ތިމާގެ ހައްޤުތައް ލިބެން އެދޭ ފަދައިން އެހެން މީހުންގެ ހައްޤުތައް ލިބިދެވޭތޯ ފުރިހަމަ މުސްލިމުން ބަލާނެ ކަމަށް މިއަދުގެ ޚުތުބާގައި ބުނެފިއެވެ.
މިއަދުގެ ޚުޠުބާ ހާއްސަކޮށްފައި ވަނީ ”ޒިންމާދާރުވުމާއި މަސްއޫލިއްޔަތު އުފުލުން“ މި މައުޟޫއުގެ މައްޗަށެވެ.
ޚުތުބާގައި ބުނީ ކަންކަން ކުރުމުގައި ރައްޔިތުންގެ ހައްޤުތަކަށާއި ޤައުމީ މަސްލަހަތަށް އިސްކަންދޭން ޖެހޭނެ ކަމަށެވެ. ކޮންމެ މަސްއޫލިއްޔަތަކީ، މާތް ﷲ އެ ފަރާތަކާ ހަވާލުކުރައްވާފައިވާ ވަރަށް ބޮޑު އަމާނާތެއް ކަމަށާއި ދުނިޔެމަތީގައި އިންސާނާއާ ހަވާލުކޮށްފައިވާ ޒިންމާތަކާއި މަސްއޫލިއްޔަތުތައް އަދާކުރީ ކިހިނެއްތޯ ޤިޔާމަތްދުވަހުން ސުވާލު ކުރެވޭނެ ކަމަށާއި އެދުވަހުން އެއްވެސް ބަހަނާއެއް ނުދެއްކޭނެ ކަމަށެވެ.
ފުރިހަމަ މުސްލިމުންނަކީ ތިމާގެ އަމިއްލަ ފައިދާއާއި މަސްލަހަތަށް ވުރެ ބޮޑަށް، އަނެކުންގެ މަސްލަހަތަށް އިސްކަންދީ އަނެކުންނަށްޓަކައި ތިމާ އަދާކޮށްދޭން ޖެހޭ ވާޖިބަށް އިސްކަންދޭ މީހުން ކަމަށް ޚުތުބާގައި ބުނެފައި ވެއެވެ.
މީގެ އިތުރުން ރައްޔިތުން އަހަރެމެންނާ ޙަވާލު ކޮށްފައިވާ އެންމެހައި މަސްއޫލިއްޔަތުތަކަކީ ބޮޑުވެގެންވާ އަމާނާތެއް ކަމަށާއި އެހެންކަމުން އެ އަމާނާތްތައް އަދާކުރުމުގައި ފަރުވާކުޑަކޮށް، ފަރުދުންނާއި މުޖުތަމަޢުގެ މަޞްލަޙަތަށް އިސްކަން ނުދޭ ނަމަ، އެއީ ތިމާގެ ދީނާއި ޤައުމަށް ވެވޭ ބޮޑު ޚިޔާނާތެއް ކަމަށް ޚުތުބާގައި ވިދާޅުވެފައި ވެއެވެ.
