ޖަޕާނުގައި އަންހެން މޭޔަރަކު ފުރަތަމަ ފަހަރަށް ވިހެއުމާގުޅިގެން ނަގާ ޗުއްޓީ(މެޓާނިޓީ ލީވް) ނެގުމާއި ގުޅިގެން ބައެއްގެ ތައުރީފް ލިބުމާއި އެކުއެކީ ބައެއްގެ ފާޑުކިއުންވެސް ކުރިމަތި ވެއްޖެ އެވެ.

ކިއޯޓޯ ޕްރިފެކްޗާގެ ޔަވާޓާ ސިޓީގެ މޭޔަރ، އުމުރުން 36 އަހަރުގެ ޝޯކޯ ކަވާޓާ މެޓާނިޓީ ލީވް ނަގާފައިވަނީ ސެޕްޓެމްބަރ 15 ވަނަ ދުވަހު އޭނާގެ ފުރަތަމަ ދަރިފުޅު ލިބުމާއި ގުޅިގެންނެވެ.
ޓައިމް މެގަޒީން އިން ނެރޭ އެންމެ އިންފްލުއެންޝަލް ރައިސިންގ 100ސްޓާސް(އެންމެ ނުފޫޒްގަދަ އަރަމުން އަންނަ 100ތަރިން) ގެ ލިސްޓް ގައި އޭނާގެ ނަން ހިމަނާނެކަން ވަނީ އަންގާފައެވެ.އެއީ ވިހެއުމާއި ވަރަށް ކައިރި ވަންދެންވެސް އަރާމެއްނެތި ވަޒީފާގައި ބުރަކޮށް ކުރިޔަށް ގޮސްފައިވާތީ ކަވާޓާގެ މަސައްކަތަށް ތައުރީފް ކުރުމުގެ ގޮތުންނެވެ.
އިންތިޚާބް ވެފައިވާ އިސް ފަރާތްތަކުން ވިހެއުމަށް ޗުއްޓީ ނަގަން ފެނޭތޯ، މިބަހުސް މުޅިޖަޕާނުގައި ކުރިޔަށް ދިޔަކަމަށް ވެއެވެ.އަދި ޖަޕާނުގައި މިވަގުތުވެސް އާބާދީ އިތުރު ކުރުމަށް މަސައްކަތް ތަކެއް ކުރަމުން ދިއުމާއި އެކުވެސް ކަވާޓާ ޗުއްޓީނެގުމުން އެކަމަށް ފާޑުކިއުން އިތުރު ވެގެން ދިޔަކަމަށް ޚަބަރުތައްބުނެއެވެ.
ސޯޝަލް މީޑިޔާގައި ފާޑުކީ ބައެއް ފަރާތްތަކުން ބުނެފައިވާ ގޮތުގައި އަލަށް ލިބޭ ކުއްޖަކު ބެލުމަކީ ބުރަ ކަމަކަށް ވާއިރު ކަވާޓާ ވަރަށް ފުރިހަމަޔަށް އެކަން ކުރަމުންދާކަން ފާހަގަ ކޮށްފައި ވެއެވެ. އަދި އޮފީހަށް ދާ މަންމައިންނަށް ސަޕޯޓް ލިބޭފަދަ ސިސްޓަމެއް ޖަޕާނުގެ ސޮސައެޓީގައި ގާއިމް ކުރަން ފެއިލް ވެފައިވާކަން،ކަވާޓާ އަސް ސަޕޯޓް ކުރި ބައެއް ފަރާތްތަކުން ފާހަގަ ކޮށްފައި ވެއެވެ.އަދި ކަވާޓާ އަކީ ސިޔާސީ މަސައްކަތާ ގުޅުމުގެ ޝައުގްވެރިކަން ހުންނަ ޒުވާން އެހެން އަންހެނުންނަށް ހިއްވަރު ލިބޭފަދަ ނަމޫނާއެއް ކަމަށްވެސް އެކަކު ބުނެފައި ވެއެވެ.
ފާޑުކީ ފަރާތްތަކުން ބުނި ގޮތުގައި ޕަބްލިކް އޮފީހަކަށް އިންތިހާބް މުމަށްފަހު މަސައްކަތުން އެއްކިބާވެ، ޗުއްޓީ ނެގުމަކީ ޒިންމާދާރުކަން ކުޑަކަމެކެވެ.އަދި ކުދިން ހޯދަން ބޭނުން ނަމަ މަގާމަށް ކުރިމަތި ލުމުގެ ކުރިން ކުދިން ހޯދަން ޖެހޭނެ ކަމަށް ބައެއްފަރާތްތަކުން ބުނެފައި ވެއެވެ.
