ރަޝިއާގައި ގޫގްލްއާއި، އެންޑްރޮއިޑް އޮޕަރޭޓިންގް ސިސްޓަމުގެ އިތުރުން އެޕަލްގެ އައިއޯއެސްވެސް ބޭނުން ނުކުރެވޭގޮތަށް ބްލޮކްކުރުމަށް ތައްޔާރުވަމުން އަންނަކަން އެގައުމުގެ ޕާލިމެންޓް މެންބަރެއްކަމަށްވާ އެލެކްސެއީ ޑިޑެންކޯ ހާމަކޮށްފިއެވެ.
ޔޫޓިއުބްފަދަ ޚިދުމަތްތަކަށް ބަރޯސާ ނުވުމުނަށް އާންމުންނަށް ނަސޭޙަތްތެރިވަމުން ޑިޑެންކޯ ބުނެފައިވަނީ “ވަރަށް އަވަހަށް ގޫގްލް ބްލޮކްކޮށްލެވޭނެ” ކަމަށެވެ. އަދި އޭގެއިތުރުން، “ގޫގްލް އެންޑްރޮއިޑާއި އައިއޯއެސްވެސް ބޭނުންކުރުން ހުއްޓުވާނެ” ކަމަށާއި މިކަން ކުރާނީ އެއްބުރުން ނޫންކަމަށް އޭނާ ބުނެފައިވެއެވެ.
ގަބޫލުކުރެވޭ ގޮތުގައި، މިއީ ޗައިނާއާއި ރަޝިއާއާއި، އިރާނުން ގުޅިގެން އިޒްރޭލާއި އެމެރިކާއަށް ގޮންޖަހާލުމުގެ ގޮތުން ކުރާ މަސައްކަތްތަކުގެ ތެރެއިން ކުރާ ކަމެކެވެ. އެގޮތުން، މި އެމެރިކާ ކުންފުނިތަކުން އެއްކުރާ ޖިއޯ ޓްރެކިންގް މައުލޫމާތު ސީއައިއޭއާއި މޮސްއަދް ފަދަ ޖާސޫސީ ވުޒާރާތަކާއި ހިއްސާކުރާކަމަށް އެގައުމުތަކުން ގަބޫލުކުރާއިރު، މިކުންފުނިތަކުގެ ސަބަބުން ރަޝިއާއާއި ރަޝިއާގެ ބައިވެރިންގެ ގައުމީ ސަލާމަތަށް ނުރައްކާވެދާނެ ކަމުގެ ބިރުވަނީ އުފެދިފައެވެ.
