މިރާއްޖޭގެ ރައްޔިތުންނަށް ވެރިކަމުގެ ފަރާތުން ފުއްދައިދޭން ޖެހޭ އެންމެހައި އަސާސީ ހައްގުތަކާއި ވެރިން ޒިންމާދާރު ކުރުވުމާއި މިހިރަމިހިރަ ކަންކަން ރައްޔިތުންނަށް ކޮށްދިނުމަށް ޓަކައި ރައްޔިތުންގެ ލޯބޯ ފިއްސައިގެން ހޯދާ އާމްދަނީއާ ނުބައްދަލު ބޮޑު މުސާރައެއް ދީގެން އެކުލަވާލާފައިވާ ރައްޔިތުންގެ މަޖިލީހަކީ މާޒީގެ ބަސްމަގުގެ ތެރޭގައި އެބުނާ ވަކަރުގެ ކަމަށް ސިފަ ކުރެވެން ފަށައި ފިއެވެ.

ރައްޔިތުންގެ މަޖިލީހަކީ އެމަޖިލީހަށް ރައްޔިތުން ހޮވާ މެންބަރުން މަހުޖަނުންގެ ޖީބަށް ވެއްޓެމުން ދިޔަ ދިއުން ނިމުމަކަށް ގެނެވޭ ވަރުގެ މުސާރައަކާއި ޢިނާޔަތާއި އެ މެންބަރުންނަށް ބޭނުންވާ ހިލޭ ބޭސްފަރުވާ އާއި ރިވެތި މާތް އަޚުލާޤެއްގެ މަތީގައި އުޅެވޭނެ ގޮތް ހޯދައި ދީފައިވާ ބައެކެވެ. އަދި މިވަރުން ނުފުދިގެން ނަމުގެ ކުރިއަށް ޢިއްޒަތްތެރި މެންބަރު ގެ ލަގަބު ވެސް ވަނީ ހިމަނާފައެވެ.

ލޮބުވެތި ރައްޔިތުންނޭވެ! މިދެންނެވި ޢިއްޒަތްތެރި މެންބަރުންނަކީ މުސްލިމް އުންމަތެއްގެ މަޝްވަރާ މަޖިލީސް ކަމަށް ވާއިރު އެ މެންބަރުންގެ ބަސްމަގާއި އަޚުލާޤީ ސިފަތައް ބިނާވެފައި ވަނީ އިސްވެ ދެންނެވުނު ވަކަރުގޭ ކުދީންގެ އުސޫލަށްވުރެ މާދަށު ދަރަޖައިގައެވެ. އެއް މެންބަރު އަނެއް މެންބަރަށް އޮރިޔާން ދެއްކުމާއި ބަޅުއޫރަށް ގޮވުމާއި ރޯ އައުގުރާނަ ގޮވުންފަދަ ހުތުރުކަން ބޮޑު ޢަމަލުތައް ރައްޔިތުންނަށް އެދަނީ ދައްކަމުންނެވެ.

ރައްޔިތުންގެ މަޖިލީހަކީ ގާނޫނު ހަދާ މަޖިލީހެވެ.

ރައްޔިތުން އުޅެންވާ ގޮތާއި ނުއުޅެން ވާ ގޮތްތައް ކަނޑައަޅައި ބަޔާން ކޮށްދޭ މުއައްސަސާ ވެސް މެއެވެ. އެހެނަސް އެމުވައްސަސާގެ ތެރޭގައި މެންބަރުންގެ މެދުގައި މާރާމާރީ ހިންގުމާއި އިންސާނުންގެ މޫނަށް ކުޅުޖެހުމާއި މުސްލިމް އުންމަތެއްގެ ތެރެއިން ފެނިގެން ނުވާނޭ ފަދަ ހުތުރުކަން ބޮޑު އެތައް ކަމެއް ހިނގަމުން އެބަދެއެވެ. ރައްޔިތުންގެ މަޖިލީހަކީ ހުރިހާ ކުށެއް ފްރީ ތަނެއްގެ ގޮތުގައި އެވަނީ ކަނޑައަޅާފައެވެ. ގާނޫނު ހައްދަވަނީ އެބޭފުޅުން ކަމުގައި ވީނަމަވެސް ކުށެއް ކޮށްފިނަމަ އެކުށުގެ އަދަބު ލިބެން ޖެހޭނެ ކަމަށް ދެކެމެވެ. ޚިޔާލު ފާޅުކުރުމުގައި ދައްކާ ވާހައަކުން އެބޭފުޅުންގެ މައްޗަށް ދައުވާ ނުކުރެވޭ ގޮތަށް އޮތުމަކީ އެއްވެސް މައްސަލައެއް ނޫނެވެ. އެހެނަސް