އަދި މެޓާނިޓީ ލީވް ގައި ހުންނައިރު މުސާރަ ދޭން ނުޖޭކަމަށް ވެސް ބައެއް ފަރާތްތަކުން ބުނެފައި ވެއެވެ.
ވިހެއުމުގެ ކުރިން ބީބީސީ އަށް ދިން އިންޓަވިއު އެއްގައި ކަވާޓާ ވަނީ ފާޑު ކިއުންތަކާމެދު ނުވިސްނާ ކަމަށް ބުނެފައެވެ.އަދި އޭނާގެ ވަޒީފާ ގެ މަސްއޫލިއްޔަތުތައް އަދާކުރަމުން ގެންދަނީ ވަރަށް ކުރާ ހިތުން ކަމަށާ ހަމައެއާއެކު އެކީ އޭނާ ކުއްޖަކު ހޯދަން ނިންމީ އާއިލާއެއް ފަށަން އެންމެ ރަގަޅު ވަގުތު މިއީ ކަމަށް ގަބޫލު ކުރެވޭތީ ކަމަށް ބުނެފައި ވެއެވެ.
އިސްކޮށް ސިޔާސީ ކަންކަމުގައި އުޅޭ އަންހެނުން މެޓާނިޓީ ލީވް ނެގުމާއި ދެކޮޅު ނަމަ އޭގެ މާނަޔަކީ ވިހާއުމުރު ކަމަށްވާ ވިހި އަހަރާއި 40 އަހަރާއި ދެމެދުގެ ހުރިހާ އަންހެނުން އާންމު ޚިދުމަތަށް ނިކުތުމާއި ދެކޮޅުވުން ކަމަށް ގަބޫލުކުރާކަމަށް އޭނާ ބުނެފައި ވެއެވެ.
ޖަޕާނުގެ ސިޓީތަކުގައި އޮފީސްތަކަށްދާ އަންހެނުންނަށް މެޓާނިޓީ ލީވް ދޭގޮތަށް އޮތް ނަމަވެސް އިންތިހާބީ މަގާމް ތަކަށް އަންނަ އަންހެނުންނަށް މެޓާނިޓީ ލީވް ދޭ ގާނޫނެއް ނެތް ކަމަށް ވެއެވެ.އެހެން ކަމުން ކަވާޓާ ވަނީ އޭނާގެ އޮފީހަށް ޚާއްސަ ޕްލޭނެއް ހަދާފައެވެ. މިގޮތުން އޭނާވަނީ މޭޔަރު ކަމުގެ ހުރިހާ ބާރުތަކެއް 16 ހަފްތާއަށް އޭނާގެ ޑެޕިއުޓީ ޝިގޭޓޯ އަށް ބަދަލު ކޮށްފައެވެ.އަދި ހާލަތު ތަންދޭ ހުރިހާ ވަގުތެއްގައި އޭނާވެސް ރިމޯޓްކޮށް، ނުވަތަ އޮންލައިންކޮށް މަސައްކަތް ކުރާގޮތަށް ވަނީ ހަމަޖައްސާފައެވެ.
އަންހެން ދަރިފުޅަކު ލިބިފައިވާކަން ސެޕްޓެމްބަރ 15 ވަނަ ދުވަހު އިއުލާން ކުރަމުން އެކްސްގައި ލިއުނު ޕޯސްޓެއްގައި،އޭނާއަށް ސަޕޯޓް ކުރިފަރާތްތަކަށް ޝުކުރު އަދާކުރަމުން ކަވާޓާ ލިޔެފައިވަނީ ގައުމުގައި ހުރި އިޖްތިމާއީ މައްސަލަ ތައް ހައްލު ކުރުމަށް އޭނާ ފަށާފައިވާ މަސައްކަތް ދެގުނަ ބާރަށް ކުރިޔަށް ގެންދަން މިހާރު ބޭނުން ކަމުގައެވެ. އަދި ބެލެނިވެރިއަކަށް ވެވުމުން ހަގީގީ މާނައިގައި އާއިލާތަކަށް ކުރިމަތިވާ މައްސަލަތަކާއި ކުރިމަތިލާން ޖެހިފައިވާތީ އެކަންކަން ހައްލުކުރުމަށް ޕޮލިސީތައް ހެދުމުގެ އަޒުމު ވަރުގަދަ ވެފައިވާކަމަށް ބުނެފައި ވެއެވެ.