ސްރީލަންކާގައި މަޝްހޫރުވި ”އެއާބަސް ޑީލް“ ގައި ބައިވެރިވި ކަމުގެ ތުހުމަތުގައި ”ބްރައިބަރީ އެންޑް ކޮރަޕްޝަން ކޮމިޝަނުން“ ތަހުގީގު ކޮށް ހައްޔަރު ކުރި ސްރީލަންކާގެ ކުރީގެ ރައީސް ގެ ދަރިކަލުން ނަމާލް ރާޖަޕަކްސަ ގެބަންދުގެ މުއްދަތު ކޮލޮމްބޯގެ ޗީފް މެޖިސްޓްރޭޓް އަނެއްކާވެސް އިތުރު ކޮށްފިއެވެ. އޭނާގެ ބަންދުގެ މުއްދަތު މިފަހަރު އިތުރުކުރީ އޮކްޓޯބަރުމަހުގެ 13 އާއި ހަމައަށެވެ.

އަންގާރަ ދުވަހު ބޭއްވުނު އަޑުއެހުމުގައި ކޯޓަށް މައުލޫމާތު ދެވުނު ގޮތުގައި މިކަމާބެހޭ ތަހުގީގުތައް މިހާރު ވަނީ ނިމިފައެވެ.އަދި ކްރިމިނަލް އިންވެސްޓިގޭޝަން ޑިޕާޓްމަންޓާއި ބްރައިބަރީ އެންޑް ކޮރަޕްޝަން ކޮމިޝަން ގުޅިގެން މައްސަލަ ކޯޓަށް ހުށަހަޅައި ޝަރީއަތް ފެށުމުގެ މަރުހަލާ އަށް ދަނީ ތައްޔާރު ވަމުންނެވެ.
”އެއާބަސް ޑީލް“ އަކީ 2013-2014 މި މުއްދަތުގައި ސްރީލަންކަން އެއާލައިންސް އަށް ދިހަ އެއާބަސް މަތިންދާބޯޓު ގަތުމަށް ވެވުނު އެތައް ބިލިއަން ޑޮލަރުގެ އެއްބަސްވުމުގައި ރިޝްވަތާ ކޮރަޕްޝަން މަތީ ދަރަޖައަކަށް އެކުލެވޭ ކަމަށް ޝައްކު ކުރެވިގެން ކަމާބެހޭ އިދާރާ ތަކުން ބަލަން ފެށިމައްސަލަ އެކެވެ.
މަތިންދާބޯޓު އުފައްދާ ފަރަންސޭސި ކުންފުނި އެއާބަސް އާއި އެކު ވެވުނު އެއަގުބޮޑު އެއްބަސްވުން، 2015 ވަނަ އަހަރު ސަރުކާރު ބަދަލު ވުމާއި އެކު ކެންސަލް ކުރެވުނެވެ. މިއާއި އެކު ”ކެންސަލޭޝަން ޕެނަލްޓީ“ގެ ގޮތުގައި ބޮޑު ޖޫރިމަނާއެއް ދައްކަން ޖެހުނެވެ.
އޮފިޝަލުން އޭރު ހާމަ ކުރި ގޮތުގައި އޯޑަރު ކެންސަލް ކުރުމުން އެއާލައިނަށް 400މިލިއަންޑޮލަރުގެ ގެއްލުން ވިއެވެ.
ބައިނަލް އަޤްވާމީ ތަހުގީގް ތަކަށް ހާމަވެފައިވާ ގޮތުގައި ސްރީލަންކާގެ އެއްބަސްވުން އެއާބަސް ކުންފުނިން ނިންމީ ކުންފުނީގެ އޭރުގެ ސީއީއޯ ކަޕީލަ ޗަންދުރަސޭނާ ގެ އަންހެނުންގެ ނަމުގައި ބްރޫނާއީގައި ރަޖިސްޓްރީ ކޮށްފައިވާ ”ޝެލް“ ކުންފުންޏެއް މެދުވެރި ވެގެންނެވެ. އެއީ ރިޝްވަތުގެ ފައިސާ ނެގުމަށް ފަސޭހަ ކުރުމަށެވެ.
މި ޑީލްގައި 16 މިލިއަން ޑޮލަރުގެ ރިޝްވަތު ހިމެނޭކަން ހާމަ ވެފައިވާއިރު ބޯޓު ތަކުގެ ކަންތަކަށް އެހާތަނަށް ދެއްކީ ހަމަ އެކަނި 2 މިލިއަން ޑޮލަރު ކަން ވަނީ ހާމަވެފައެވެ.
މިމައްސަލައިގައި ސްރީލަންކަން އެއާލައިންސްގެ ކުރީގެ ސީއީއޯ ގެ ދެމަފިރިން ގެ މައްޗަށް ވަނީ ކޮރަޕްޝަން އަދި ރިޝްވަތުގެ ކުށް ސާބިތުވެފައެވެ.މަތިންދާބޯޓު ގަތުމާއި ބެހޭ ޑީލްގައި ޝާމިލްވާ ކަމަށް ތުހުމަތު ކުރެވޭ އޭރުގެ ސަރުކާރުގެ އިސްބައެއްފަރާތްތަކާއި ބެހޭ ތަހުގީގުތައް ވެސް ވަނީ ކުރިޔަށް ގެންގޮސްފައެވެ. ނަމާލް ރާޖަޕަކްސާ އަކީ ވެސް އެކަމުން ނާޖާއިޒު ފައިދާތަކެއް ނަގާފައިވާކަމަށް ޝައްކު ކުރެވޭ ފަރާތެކެވެ.
ކޮރަޕްޝަނާއި ރިޝްވަތުގެ އިތުރުން ނަމާލްގެ މައްޗަށް ވަނީ މަނީ ލޯންޑަރިންގ ގެ ތުހުމަތު ވެސް ކުރެވިފައެވެ.
ނަމާލްގެ ބައްޕަ ކުރީގެ ރައީސް މަހިންދަ ރާޖަޕަކްސަ ގެ ސަރުކާރުވެސް ވެއްޓުނީ ކޮރަޕްޝަނާއި ފަސާދަ ބޮޑުވެގެންގޮސް އާންމުން ނިކުމެ ވަރުގަދަ އިހުތިޖާޖް ތަކެއް ކުރުމާއި ގުޅިގެންނެވެ. ސަރުކާރުގެ އިސްއޮފިޝަލުން ފައިސާ އަށް ޚިޔާނާތް ތެރިވުން މާމައްޗަށްގޮސް، ބޭރުގެ ދަރަނި ބޮޑުވެ އޭރު އެގައުމުގެ އިގްތިސާދީ ހާލަތު ވަނީ ވަރަށް ގޯސް ވެފައެވެ.ބޭރުފައިސާގެ ރިޒަރވް ގާތްގަނޑަކަށް ސުމަކަށް ދަށްވެފައިވާއިރު ކާބޯތަކެއްޗާއި ބޭސް،ގޭސް އަދި ކަރަންޓު ޖެނެރޭޓަރު ތަކަށް އަޅާނެ ފިއުލް ގަންނާނެ ފައިސާވެސް ނެތި އެގައުމުގެ ހާލަތު އޭރު ވަނީ ވަރަށް ބޮޑަށް ގޯސްވެފައެވެ.