ބާރުގަދަވަމުން އަންނަ އެލް ނީނޯ، ކުރިއަށް އޮތް ޑިސެމްބަރު މަހު އޭގެ އެންމެ މައްޗަށް ދިއުމުގެ ކުރިން އިތުރަށް ވަރުގަދަވާނެ ކަމަށް ލަފާކުރެވޭއިރު، މިއީ 1950 ވަނަ އަހަރަށް ފަހު ރެކޯޑު ކުރެވޭ އެންމެ ބާރުގަދަ މޫސުމީ ހާދިސާތަކުގެ ތެރޭގައި ހިމެނޭނެ ކަމެއް ކަމަށް އދ. އިން ވަނީ އިންޒާރު ދީފައެވެ.

ދުނިޔޭގެ މޫސުމާ ބެހޭ ޖަމްއިއްޔާ (ޑަބްލިއުއެމްއޯ) އިން ބުނި ގޮތުގައި، އުފެދެމުން އަންނަ މި އެލް ނީނޯގެ ސަބަބުން ދުނިޔޭގެ ބޮޑު ސަރަހައްދެއްގެ ފިނިހޫނުމިން އާދަޔާ ހިލާފަށް މައްޗަށް ގޮސް، ވާރޭ ވެހޭ މިންވަރަށް ބަދަލުތަކެއް އަންނާނެ ކަމަށް ބެލެވެއެވެ. އަދި މީގެ ސަބަބުން އެކި ސަރަހައްދުތަކަށް ހަނަފަސްކަމާއި ފެންބޮޑުވުމުގެ ނުރައްކާ އިތުރުވެގެންދާނެއެވެ.

މި އިންޒާރު ދީފައި މިވަނީ، އޮކްޓޫބަރު، ނޮވެމްބަރު އަދި ޑިސެމްބަރު މަހުގެ ތެރޭގައި މެދުތެރެއާއި އިރުމަތީ ޓްރޮޕިކަލް ޕެސިފިކްގެ ކަނޑުގެ ލޮނުގަނޑުގެ ހޫނުމިން މީގެ ކުރިން ނުދެކޭ ފަދަ މިންވަރަކަށް މައްޗަށް ދާނެ ކަމަށް ލަފާކުރެވިފައިވާ ދަނޑިވަޅެއްގައެވެ.

ޑަބްލިއުއެމްއޯ އިން އަންދާޒާކުރާ ގޮތުގައި 2026 ވަނަ އަހަރުގެ ފަހު ތިން މަސްދުވަހުގެ ތެރޭގައި އެ ސަރަހައްދުގެ ފިނިހޫނުމިން އާންމުކޮށް ހުންނަ މިންވަރަށް ވުރެ ގާތްގަނޑަކަށް 3.7 ޑިގްރީ ސެލްސިއަސް މައްޗަށް ދާނެއެވެ. މިކަން ކަށަވަރުވެއްޖެނަމަ، މިއީ 2015 އިން 2016 އަށް ދެމިގެންދިޔަ އެލް ނީނޯގައި ރެކޯޑުކުރެވުނު 2.6 ޑިގްރީ ސެލްސިއަސްގެ ކުރީގެ ރެކޯޑަށް ވުރެ މަތީ އަދަދަކަށް ވުން އެކަށީގެންވެއެވެ.

އެލް ނީނޯ އުފެދެނީ މެދުތެރެއާއި އިރުމަތީ އިކުއެޓޯރިއަލް ޕެސިފިކްގެ ކަނޑުގެ ލޮނުގަނޑުގެ ހޫނުމިން އާދަޔާ ހިލާފަށް މައްޗަށް ގޮސް، މުޅި ދުނިޔޭގެ ވައިގެ ދައުރުވުމަށާއި، ޖައްވީ ޕްރެޝަރަށާއި، ވާރޭ ވެހޭ ނިޒާމަށް ބަދަލުތަކެއް އައުމުގެ ސަބަބުންނެވެ.

