ޖަރމަނީގެ ހެމްބަރގްގައި އޮންލައިންކޮށް އެތައް ޖަރީމާތަކެއް ހިންގައި،އޭނާގެ އަމަލުތަކުގެ ސަބަބުން 13 އަހަރުގެ ކުއްޖަކު އަމިއްލަޔަށް މަރުވުމާއި ގުޅިގެން 21 އަހަރުގެ ޒުވާނެއްގެ މައްޗަށް ކޯޓުގައި ދައުވާ އުފުލައިފި އެވެ.“ވައިޓް ޓައިގަރ“ ގެ ނަމުގައި ހަރަކާތްތެރިވާ މި ޒުވާނާއަކީ ދުނިޔޭގެ އެތައް ގައުމެއްގައި ސައިބަރ ޖަރީމާތައް ހިންގާ ފަރާތްތައް ހިމެނޭ ގްރޫޕް ”764“ ގެ މެމްބަރެއް ކަމަށް ވެއެވެ. އިދާރާތަކުން ބުނެފައިވާ ގޮތުގައި ”ވައިޓް ޓައިގަރ“ ވަނީ އުމުރުން  11 އަހަރާ 15 އަހަރާ ދެމެދުގެ އެތައް ކުދިންނެއް ގްރޫމް ކޮށް، އޭނަގެ މަޅީގައި ޖައްސާފައެވެ.

އަދި ނަފްސާނީ ގޮތުން ބަލިކަށި ކުދިން ހޮވާ އެކުދިންލައްވާ އޮންލައިންކޮށް އޭނާ ބޭނުންވާ ފާޚިޝް އަމަލުތައް ހިންގުވާ ވީޑިއޯ ރެކޯޑް ކޮށްފައެވެ. އަދި ވީޑިއޯ ތައް ލީކް ކޮށްލާނެ ކަމުގެ ބިރު ދައްކާ އިތުރަށް އެކަންކަން ދަމަހައްޓައެވެ. އަދި އެންމެ ފަހުން ބައެއް ކުދިން ބިރުންގޮސް އަމިއްލަޔަށް މަރުވާ ހިސާބަށްވެސް އޭނާވަނީ ކަންތައް މައްޗަށް ގެންގޮސްފައެވެ.

”ވައިޓް ޓައިގަރ“ގެ މަޅީގައި  ޖެހިފައިވާ ގިނަ ކުދިންނަކީ ޖަރމަނީގެ އިތުރުން އިގިރޭސިވިލާތް، ކެނެޑާ އަދި އެމެރިކާއަށް ނިސްބަތްވާ ކުދިން ކަމަށް ވެއެވެ.

އެމެރިކާގެ އެފްބީ އައި އިން ބުނެފައިވާ ގޮތުގައި ”764“ ގްރޫޕަކީ ކުޑަކުދިން ނާޖާއިޒުގޮތުގައި ބޭނުންކޮށް ކުދިންނާމެދު އަނިޔާވެރި އަމަލުތައް ހިންގަމުން ގެންދާ ނެޓްވަރކް އެކެވެ.އަދި އެފަރާތުން ވަނީ މި ގްރޫޕް އަށް ނިސްބަތްވާ ބައެއް މީހުން ހައްޔަރުވެސް ކޮށްފައެވެ.

ޖަރމަނީގެ ޕްރައިވަސީ ގާނޫނުތައް އޮންނަ ގޮތުން މިފަދަ ޖަރީމާތައް ހިންގާމީހުންގެ ފުރިހަމަ ނަން ހާމަ ނުކޮށް ހިފެހެއްޓެއެވެ. އެހެން ކަމުން މިޒުވާނާގެ ނަމެއްގެ ގޮތުގައި ހާމަ ކޮށްފައިވަނީ ހަމައެކަނި ޝަޙްރިޔާރު ޖޭ އެވެ.އޭނާއަކީ ޖަރމަނީގެ އަދި އީރާނުގެ ޕާސްޕޯޓް އޮންނަ ފަރާތެއް ކަމަށް ވެއެވެ. ޝަޙްރިޔާރު ޖޭ ހައްޔަރު ކޮށްފައިވަނީ މިދިޔަ އަހަރުގެ ހޫނު މޫސުމުގައި އޭނާގެ މައިންބަފައިންގެ ގޭގައި ހުއްޓައެވެ.

ޝަޙްރިޔާރު ޖޭ ގެ މައްޗަށް ”ޓީނޭޖް“ އުމުރުގެ 30 ކުއްޖަކު ”ވާވައްދާ“ ޖަރީމާތައް ހިންގުވާފައިވާކަމުގެ ދައުވާ އުފުލާފައި ވެއެވެ.މިޖަރީމާތައް އޭނާ ހިންގާފައިވަނީ 2021 ވަނަ އަހަރާ 2023 ވަނައަހަރާދެމެދު ކަމަށް ވެއެވެ. އޭނާވަނީ ނަފްސާނީ ގޮތުން ބަލިކަށިކަމަށް ފެންނަ ކުދިންނާ ސޯޝަލް މީޑިޔާގެ ޕްލެޓްފޯމްތަކުން ބައްދަލްކޮށް އޭނާގެ މައްޗަށް ލަންބުވާފައި ކަމަށް ވެއެވެ. އަދި މިގުޅުން ތަކުގެ ތެރޭން ”ޗައިލްޑް ފޮނޮގްރަފީ“ ނުވަތަ ކުޑަކުދިންގެ އޮރިޔާން ވީޑިއޯ ތައް ހަދާކަމަށް ވެއެވެ. އަދި ބައެއް ހާލަތްތަކުގައި އޭނާގެ މަޅީގައި ރަގަޅަށް ޖެހޭ ކުދިން އަމިއްލަޔަށް މަރުވާ ހިސާބަށް ލޯބީގެ ކުޅިގަނޑު ގެންދެއެވެ.އަދި މިކަން ރެކޯޑް ކުރާކަމަށް ވެއެވެ.

ޕްރޮސެކިއުޓަރުން ވަނީ އޭނާގެ މައްޗަށް އެއް މަރު، އަދި 5 ”އެޓެމްޓަޑް މާޑަރ“ އަށް ދައުވާ ކޮށްފައެވެ. މިހުރިހާކަމެއްވެސް ކޮށްފައިވަނީ އޮންލައިން ކޮންނެވެ. ކުދިންލައްވާ ޖަރީމާތައް ހިންގަނީ އެތައް ބަޔަކު ބަލަން ތިއްބާ ކަމަށް ވެއެވެ. އަދި މިކަންތައް އަމިއްލަ ހަށިގަނޑަށް އަނިޔާވާ ހަމަޔަށް ވެސް މައްޗަށް ގެންދެއެވެ.

ޖަރމަނީގެ މީޑިޔާ ރިޕޯޓްތައް ބުނާގޮތުން މަރުވި، އެމެރިކާއަށް ނިސްބަތްވާ 13 އަހަރުގެ ފިރިހެން ކުއްޖާ މަރުވެފައިވަނީ ”ރިއަލް ޓައިމް“ ކޮށެވެ. ނުވަތަ ލައިވް ކޮށް ވީޑިއޯ ސްޓްރީމް ކުރަމުންނެވެ. އޭނާގެ އަމަލުތަކުގެ ސަބަބުން ކެނެޑާ އަށް ނިސްބަތްވާ 14 އަހަރުގެ އަންހެން ކުއްޖަކުވެސް އަމިއްލަޔަށް މަރުވާން އުޅުނު ކަމަށް ވެއެވެ.