ބައެއް ބްރޭންޑް ތަކުގެ ސްމާޓް އަތުކުރީގަޑީގައި މަތީދަރަޖައަކަށް ވިހަ ކެމިކަލް އެއްކަމަށްވާ ”ޕީފާސް“ އެކުލެވޭކަން ފަހުގެ ސްޓަޑީ އަކުން ހާމަވެއްޖެއެވެ. މިސްޓަޑީ ހެދި ރިސާޗް ޓީމުން ވަނީ ތަފާތު ބްރޭންޑްތަކުގެ އަދި އެކި އަގުގެ ސްމާޓް އަތުކުރީ ގަޑީގެ 22 ކަމަރަކުން މި ކެމިކަލް ދެނެގަނެފައެވެ.

ޕީފާސް ކެމިކަލް އެކުލެވޭ ގަޑީގެ ކަމަރުން ހަށިގަޑުގެ ތެރެޔަށް ކެމިކަލް ވަދެއެވެ. ޚާއްސަކޮން ދާހިއްލާ ވަގުތު ތަކުގައި އެކަމުގެ ނުރައްކާ ބޮޑުކަމަށް ރިސާޗަރުން ބުނެއެވެ. އެހެން ނަމަވެސް ދެރަކަމަކީ މިފަދަ ގިނަ ގަޑިތަކަކީ ސްޕޯޓްސް އަދި ފިޓްނަސްގައިވެސް ބޭނުން ކުރެވޭނެ ކަމަށް ބުނެ އިސްތިހާރު ކުރެވޭ ބްރޭންޑް ތައް ކަމަށް ވާކަމެވެ.
ޕީފާސް އަކީ ވެއްޓަށް އަންނަ ބަދަލުތަކުގެ ސަބަބުންވެސް ނެތިފަނާވާ ކެމިކަލް އެއްނޫނެވެ. އެކެމިކަލް އަށް ”ފޮއެވަރ ކެމިކަލް“ ކިޔުނީވެސް މިހެން ވެގެންނެވެ.
ޕީފާސްއަކީ އިންސާނުން އުފައްދާގައިވާ ކެމިކަލްގެ ގްރޫޕް އެކެވެ.މިފަދަ ކެމިކަލް ތަކަކީ ފެނުން، ތެލުން، ފިނިހޫނުމިނަށް އަންނަ ބަދަލުތަކުން،އަސަރު ނުކުރާ ކެމިކަލް ތަކެކެވެ. އެހެން ކަމުން މިފަދަ ކެމިކަލްތައް އާންމުކޮށް ވިއްސާރަ ކޯޓު، ތަތްނުލަވާ ތެލި،ކާޕެޓް ،ގޮދަޑި ،ފުޑް-ރެޕް ފަދަ އެއްޗެތި އުފެއްދުމުގައި މިކެމިކަލްތައް ބޭނުން ކުރެއެވެ.
ބައެއްވައްތަރުގެ ޕީފާސް ކެމިކަލް ތަކުން ސިއްހަތަށް ބޮޑެތި ގެއްލުން ލިބޭކަން ވަނީ ހާމަވެފައެވެ. މިގޮތުން ލިވަރ ފެއިލްވުމާއި ކޮލެސްޓްރޯލް އަށް އަސަރު ކުރުމާއި ،އިމިއުން ސިސްޓަމަށް ގެއްލުން ލިބުމާއި، ކުދިންގެ ހެދިބޮޑުވުމަށް ހުރަސްތައް ކުރިމަތިވުމާއި އަދި ކެންސަރ ޖެހުމުގެ ފުރުސަތު ވަރަށް ބޮޑު ކޮށްދޭ ކަމަށް ވެއެވެ.ޕީފާސް ކެމިކަލް ބިމުގެ ފެން ފަށަލަ އަށް އަދި ވެލިގަނޑަށް ގިނަ އަދަދަކަށް އަޅައިފިނަމަ އިންސާނުންގެ ދިރިތިބުމަށް ވަރަށް ނުރައްކާވާނެ ކަމަށް ވެއެވެ.
ޕީފާސް އެކުލެވޭ ކަމަރުލާފައިވާ ސްމާޓް ގަޑިތައް ގެންގުޅޭ ފަރާތްތަކުން ކަމަރުތައް ބަދަލު ކުރަން ރިސަރޗް ޓީމުން ނަސޭހަތް ތެރި ވެފައި ވެއެވެ. މިހާތަނަށް މިފަދަ ކަމަރުތައް އެކުލެވޭ ސްމާޓް ގަޑި ވިއްކާފައިވާ ބްރޭންޑް ތަކުގެ ތެރޭގައި އެޕަލް، ސެމްސަންގ،އަދި ހުއާވޭ ވެސް ހިމެނެއެވެ. މިބްރޭންޑް ތަކުން ޕީފާސް އެކުލެވޭ ކަމަރު ބޭނުން ކުރަނީ ގިނަ ދުވަހު ގެންގުޅެވޭނެ ކަމަށް ބުނެއެވެ.
ރިސާޗަރުން ގެންދަނީ ޕީފާސް ކެމިކަލްއާބެހޭ އިތުރު ދިރާސާ ތައް ހެދުމަށް ސައިންޓިފިކް ކޮމިޔުނިޓީ އަށް ގޮވާލަމުންނެވެ.