މީގެ އިތުރުން ދައުލަތުގެ މުދަލާ ތަކެއްޗަށް ގެއްލުންދީ ހެދުމަކީ ވެސް މިދެންނެވި ޢިއްޒަތްތެރި މެންބަރުން ކުރަމުން އަންނަ ވަރަށް ބޮޑު ކުށެކެވެ.

ކުށެއް ނުކުރެވޭ ހަމަ އެކަނި ތަނަކީ ސުވަރުގެއެވެ. ބޭރު ގައުމުތަކުގެ މަޖިލީސް ކުރާގެތަކުގައި ވެސް ކަންކަން ހިނގަ އެވެ. އެހެނަސް ގާނޫނު ހަދާ މަޖިލީހުގައި މި ޒާތުގެ ސަކަރާތެއް ނުޖަހާކަން ފާހަގަ ކުރަމެވެ. މިދެންނެވީ އެކަކު އަނެކަކަށް އޮރިޔާން ދެއްކުމާއި އައުގުރާނަގޮވުމާއި މެންބަރުންގެ މޫނަށް ކޯދޮވެލާފައި ފެން ޖެހުން ފަދަ މުޑުދާރު ނަޖިސް ކަންކަން ނުކުރާ ވާހަކައެވެ. އަނެއްކޮޅުން ވޯޓުދީގެން ތިމާ ހޮވާފައިވާ ދާއިރާގެ ރައްޔިތުންގެ ރައުޔާ ޚިލާފުވެ ފައިސާއަށް ވޯޓު ވިއްކުމަކީ ވެސް ބައެއް މެންބަރުން ކުރަމުން އަންނަ ކަމެކެވެ. ހަމައެހެންމެ ފުދޭވަރެއްގެ ފައިސާ ކޮޅެއް ދިނުމުން މަޖިލީހަށް ހުށަހެޅޭ ބިލްތަކުގެ ތެރެއިން ރައްޔިތުންނަށް އެބިލަކުން ކޮންމެ ގެއްލުމެއް ވިޔަސް ވޯޓު ދީގެން ފާސް ކުރުމަކީ މިދެންނެވި ޢިއްޒަތްތެރި މެންބަރުން ކުރަމުން އަންނަ ކަންކަމެވެ. އަނެއްކޮޅުން މަޖިލީހުގެ ބައެއް މެންބަރުންނަކީ ނުހަނު ބޮޑާ ކިބުރުވެރި ބައެކެވެ. މިވެރިން މަގާމަށް އައުމަށް ޓަކައި ދިހަބާރަ މިލިއަން ރުފިޔާ ޚަރަދު ކުރާކަމަށް ވެއެވެ. އެހެނަސް ފަސް އަހަރުގެ ދައުރެއް ނިމިގެން ދާއިރު މުސާރައާއި އެލަވެންސްގެ ގޮތުގައި ގާތް ގަނޑަކަށް ފަސް މިލިއަނެއްހާ ރުފިޔާއަށް ވުރެ ބޮޑު އެއްޗެއް ނުލިބޭއިރު މަގާމުގައި ހުރެގެން އަތުން ހޭދަ ވެގެންދިޔަ ބައި އަނބުރާ ނުހޯދާނެ ކަމަށް ގަބޫލު ކުރަން ތޯއެވެ؟ ކަން މިހެން ހުރުމާއެކު މަޖިލީހުގެ މެންބަރުންނާ މަޖިލިސް ކުރާ ގެ ސިފަވެގެން ދަނީ ބަކަރި ކޮށްޓެއްގެ މިސާލުގައި ކަން ފާހަގަ ކުރަމެވެ.