ބަރަކާތްތެރި ރަމަޟާން މަހު މުސްލިމުން މަސްޖިދުލް އަގުސާގައި އަޅުކަންކޮށް ރޯދަވީއްލުމަށް އެއްވެފައި ވަނިކޮށް ނިކަމެތި ފަލަސްތީނުގެ ރައްޔިތުންނަށް އަނެއްކާވެސް އިޒްރޭލުގެ ސިފައިން ވަނީ ހަމަލާއެއް އަމާޒުކޮށްފައެވެ. މުސްލިމުން ރޯދަވީއްލުމަށް އެއްވެފައި ވަނިކޮށް އިޒްރޭލުގެ ސިފައިން ވަނީ މިސްކިތުގައި ހުރި ލައުޑްސްޕީކަރުތަކުން ކަރަންޓު ކަނޑާލައި ރޯދަ ވީއްލުމަށް ގެނަސްފައިހުރި ކާތަކެތި އަތުލާފައެވެ. އަދި ނަމާދު ވަގުތު ބަންގި ގޮވުމަށް ވެސް އިޒްރޭލު ސިފައިން ވަނީ ހުރަސްއަޅާފައެވެ. މީގެ އިތުރުން އިޒްރޭލު ސިފައިން ވަނީ ރަމަޟާން މަހުގެ ފަހު ދިހައިގެ ދުވަސްވަރު މިސްކިތަށް އިތުރު ހަމަލާއެއް ދޭނެ ކަމުގެ އިންޒާރުވެސް ދީފައެވެ.
މަސްޖިދުލް އަގުސާގެ އިމާމް އަދި ޖެރޫސަލަމްގެ މުފްތީ، ޝެއިޚް މުޙަންމަދު ޙެސެން ވަނީ އިޒްރޭލު ސިފައިންގެ މި އަމަލުތައް ކުށްވެރިކުރައްވާފައެވެ. މުޙަންމަދު ޙުސެން ވަނީ މިކަމާ ދެކޮޅަށް ހުރިހާ މުސްލިމުން އަޑު އުފުލަން ޖެހޭނެ ކަމުގައި ވިދާޅުވެފައެވެ.
ކޮންމެ އަހަރަކުވެސް ރަމަޟާން މަހާއި ދިމާކޮށް އިޒްރޭލު ސިފައިން ދަނީ ފަލަސްތީނު ރައްޔިތުންނަށް ގިނަ ގުނަ އުނދަގުލާއި ދުއްތުރާތައް ކުރަމުންނެވެ.
