ނޭޕާލުގެ އުތުރުގެ ސަރަހައްދުތަކަށް ކުރިމަތިވި ފެންބޮޑުވުމާއި ފަރުބަދަތައް ކަނޑައިގެން ވެއްޓުމުގެ ކާރިސާތަކަށްފަހު، އެ ގައުމުގައި ފަތުރުވެރިކަމުގެ އެންމެ ”ޕީކް“ ސީޒަން ކަމަށްވާ ސެޕްޓެމްބަރު މަހު، އެ ގައުމަށް ފަތުރުވެރިން ޒިޔާރަތްކުރާ މިންވަރު ދަށަށް ގޮސް، ފަތުރުވެރިކަމަށް ބަރޯސާވެފައިވާ އާންމުންގެ ދިރިއުޅުމަށް ބޮޑެތި ގޮންޖެހުންތަކެއް ކުރިމަތިވެއްޖެއެވެ.

ފެންބޮޑުވުމުގެ ކާރިސާތަކުގައި 1,450 އަށްވުރެ ގިނަ މީހުން މަރުވެ، މުހިންމު މަގުތަކާއި ފާލަންތަކަށް ބޮޑެތި ގެއްލުންތަކެއް ލިބިފައިވާއިރު، މީގެ ނޭދެވޭ އަސަރު ވަނީ ފެންބޮޑުނުވާ ސަރަހައްދުތަކުގެ ފަތުރުވެރިކަމަށްވެސް ކޮށްފައެވެ. ނޭޕާލުގެ ޖީޑީޕީގެ 8 އިންސައްތަ ހިއްސާކުރާ ފަތުރުވެރިކަމުގެ ދާއިރާގައި 1 މިލިއަނަށްވުރެ ގިނަ މީހުން މަސައްކަތްކުރާއިރު، ގިނަ އަދަދެއްގެ ފަތުރުވެރިން ވަނީ ބުކިންތައް ކެންސަލްކޮށްފައެވެ.
ފަތުރުވެރިކަމުގެ ދާއިރާގައި ހަރަކާތްތެރިވާ ކުދި ވިޔަފާރިވެރިންނާއި ޓެކްސީ ޑްރައިވަރުން ބުނާ ގޮތުގައި، ހާލަތު އޮތީ ”ލޮކްޑައުން“ އަކާ އެއްވަރުގެ ހާލަތެއްގައެވެ. މަގުތައް ބަންދުވުމާއި ފަތުރުވެރިން މަދުވުމުގެ ސަބަބުން އާންމުކޮށް ލިބޭ އާމްދަނީގެ ހަތަރުބައިކުޅައެއްބައިވެސް މި ސީޒަނުގައި ނުލިބޭ ކަމަށް އެމީހުން ބުނެއެވެ.
ގާތްގަނޑަކަށް 80 އިންސައްތަ ބުކިންތައް ކެންސަލްވެފައިވާއިރު، ނޭޕާލް ސަރުކާރުން ވަނީ ގައުމުގެ ގިނަ ސަރަހައްދުތަކަކީ ރައްކާތެރި ސަރަހައްދުތަކެއް ކަމަށާއި ފަތުރުވެރިކަމަށް ގައުމު ހުޅުވާލެވިފައިވާ ކަމަށް ބުނެފައެވެ. ނަމަވެސް ބޭރުގެ ބައެއް އެމްބަސީތަކުން ދަތުރުފަތުރުގެ އިންޒާރުތައް ނެރެފައިވުމުން، ގިނަ ފަތުރުވެރިން ވަނީ ދަތުރުތައް ކެންސަލްކޮށް ނުވަތަ ފަސްކޮށްފައެވެ. މިއާއެކު، އާންމު އާމްދަނީ ދަށްވެ، ދިރިއުޅުމުގެ އަސާސީ ހަރަދުތައް ހަމަޖެއްސުމަށްވެސް ގިނަ ބަޔަކަށް ވަނީ އުނދަގޫތަކާ ކުރިމަތިލާންޖެހިފައެވެ.