ރައީސް މައުމޫން އަބްދުލްގައްޔޫމް ގޮވާލައްވައިފިއެވެ.
މަހިންދަ ރާޖަޕަކްސަ ފޯ ނޭޝަންސް ކަޕުން ގައި ރާއްޖެއާއި ސީޝެލްސް ބައްދަލުކުރި މެޗުގެ އިތުރުވަގުތުގައި ކުޅެންއެރި އަޑުބަރޭ ވަނީ ސީޝެލްސްގެ ކެޕްޓަން ސްޓީވް މެރީއަށް ކުޅުމުން ބޭރުގައި އޮޅަނބޮށިން ހަމަލާދީފައެވެ. އެއާއެކު އޭނާއަށް ރަތް ކާޑު ދައްކާ ދަނޑުން ފޮނުވާލިއެވެ.
އަޑުބަރޭ ސްޓީވަށް ހަމަލާ ދިން މަންޒަރު ފެންނަ ވީޑިއޯއެއް ސޯޝަލް މީޑިއާގައި ދައުރުވަމުން އަންނަ އިރު އެ ވީޑިއޯއަށް ކޮމެންޓް ކުރައްވަމުން ރައީސް މައުމޫން ވިދާޅުވީ އެއީ ހަޑިހުތުރު އަމަލެއް ކަމަށާ ފިޔަވަޅު އެޅުއްވުމަށެވެ.
“ ހަޑި ހުތުރު އަމަލެއް. އެކަށީގެންވާ ފިޔަވަޅު އަޅުއްވާ“ މައުމޫން ވިދާޅުވިއެވެ.
Hadi huthuru amaleh. Ekasheegen vaa fiyavalhu alhaa!
— Maumoon Abdul Gayoom (@maumoonagayoom) November 16, 2021
ސީޝެލްސްގެ ކެޕްޓަން ސްޓީވް މެރީއަށް އަޑުބަރޭ ހަމަލާ ދީފައިވަނީ އޭނާ ކުޅެން އެރުވިތާ ތިރީސް ސިކުންތުވެސް ނުވަހީނެވެ.
ރައީސް މައުމޫން އަކީ އަބަދުވެސް ފްޓްބޯޅަށް ހާއްސަ ސަމާލުކަމެއް ދެއްވާ ގައުމީ ޓީމަށް ހިތްވަރު ދއްވަވާ ބޭފުޅެކެވެ. އަޑުބަރޭގެ އަމަލަށް ފިޔަވަޅު އެޅުއްވުމަށް މައުމޫންގެ އިތުރުން ގިނަ ބަޔަކު އަންނަނީ ގޮވާލަމުންނެވެ.
