މި އަހަރު އޭޝިއާ ސަރަޙައްދުގައި ހިނގި އެންމެ ނުރައްކާތެރި އެއް ކާރިސާގައި، ނޭޕާލްގެ ރަސުވާ ޑިސްޓްރިކްޓަށް ބުދަ ދުވަހު ކުއްލިއަކަށް ފެންބޮޑުވެ، ޓިބެޓާ ހަމައަށް ފޯރައި، މަދުވެގެން 160 މީހުން މަރުވެ، އިތުރު އެތައް ސަތޭކަ ބަޔަކު ގެއްލިއްޖެއެވެ.

ނޭޕާލްގެ ފުލުހުން ވަނީ 157 މީހެއްގެ ހަށިގަނޑު ހޯދާފައެވެ. އަދި ނުރައްކާ ބޮޑު ސަރަޙައްދުތައް ބަލައި ފާސްކުރުމުގެ މަސައްކަތް އަދިވެސް ދަނީ ކުރަމުންނެވެ. ނޭޕާލްގެ ޓޫރިޒަމް މިނިސްޓްރީން ބުނާ ގޮތުގައި 403 ފަތުރުވެރިން — މީގެ ތެރޭގައި ހިމެނޭ 341 ބޭރުގެ ރައްޔިތުން ވީނުވީއެއް ނޭނގި ވަނީ ގެއްލިފައެވެ. އޭގެ ތެރޭގައި އިންޑިއާގެ 142 މީހުންގެ އިތުރުން އޮސްޓްރޭލިއާ، އިނގިރޭސިވިލާތް، މެލޭޝިއާ، ނެދަލަންޑްސް، ޕޯޗުގަލް، ސައުތު އެފްރިކާ، ސައުތު ކޮރެއާ އަދި އެމެރިކާގެ ރައްޔިތުން ހިމެނެއެވެ. މީގެ އިތުރުން 28 ފުލުހުން ވެސް ވަނީ ގެއްލިފައެވެ.

ބޯޑަރުގެ އަނެއް ފަރާތުގައިވާ ޓިބެޓުގެ ގީރޮންގް ކައުންޓީގެ ބޯޑަރު ހުރަސްކުރާ ސަރަޙައްދަށް ކިސަޑު ފޭބުމުގެ ސަބަބުން މަގުތަކާއި ކަރަންޓާއި މުވާސަލާތީ ޚިދުމަތްތައް ކެނޑި، މަދުވެގެން ތިން މީހުން މަރުވެ 265 މީހުން ގެއްލިފައިވާ ކަމަށް ޗައިނާގެ ކަމާބެހޭ ފަރާތްތަކުން ވަނީ ކަށަވަރުކޮށްދީފައެވެ. ރައީސް ޝީ ޖިންޕިންގ ވަނީ މީހުން ހޯދުމުގެ މަސައްކަތް އެންމެ ފުޅާ ދާއިރާއެއްގައި ކުރިއަށް ގެންދިއުމަށް އަމުރުކުރައްވާފައެވެ.

އިންޓަނޭޝަނަލް ސެންޓަރ ފޮރ އިންޓަގްރޭޓެޑް މައުންޓަން ޑިވެލޮޕްމަންޓްގެ މާހިރުން ޤަބޫލުކުރާ ގޮތުގައި، ގްލޭޝިއަރަކުން ގަނޑުފެނާއި ހިލަ ފައިބައިގެން އައިސް ބޮތޭ ކޯޝީގެ ކޯރު ކޮޅެއް ކަމަށްވާ ލެންދޭ ކޯލާ ކޯރު ބަންދުވުމުގެ ސަބަބުން، ކޯރުގެ ތިރީ ސަރަޙައްދުތަކަށް ކުއްލިއަކަށް ބޮޑު ރާޅެއްގެ ގޮތުގައި ފެންގަނޑު ފޮނުވާލީއެވެ. މިއީ ފާއިތުވި 14 މަސް ދުވަހުގެ ތެރޭގައި އެ ކޯރު މިގޮތަށް ފެންބޮޑުވި އައި ދެވަނަ ފަހަރެވެ. ފެންބޮޑުވުމުގެ ސަބަބުން އެންމެ ބޮޑަށް ގެއްލުންވި، ގާތްގަނޑަކަށް 50،000 އެއްހާ މީހުން ދިރިއުޅޭ ސިޔަޕްރު ބެސީ އަދި ޓިމޫރޭ ސަރަޙައްދުތަކަށް ރެސްކިއު ހެލިކޮޕްޓަރުތައް ޖެއްސޭ ގޮތް ވަނީ ނުވެފައެވެ.

