ހޫތީންނާ ދެކޮޅަށް ސައޫދީ އެރޭބިޔާގެ ލަޝްކަރުތަކުން އެތައް އަހަރެއް ވާންދެން ހަނގުރާމަ ކުރުވާފައި ވަނީ ބައްޕާފުޅު ރަސްގެފާނު ސަލްމާން ބިން އަބްދުލް އަޒީޒުގެ ރިޔާސީ ގަރާރުގައި ބައްޕާފުޅުގެ ސޮއި ވަލީއަހްދު މުޙަންމަދު ވަގަށް ފޯޖުކޮށްގެން ކަމަށް ސައޫދީ އެރޭބިޔާގެ ކުރީގެ އޮފިޝަލަކު ތުހުމަތު ކޮށްފައިވާ ކަމަށް ބީބީސީގެ މިއަދު މެންދުރުގެ ޚަބަރަށް ހަވާލާދީ އެސޯޝިއޭޓެޑް ޕްރެސް ދުބާއި އިން ރިޕޯރޓް ކޮށްފިއެވެ. އެތައް އަހަރަކަށްފަހު އެ ހަނގުރާމައިން ސައޫދީ އެރޭބިޔާގެ ލަޝްކަރުތައް ނިކުތީ އެއްވެސް ކާމިޔާބެއް ނުލިބިއެވެ. 

ސާދު އަލް ޖަބްރީ މިއަދު ބީބީސީ އަށް ދިން ބަސްދީ ގަތުމުގައި އޭނާގެ ވާހަކަތައް ސާބިތުކުރަން ހެކި ހުށައަޅާފައިނުވެއެވެ. އަލް ޖަބްރީއަކީ ކުރިން ސައޫދީ އެރޭބިޔާގެ އިންޓެލިޖެންސް އޮފިސަރެކެވެ.  އޭނާ މިހާރު ދިރިއުޅެމުން ގެންދަނީ އަމިއްލަ އަށް އަރުވާލެވިގެން ކެނެޑާގައެވެ. އެތައް އަހަރެއް ކުރިން އޭނާ ދެއްކި އެވާހަކަތަކާއި ގުޅިގެން އޭނާ އަނަބުރާ ސައޫދީ އެރޭބިޔާއަށް ގެނައުމަށްޓަކައި އޭނާގެ 2 ދަރިން ތިބީ ސައޫދީގައި ޖަލުގައި ބަންދުކޮށްފައެވެ. 

ސާދު އަލްޖަބްރީ ބީ ބީ ސީއަށް ކިޔާދިން ވާހަކަތަކާގުޅޭގޮތުން މިހާތަނަށް ސައޫދީގެ ބަހެއް ނުލިބެއެވެ.

ވަލީ އަހްދު މުހަންމަދުގެ މައްޗަށް މި ތުހުމަތުތައް ކުރެވެމުން މިދަނީ މިހާރަކަށް އައިސް އުމުރުން 88 އަހަރުގެ ބައްޕާޕުޅުގެ ބަދަލުގައި ސަރުކާރު ހިންގުމާއި އަދި ބޭރު ގައުމުތަކުގެ މެހެމާނުންނާވެސް އެ މަނިކުފާނު ބައްދަލު ކުރައްވަމުންގެންދަވާ ދުވަސްވަރެއްގައެވެ. މުހަންމަދު ބިން ސަލްމާނުގެ ބާރުގަދަ އަމިއްލަ ވަންތަ ގޮތް 2015 ގައި ޔަމަނާ ދެކޮޅަށްކުރި ހަނގުރާމައިގާ ބައިވެރި ވުމާއި އަދި އެމަނިކުފާނަށް ޗެލެންޖް ކޮށްފާނެ ކޮންމެ މީހަކަށް އަމާޒު ކުރެވިގެން ދިޔަތަން ފެނުނެވެ. 

ވަލީއަހްދު މުޙަންމަދު ބިން ސަލްމާނަކީ އުމުރުން 20 ގެ އަހަރުގެ ޒުވާން އުމުރު ފުޅުގައިވެސްވަރަށް ގޮތް ދޫ ނުކުރައްވާ ހަރުކަށި މިޒާޖެއްގެ ބޭފުޅެއްކަން ފާހަގަ ކުރެވިފައިވާކަން ބީ ބީ ސީ ގެ ރިޕޯރޓުގައި ބުނެފައިވެއެވެ. ސައޫދީގެ ކޯޓަކުން މިލްކިއްޔާތާބެހޭ މައްސަލައެއްގައި މުހަންމަދާ ދެކޮޅަށް ފައިސަލާކުރުމުން އެ ފަނޑަޔާރަށް ޕޯސްޓް މެދުވެރިކޮށް ފިސްތޯލައެއްގެ ވަޒަނެއް ފޮނުއްވިކަމަށް ވެއެވެ. އެ ހާދިސާއާއި ގުޅިގެން އެމަނިކުފާނަށް އަބޫ ރަސާސާ ނުވަތަ “ ފާދަރ އޮފް ދަ ބްލެޓް “ ވަނަމަކަށް ކިޔާއުޅުނުކަމަށް ވެއެވެ.

އަލް ޖަބްރީ ބީ ބީ ސީ ގައި ދެއްކި ވާހަކައިގާ އޭނާގެ ވާހަކަތަކަކީ އިތުބާރު ކުރެވޭ އަދި  އޮޅުވާލުމެއް ނެތް ވާހަކަތަކެއް ކަމަށާއި ޔަމަނުގެ ހޫތީންނާ ދެކޮޅަށް ހަނގުރާމަ ކުރުމުގެ ޝާހީ ގަރާރުގައި ބައްޕާފުޅުގެ ބަދަލުގައި މުޙަންމަދު ސޮއި ކުރެއްވިކަން ސައޫދީ ދާޚިލީ ވުޒާރާގެ އޮފިޝަލުންވެސް އޭނާއަށް ކަށަވަރުކޮށްދީފައިވާ ކަމަށް ބުނެފައިވެއެވެ. 

