އިޒްރޭލުގެ ބޮޑުވަޒީރު ބެޖަމީން ނަތަންޔާހޫ ޕްރައިވެޓް މަތިންދާބޯޓެއްގައި އަބޫދާބީ އަށް ސިއްރު ދަތުރުފުޅެއް ކުރައްވައި ޔޫއޭއީ ގެ ރައީސް ޝެއިޚް މުޙައްމަދު ބިން ޒައިދް އަލް ނަހްޔާން އާއި އެކު ސިއްރު ބައްދަލް ވުމެއް ބާއްވަވައިފި ކަމަށް ވިއޯން ޗެނެލްގައި ބުނެފައި ވެއެވެ.
ނަތަންޔާހޫ ކުރެއްވިކަމަށްބުނާ ދަތުރު ފުޅުގެ ޚަބަރު ވަނީ އިޒްރޭލްގެ މީޑިޔާގައި އާދީއްތަދުވަހު ރިޕޯޓް ކޮށްފައެވެ.
ޗެނެލް 12 އާއި ހަވާލާދީ ވިއޯން ޗެނެލް އިން ބުނެފައިވާ ގޮތުގައި ނަތަންޔާހޫ ދަތުރު ކުރެއްވި ޕްރައިވެޓް މަތިންދާބޯޓަކީ އީރާން ހަނގުރާމަ ފެށުނުތަނާކައިރީ ވެސް ޔޫއޭއީ އަށް ކުރެއްވި ދަތުރު ގައި ބޭނުން ކުރެއްވި ބޯޓު ކަމަށް ވެއެވެ.އަދި އާދީއްތަ ދުވަހު މެންދުރުފަހު 3:10 އެހާއިރު ވަޑައިގެންނެވުމަށްފަހު ހަތަރު ގަޑިއިރު ޔޫއޭއީގައި ހޭދަ ކުރެއްވި ކަމަށް މީޑިއާ ރިޕޯޓްތަކާއި ހަވާލާދީ ވިއޯން ޗެނެލުން ބުނެއެވެ.
ނަތަންޔަހޫ ކުރެއްވި ދަތުރުފުޅާ ބެހޭގޮތުން ޔޫއޭއީގެ ސަރުކާރުން އަދި އެއްޗެއް ނުބުނާ ކަމަށް ވެއެވެ.
ޔޫއޭއީ އާއި އިޒްރޭލާއި ދެމެދު 2020ވަނަ އަހަރު ޑިޕްލޮމެޓިކް ގުޅުންތައް ގާއިމް ކުރެވުނު ދުވަހުން ފެށިގެންވެސް ދެގައުމު ދެމެދު ހުޅުވާލެވިފައިވާ ސީދާ މުއާމަލާތުތައް ކުރެވެމުންދާކަމަށް ޔޫއޭއީ އިން ބުނެފައިވާ ކަމަށްވެއެވެ.
ނަތަންޔާހޫ ގެ މަގްބޫލުކަން އަމިއްލަ ގައުމުގައި ވަރަށް ބޮޑަށް ގެއްލިފައިވާއިރު އިތުރު ދައުރަކަށް ހޮވޭތޯ ކުރައްވަމުންގެންދަވާ ކެމްޕެއިންގައި އޭނާ އަށް ވަނީ ބޮޑެތި ގޮންޖެހުންތަކާއި ކުރިމަތިލާން ޖެހިފައެވެ.
އިދިކޮޅުން ތުހުމަތު ކުރާގޮތުގައި އޮކްޓޯބަރު 7ގައި ހަމާސް އިން އިޒްރޭލަށް ދިން ހަމަލާ ތައް ދޭން އުޅޭކަމުގެ އިންޓެލިޖަންސް މައުލޫމާތު ޔޫއޭއީގެ ރައީސް ނަތަންޔާހޫ އަށް އެރުވި އެވެ. ނަމަވެސް އެކަން ނަތަންޔާހޫ އިޒްރޭލުގެ ސެކިއުރިޓީ ޗީފުންނަށް އަންގަވާފައެއް ނުވެއެވެ. އަދި އެހާ ގިނަ އަދަދެއްގެ މީހުން މަރުވެގެން ގޮސް އެހާބޮޑު ގެއްލުން ލިބުނީ އެހެން ވެގެން ކަމަށް އިޒްރޭލުގެ އިދިކޮޅު ލީޑަރުން ދަނީ ބުނަމުންނެވެ.
އެފަދަ ”ވޯނިންގ“ އެއް ޔޫއޭއީ ގެ ލީޑަރު ދެއްވާފައި ނުވާކަމަށް ނަތަންޔާހޫ ވިދާޅުވެއެވެ. އަދި އެޚަބަރު ފުރަތަމަ ރިޕޯޓް ކުރި ނޫހާ ދެކޮޅަށް ގާނޫނީ ފިޔަވަޅު އަޅުއްވާނެ ކަމަށްވެސް ނަތަންޔާހޫ ވިދާޅުވެފައި ވެއެވެ.
މިފަހަކަށް އައިސް އިޒްރޭލުގެ ކެބިނެޓް ބައްދަލް ވުންތައް ވަރަށް ހޫނުވެ ނަތަންޔާހޫ ބައްދަލް ވުން ދޫކުރައްވާ ވަޑައި ގަންނަވަން މަޖްބޫރުވާ ހަމަޔަށްވެސް ދާކަމަށް މީޑިޔާ ރިޕޯޓްތައް ބުނެއެވެ.