ނިއުކްލިއަރ ގޮތުން ހުރި އާރާއި ބާރު ދައްކައިގެން އެމެރިކާއިން ބޭނުންވަނީ ދުބިޔޭގެ އެހެންގައުމުތަކަށް ބިރުދައްކަން ކަމަށް ޗައިނާގެ ދިފާޢީ ވުޒާރާއިން ބުނެފިއެވެ.
ނޫސްވެރިންނާއި ވާހަކަދައްކަމުން ޗައިނާގެ ދިފާޢީ ވުޒާރާގެ ތަރުޖަމާނު ޒޭންގް ޒިއާއޮގަންގް ބުނީ ގައުމަކަށް ނިއުކްލިއަރ ހަމަލާއެއް ދީފާނެކަމުގެ އެންމެ ބޮޑު ބިރެއް އޮތީ އެމެރިކާގެ ފަރާތުން ކަމަށެވެ.
މިގޮތުން، ޗައިނާއިން އިތުރަށް ބުނެފައިވަނީ ބާރުގައި ދެމިތިބުމުގެ ވިސްނުމެއްގައި ތިބެ އެމެރިކާއިން “ޒިންމާދާރުކަންކުޑަ ނިންމުންތަކެއް” ނިންމަމުންގެންދާ ކަމަށާއި، އޭގެތެރޭގައި ބައިނަލްއަޤްވާމީ ދުނިޔެއަށް ނިއުކްލިއަރ ހަތިޔާރުގެ ބިރުދެއްކުން ހިމެނޭކަމަށެވެ.
ޗައިނާއިން މިހެން ބުނެފައިވަނީ، ޔޫއެސް ފޯސަސް ޖަޕާން ގުޅުވާލުމަށްފަހު ހާއްސަ ހެޑްކުއާޓަރެއް ހަދައި، ތިން-ތަރި އަރާފައިވާ އޮފިސަރެއްގެ ކޮމާންޑުގެ ދަށުން ހިންގުމަށް ޕެންޓަގަން އިން ނިންމި ނިންމުމާއި ގުޅިގެންނެވެ.
