ނައިޖީރިއާގެ ހަނގުރާމަވެރި އަދި ކުށްކުރާ ގްރޫޕްތަކުން ހިންގި ވަކިވަކި ހަމަލާތަކެއްގައި 80 އަށްވުރެ ގިނަ މީހުން ރަހީނުކޮށްފިއެވެ. އަދި އެ ގައުމުގެ ސަރުކާރުގެ ސެކިއުރިޓީ ބާރުތަކުން ހިންގި ހާއްސަ އޮޕަރޭޝަނެއްގައި، ރަހީނުކުރި މީހުންގެ ކަމަށް ބެލެވޭ އިންސާނުންގެ ކައްޓާއި 28 ބޯކަށި ވަނީ ހޯދާފައެވެ.

ރިޕޯޓްތައް ބުނާގޮތުގައި، ނައިޖީރިއާގެ އުތުރުގެ ނައިޖާ އަދި ޒަމްފާރާ ސްޓޭޓުން ރަހީނުކޮށްފައިވަނީ ގިނައިން ދަނޑުވެރިންނާއި އަންހެނުންނެވެ. އެގޮތުން ނައިޖާ ސްޓޭޓްގެ މަރީގާ ސަރަހައްދުން ދަނޑުވެރިކަން ކުރަން ތިބި 47 މީހަކު ވަގަށް ނަގާފައިވާއިރު، އެއާ ޖެހިގެން އޮތް ޒަމްފާރާ ސްޓޭޓްގެ ޔާރްގަޑާ އަވަށުން 40 އަންހެނުން ވަނީ ރަހީނުކޮށްފައެވެ. މި ހަމަލާތައް ދީފައިވަނީ ”ބަންޑިޓްސް“ ތަކުގެ ގޮތުގައި މަޝްހޫރުވެފައިވާ، ފައިސާއަށް މީހުން ރަހީނުކުރުމާއި މުދާ ފޭރުމުގައި ހަރަކާތްތެރިވާ ކުށްކުރާ ގްރޫޕްތަކުންނެވެ.
މިއާއެކު، ނައިޖީރިއާގެ ދެކުނު-އިރުމަތީ އަބިއާ ސްޓޭޓުގެ ޖަންގަލިތަކުގައި ހުރި ކުށްކުރާ ގްރޫޕްތަކުގެ ކޭމްޕްތަކަށް ފުލުހުން ދިން ކުއްލި ހަމަލާތަކެއްގައި، ރަހީނުކޮށްގެން މަރާލާފައިވާ މީހުންގެ ކަމަށް ބެލެވޭ އިންސާނުންގެ ބޯކަށިތަކާއި ކަށިތައް ވަނީ ފެނިފައެވެ. ފުލުހުން ބުނި ގޮތުގައި އެ ސަރަހައްދުގައި ތިބި ކުށްވެރިން ވަނީ ފުލުހުން ފެނުމާއެކު ފިލާފައެވެ. އަދި އެމީހުން ހޯދުމުގެ މަސައްކަތް ސެކިއުރިޓީ ބާރުތަކުން އަންނަނީ ވަރުގަދަކުރަމުންނެވެ.
ނައިޖީރިއާގައި ފައިސާ ހޯދުމުގެ ބޭނުމުގައި މީހުން ރަހީނުކުރުން އާންމުވެ، އެކަމުން އެތައް ބިލިއަން ނައިރާއެއް ހަނގުރާމަވެރިން ހޯދަމުންދާއިރު، އަންނަ ޖެނުއަރީ މަހު އޮންނަ ރިޔާސީ އިންތިހާބާ ދިމާކޮށް ގައުމީ ސެކިއުރިޓީ ވަރުގަދަ ނުކުރެވޭތީ ރައީސް ބޯލާ ޓިނޫބޫގެ ސަރުކާރަށް އާންމުންގެ ބޮޑެތި ފާޑުކިއުންތަކެއް ވަނީ އަމާޒުވެފައެވެ.