ސާދު އަލްޖަބްރީއަކީ ސައޫދީ އެރޭބިޔާގެ ސެކިއުރިޓީގައި އޮފިޝަލަކަށް އުޅުނު އިރު ސީ އައި އޭ އަދި އެމް – 16 ގެ އިސްވެރިންނާ ވަރަށް ކައިރިން މަސައްކަތްކުރި މީހެކެވެ.

“ އެއްގަމު މަގުން ޔަމަނަށް އަރާގަންނަން ޝާހީ ގަރާރެއް ނެރުމުން އަހަރެމެންތިބީ ހައިރާން ވެފައެވެ. އެ ޝާހީ ގަރާރުގައި މުހަންމަދު އޮތީ ބައްޕާފުޅުގެ ސޮއި ފޯޖް ކޮށްފައެވެ. އޭރު ރަސްގެފާނުގެ ސިއްހީ ހާލުކޮޅުވެސް ރަނގަޅެއް ނޫނެވެ. “ ބީ ބީ ސީ އަށް އަލްޖަބްރީ ކިޔާދިނެވެ. 

އަލް ޖަބްރީގެ އެމެރިކާއަށް ނިސްބަތްކުރެވޭ ގާނޫނީ ވަކީލުގެ ފާރާތުންވެސް  އެވާހަކަތަކާގުޅޭ ގޮތުން މިހާތަނަށް ޖަވާބެއް ނުލިބެއެވެ. 

ހޫތީންނާ ދެކޮޅަށް ސައޫދީ އެރޭބިޔާއިން ހަނގުރާމައިގާ ބައިވެރިވީ ކުޑަދުވަސްކޮޅެއްގެ ތެރޭގައި ހަނގުރާމަ ނިންމާލާނެ ކަމަށް ވަލީ އަހްދު ކުރެއްވި ވައުދާ އެކުގައެވެ. އެދުވަސްވަރު ވަލީ އަހްދު މުހަންމަދަކީ ސައޫދީ އެރޭބިޔާގެ ދިފާއީ ވަޒީރު ވެސް މެއެވެ.

ސައޫދީ އެރޭބިޔާއިން ހޫތީންނާ ދެކޮޅަށްކުރި ދިހަވަރަކަށް އަހަރުގެ ހަނގުރާމަ ވެގެންދިޔައީ ދުނިޔޭގައި މިފަހަކަށް އައިސް އެންމެ ގިނަ އިންސާނުން ހާލުގައި ޖައްސައި ދޮޅު ލައްކައަށްވުރެން ގިނަ މީހުން މަރާލެވުނު ހަނގުރާމަކަމަށެވެ.

އެމެރިކާގެ ރުހުމާއި އިތުބާރު ލިބިފައިވި ސައޫދީ އެރޭބިޔާގެ ކުރީގެ ވަލީ އަހްދު މުހަންމަދު ބިން ނާއިފް އާއިއެކު ވަރަށް ގާތުން މަސައްކުރުމުގެ ފުރުސަތުވެސް އަލްޖަބްރީއަށް ވަނީ ލިބިފައެވެ.

2017 ގައި ކިންގް ސަލްމާނު އޭނާގެ ފިރިހެންދަރިފުޅު މުހަންމަދަށް ވަލީ އަހްދުގެ މަގާމު ދިނުމަށްފަހު ކުރީގެ ވަލީއަހްދު މުހަންމަދު ނާއިފް ގޭ ބަންދުގައި ބެހެއްޓެވީ ކަމަށް އެދުވަސްވަރު ވާހަކަދެކެވުނެވެ.

ގައުމުން ބޭރުގައި ހުންނައިރުވެސް ވަލީއަހްދު މުހަންމަދު އޭނާ މަރާލަން މަސައްކަތް ކުރައްވާފާނެ ކަމަށް ބެލެވޭތީ އަލްޖަބްރީ މިހާރު ވަނީ އެމެރިކާގެ ފެޑެރަލް ކޯޓަށް އެ މައްސަލަ ހުށައަޅާފައެވެ. 

ބީބީސީ ގައި ވާހަކަދައްކަމުން އަލްޖަބްރީ އިތުރަށް ބުނެފައިވަނީ ޒަހަރު އެކުލެވިފައިވާ އަނގޮޓީއެއް ބޭނުންކުރައްވައިގެން ކުރީގެ ރަސްގެފާނު އަބްދުﷲ އަވަހާރަކޮށްލުމުގެ ވިސްނުމެއްވެސް ވަލީ އަހްދު މުހަންމަދު ގެންގުޅުއްވިކަން އެނގިފައިވާ ކަމަށެވެ. އަދި 2021 ގައި ސީ ބީ އެސް ނިއުސް އަށް އެނާ އެވާހަކަތައް ކިޔާދީފައިވާނެ ކަމަށެވެ. 

އަލްޖަބްރީގެ ވާހަކަ ނިންމާލަމުން ބުނެފައިވަނީ އޭނާގެ ފުރާނައަށް މިހާރުވެސް ނުރައްކާ ވަރަށް ބޮޑުކަމަށާއި ކޮންމެ ގޮތެއް ހަދާފައިވެސް ވަލީ އަހްދު  މުހަންމަދު“ އަހަރެން މަރާލާނެކަން އެނގޭ ކަމަށެވެ ”