މޫސުމަށް އަންނަ ބަދަލުތަކުގެ ސަބަބުން ފަރުބަދަމަތީ ސަރަޙައްދުތަކުގައި ކުއްލި ކާރިސާތައް ހިނގުމުގެ ފުރުޞަތު އިތުރުވަމުންދާތީ، ހިމާލިޔާ ސަރަޙައްދުގެ ރައްޔިތުންނަށް ވަގުތުން ވަގުތަށް އިންޒާރު ލިބިދާނެތޯ ނޭޕާލަށް ކުރިމަތިވި ނުރައްކާތެރި ފެންބޮޑުވުމުގެ ކާރިސާއާ ގުޅިގެން ކަންބޮޑުވުން އުފެދިއްޖެއެވެ.އޯގަސްޓް 26 ގައި ނޭޕާލުގެ ރަސުވާ ޑިސްޓްރިކްޓުގައި ގުލޭޝިއަރެއް ވެއްޓި ގަނޑުފެނާއި ހިލަ ފުނިޖެހުމުގެ ސަބަބުން، ލެންޑޭ ކޯލާ ކޯރުގެ ތެރެއިން ބާރުގަދަ ފެނާއި، މަޑާއި އަދި ކުނިބުނީގެ ރާޅުތަކެއް އުފެދުނެވެ.

މި ފެންބޮޑުވުމުގައި ނޭޕާލާއި ޗައިނާގެ ބޯޑަރާ ހަމައަށް މީހުން ދިރިއުޅޭ ސަރަޙައްދުތަކާއި ޢުމްރާނީ ވަސީލަތްތައް ދޮވެވިގެން ދިޔައެވެ.ސެޕްޓެމްބަރު މަހުގެ މެދަކާ ހަމައަށް އައިއިރު، ނޭޕާލާއި ޓިބެޓުން 1،400 އަށް ވުރެ ގިނަ މީހުން މަރުވެ، މަދުވެގެން 6،000 މީހުން ގެއްލިފައިވާ ކަމަށް ރިޕޯޓްކުރެވިފައިވެއެވެ. ބާރަ ހައިޑްރޯޕަވަރ ޕްލާންޓް ހަލާކުވެފައިވާއިރު، މަގުތަކާއި، ފާލަންތަކާއި އަދި ގެދޮރުތައް ވަނީ ބޮޑުދޮވެވި ނުވަތަ ފަސްއަޅައި ފޮރުވިފައެވެ.ސައިންސްވެރިން ވިދާޅުވާ ގޮތުގައި، މި ކާރިސާއިން ދައްކުވައިދެނީ ހަމައެކަނި ވާރޭވެހުމާއި ކޯރުތަކުގެ ފެންގަނޑު އުފުލުން ފަދަ ވަކިވަކި ނުރައްކާތަކަށް އަމާޒުކޮށް ފަރުމާކޮށްފައިވާ އިންޒާރުދޭ ނިޒާމުތަކުގެ ބަލިކަށިކަމެވެ. ފަރުބަދަމަތީގެ ކާރިސާތަކަކީ ގުޅިފައިވާ އެތައް ކަމެއްގެ ސަބަބުން ކުރިމަތިވާ ކަންކަމެވެ. އެގޮތުން އެވަލާންޗްތަކުގެ ސަބަބުން ކޯރުތައް ބެދި، ވަގުތީ ކުޅިތައް އުފެދި، އަދި ކުއްލިއަކަށް މި ފެންގަނޑުތައް ފަޅައިގެން ދިއުމުން ބޮޑެތި ގެއްލުންތައް ދޭ ކިސަޑު ފެންގަނޑުތައް އުފެދިގެންދެއެވެ.މާހިރުން އިތުރަށް އިންޒާރު ދެއްވާ ގޮތުގައި، ދުނިޔެ ހޫނުވުމުގެ ސަބަބުން މި ސަރަޙައްދުގެ ގްލޭޝިއަރުތަކަށާއި، ސްނޯ ފަށަލައަށާއި، ދާއިމީ ގަނޑުފެން ފަސްގަނޑާއި އުސް ފަރުބަދަތަކުގައިވާ ކުޅިތަކަށް ބަދަލުތައް އަންނަމުންދެއެވެ. މިފަދަ ނުރައްކާތައް ކަޝްމީރާއި ސިއްކިމްއިން ވެސް ފާހަގަކުރެވިފައިވާއިރު، އެ ތަންތަނުގައިވާ ހަމަޖެހުމެއް ނެތް ގްލޭޝިއަލް ކުޅިތަކުގެ ސަބަބުން އެ ސަރަޙައްދުގެ ރައްޔިތުންނަށާއި ޢުމްރާނީ ވަސީލަތްތަކަށް ނުރައްކާ އޮތް ކަމަށް ބެލެވެއެވެ.ކޯރުތަކުގެ ތިރީ ސަރަޙައްދުތަކުގައި ދިރިއުޅޭ ރައްޔިތުންނަށް ނުރައްކަލުގެ މަޢުލޫމާތު ލިބުމަކީ ކޮންމެހެން މުހިންމު ކަމަކަށްވާތީ، މޮނިޓަރިންގ ވަރުގަދަކުރުމަށާއި، އަވަސް އިންޒާރު ދޭ ނިޒާމުތައް ޤާއިމުކުރުމަށާއި، އަދި ޤައުމުތަކުގެ މެދުގައި އޮންނަ އެއްބާރުލުން އިތުރުކުރުމަށް މި ކާރިސާއާ ގުޅިގެން ވަނީ އަލުން ގޮވާލާފައެވެ.