ނޭޕާލްގެ އިލެކްޓްރިސިޓީ އޮތޯރިޓީން ރިޕޯޓްކޮށްފައިވާ ގޮތުގައި ގާތްގަނޑަކަށް 430 މެގަވޮޓްގެ ހައިޑްރޯޕަވަރ އަދި ސޯލާ ކެޕޭސިޓީއަށް ވަނީ ގެއްލުން ލިބިފައެވެ. އަދި ރައްކާތެރިކަމުގެ ފިޔަވަޅެއްގެ ގޮތުން އިންޑިއާގެ ބިހާރު ސްޓޭޓުން ވަނީ ކޯރުގެ ތިރީގައިވާ ހަ ޑިސްޓްރިކްޓަކުން މީހުން ހުސްކުރަން ފަށާފައެވެ. ސައުތު ކޮރެއާގެ ހައިޑްރޯޕަވަރ މަސައްކަތްތެރިންގެ ތެރެއިން އަށް މީހުން ގެއްލިފައިވާއިރު ދިހަ މީހުން ވަނީ ތާށިވެފައެވެ. ސޯލްއިން މިހާރު ވަނީ ޓާސްކް ފޯހެއް އެކުލަވާލައި އަވަސް އިޖާބަދޭ ރެސްކިއު ޓީމެއް ފޮނުވުމުގެ މަސައްކަތް ފަށާފައެވެ.

ބޮޑުވަޒީރު ބަލެންދްރަ ޝާހް ވަނީ ނޭޕާލްގެ ޤައުމީ ކާރިސާތަކާ ބެހޭ އިދާރާ ހަރަކާތްތެރިކުރުވައި، އެންމެން އެއްބައިވަންތަވުމަށް ގޮވާލައްވާފައެވެ. އަދި މީހުން ސަލާމަތްކުރުމާއި، ފަރުވާ ދިނުމާއި، ކާބޯތަކެއްޗާއި ބޯހިޔާވަހިކަން ފޯރުކޮށްދިނުމުގައި ސަރުކާރުގެ އެހީތެރިކަން ފޯރުކޮށްދޭނެ ކަމަށް ވަޢުދުވެވަޑައިގެންނެވިއެވެ. ނޭޕާލްގެ އަސްކަރިއްޔާއިން ހެލިކޮޕްޓަރުތަކާއި ރެސްޕޮންސް ޓީމުތައް ފޮނުވާފައިވީ ނަމަވެސް، ލިބުނު ގެއްލުންތައް ދެނެގަތުމުގެ މަސައްކަތް އަދިވެސް ދަނީ ކުރިއަށެވެ.

މި ކޯރަށް 2025 ވަނަ އަހަރު އައި މިފަދަ ފެންބޮޑުވުމެއްގައި ނުވަ މީހުން މަރުވެ، ނޭޕާލް-ޗައިނާގެ ”ފްރެންޑްޝިޕް ބްރިޖް“ ހަލާކުވެ، އެތައް މަހަކަށް ވިޔަފާރި މެދުކެނޑުނެވެ. މޫސުމަށް އަންނަ ބަދަލުތައް ދިރާސާކުރާ ފަރާތްތަކުން ބުނާ ގޮތުގައި ހިމާލިޔާ ސަރަޙައްދުގައި ގްލޭޝިއަރުތައް ވިރުމާއި މޫސުމީ ވިއްސާރައިގެ ބާރުގަދަވަމުން ދާތީ، އެ ސަރަޙައްދުގެ ކޯރުތަކުގެ އައްސޭރީގައި ދިރިއުޅޭ މުޖުތަމަޢުތަކަށް ކުރިއާލައި އިންޒާރުދޭ ނިޒާމުތަކުގެ މުހިންމުކަން ދަނީ އިތުރުވަމުންނެވެ.