ޑަބްލިއުއެމްއޯ އިން ބުނީ މިހާރު ހިނގަމުންދާ އެލް ނީނިއޯ، ކުރިއަށް އޮތް 2027 ވަނަ އަހަރުގެ ފެބްރުއަރީ މަހުގެ ނިޔަލަށް ދެމިގެން ދިއުމުގެ ފުރުސަތު ގާތްގަނޑަކަށް ސަތޭކަ އިންސައްތައާއި ހަމައަށް އެބައޮތް ކަމަށެވެ. މާނައަކީ މީގެ އަސަރު އައު އަހަރުގެ ތެރެއަށް ވެސް ވަރަށް ބޮޑަށް ދެމިގެން ހިނގައިދާނެއެވެ.

ދިރިއުޅުމާއި، ދަނޑުވެރިކަމާއި، އާންމު ދުވަހީ ކަންކަން މޫސުމަށާއި ކަނޑުގެ ހާލަތަށް ވަރަށް ބޮޑަށް ބަރޯސާވެފައިވާ ރާއްޖެ ފަދަ ގައުމަކަށް ބަލާއިރު، ވާރޭ ވެހުމަށާއި ފިނިހޫނުމިނަށް އަންނަ ބަދަލުތައް ގާތުން ބެލުން ވަރަށް މުހިންމު ވާނެއެވެ. ނަމަވެސް، އެލް ނީނޯގެ އަސަރު ހުރިހާ ސަރަހައްދަކަށް ކުރަނީ އެއްގޮތަކަށް ނޫނެވެ.

އެ ޖަމްއިއްޔާއިން ބުނީ މި ހާދިސާގެ ސަބަބުން މިހާރުވެސް ބައެއް ސަރަހައްދުތަކަށް ބޮޑެތި އަސަރުތަކެއް ކުރަމުންދާ ކަމަށެވެ. މެދުތެރޭ އެމެރިކާގައި މިކަމާ ގުޅިގެން ކުރިމަތިވެފައިވާ ހަނަފަސްކަމުގެ ސަބަބުން ދަނޑުގޮވާންތަކާއި ޖަނަވާރުތައް މަރުވަމުންދާ ކަމަށް ވަނީ ރިޕޯޓުކޮށްފައެވެ.

މީގެއިތުރުން ޑަބްލިއުއެމްއޯ އިން ވަނީ އިންސާނުންގެ އަމަލުތަކުގެ ސަބަބުން މޫސުމަށް އަންނަ ބަދަލުތަކާ އެކުވެގެން އެލް ނީނޯގެ އަސަރު އިތުރަށް ގަދަވަމުންދާ ކަމުގެ އިންޒާރު ވެސް ދީފައެވެ. އެ އެޖެންސީން ބުނީ، މިފަހަރުގެ އެލް ނީނޯއާއި ދުނިޔެ މި ކުރިމަތިލަނީ ކަނޑުތަކުގެ ހޫނުމިން އާދަޔާ ހިލާފަށް މަތީގައި ވަނިކޮށް ކަމަށާއި، އޭގެ ސަބަބުން ޖައްވުގެ ތެރެއަށް އިތުރު ހޫނު ބޭރުވުމަށް މަގުފަހިވާނެ ކަމަށެވެ.

އާންމުގޮތެއްގައި އެލް ނީނޯގެ ބާރު އެންމެ ގަދަވަނީ ނޮވެމްބަރާއި ފެބްރުއަރީއާ ދެމެދު ކަމުގައި ވިޔަސް، ދުނިޔޭގެ ފިނިހޫނުމިނަށް މީގެ އެންމެ ބޮޑު އަސަރެއް ކުރަނީ އޭގެ ފަހުންނެވެ. އެހެންކަމުން، މި ހާދިސާ އޭގެ އެންމެ މައްޗަށް ދިއުމަށްފަހު ވެސް، އިންތިހާއަށް ހޫނުގަދަވުމުގެ ފުރުސަތު ދެމިއޮންނާނެ ކަމަށް ކަމާބެހޭ މާހިރުން ލަފާކުރައްވައެވެ.