އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ އިންތިހާއަށް ވައްތަރު މީހެއް، އީރާނުގެ ފިހާރައެއްގެ ސޭޓަކަށް ހުއްޓައި ނަގާފައިވާ ވީޑިއޯތަކެއް ސޯޝަލް މީޑިއާގައި ވައިރަލްވުމާއި ގުޅިގެން، އެމީހާ ބޮއިކޮޓް ކުރުމަށް ގޮވާލައި ކެމްޕޭނެއް ފަށައިފިއެވެ.
އީރާނުގެ ވެރިރަށް ޓެހެރާނުގައި، ހިކިމޭވާއާއި، ބަދަނުގެ ބާވަތްތަކާއި ފޮނިކާތަކެތި ވިއްކާ މި މީހާގެ މޫނުމަތީގެ ސިފަތަކާއި، އިސްތަށިގަނޑުގެ ބައްޓަމާއި، މޫނުމަތީގެ ހަރަކާތްތައް ނަތަންޔާހޫއާ އެއްގޮތްކަން ސޯޝަލް މީޑިއާ ބޭނުންކުރާ ފަރާތްތަކަށް ފާހަގަކުރެވުމާއެކު، އޭނާއަށް ވަނީ ގިނަ ބައެއްގެ ސަމާލުކަން ލިބިފައެވެ.
އިންޓަނެޓުގައި ދައުރުވަމުންދާ ވީޑިއޯއަކުން ފެންނަނީ އެ ވިޔަފާރިވެރިޔާ އޭނާގެ ފިހާރައިގެ ކައްޓާ ކައިރީގައި އިށީނދެގެން އިންނަ މަންޒަރެވެ. މި ވީޑިއޯ ވަނީ އީރާނާއި އަރަބި ސޯޝަލް މީޑިއާ ޕްލެޓްފޯމްތަކުގައި ވަރަށް ބޮޑަށް ދައުރުވެ، މަޖާ ކޮމެންޓްތަކާއި މަލާމާތުގެ ރައްދުތައް ލިބިފައެވެ.
ނަމަވެސް، މި ހާދިސާ މިހާރު ވަނީ އޮންލައިން ސަމާސާތަކުގެ އިމުން ބޭރުވެފައި ކަމަށް ރިޕޯޓްތައް ބުނެއެވެ. ސަބަބަކީ، އިސްރާއީލުގެ ވެރިޔާއާ ވައްތަރުވުމުގެ ސަބަބުން އޭނާގެ ފިހާރައިން މުދާ ނުގަތުމަށް ބައެއް ސޯޝަލް މީޑިއާ ބޭނުންކުރާ ފަރާތްތަކުން ގޮވާލަމުންދާތީއެވެ.
ތުރުކީގެ ނޫސްތަކުން ބުނާ ގޮތުގައި އޮންލައިންކޮށް އައި މި ރައްދުތަކުގެ ސަބަބުން އެ ވިޔަފާރިވެރިޔާގެ ވިޔަފާރިއަށް ވަނީ އަސަރުކޮށްފައެވެ. އަދި ބައެއް މަސްދަރުތަކުން ބުނާ ގޮތުގައި އެ ފިހާރަވެރިޔާ ވަނީ މި ހާލަތާ މެދު ކަންބޮޑުވުމާއި ހިތްހަމަނުޖެހުން ފާޅުކޮށްފައެވެ.
މި ވީޑިއޯ ވަރަށް ބޮޑަށް ދައުރުވަމުން ދިޔަ ނަމަވެސް، އެ ވިޔަފާރިވެރިޔާގެ ވަނަވަރާއި ވީޑިއޯގެ އަސްލު މަސްދަރު މިނިވަން ފަރާތަކުން އަދި ކަށަވަރުކޮށްދީފައެއް ނުވެއެވެ.
މި ހާދިސާ ހިނގާފައި މިވަނީ އީރާނާއި އިސްރާއީލާ ދެމެދު ނުތަނަވަސްކަން ދެމިއޮތް ދަނޑިވަޅެއްގައެވެ. މި ދެ ގައުމާ ގުޅުންހުރި ސިޔާސީ ކަންކަމަށް އީރާނުގެ ސޯޝަލް މީޑިއާގައި އަބަދުވެސް ވަރުގަދަ ރައްދުތަކެއް ލިބެމުންދެއެވެ.
