އިސްރާއީލުން ޣައްޒާގައި ހިންގަމުންދާ ހަނގުރާމައާއި ގުޅިގެން އިސްރާއީލާއި ގުޅުންބާއްވާ ޝިޕިންގް ކުންފުނިތަކާއި ދެކޮޅަށް އަޅާނެ ފިޔަވަޅުތަކެއް ނިންމައި މެލޭޝިއާއިން އެކަން އިއުލާނުކޮށްފިއެވެ.
އެގޮތުން، މެލޭޝިއާއިން ވަނީ އިސްރާއީލުގެ ”ޒިމް“ ޝިޕިންގް ކުންފުނީގެ ބޯޓުތައް އެގައުމުގައި ބަނދަރުކުރުން މަނާކޮށް، މީގެ ހަތަރު ހަފްތާ ފަހުން އެނިންމުމަށް އަމަލުކުރަން ފަށާނެކަން އަންގާފައެވެ.
މީގެއިތުރުން، މެލޭޝިއާގެ ސަރުކާރުން ބުނެފައިވާގޮތުގައި، އިސްރާއީލުގެ ދިދައިގެ ދަށުން ދަތުރުކުރާ އެއްވެސް ބޯޓަކަށް އެގައުމުގެ ބަނދަރުން ޖާގައެއް ނުލިބޭނެއެވެ.
އަދި އިސްރާއީލުން އަންނަ ބޯޓު ފަހަރާއި، އިސްރާއީލަށް ދަތުރުކުރާ އުޅަނދުތަކަށްވެސް ބަނދަރުކުރުމުގެ ފުރުސަތު ނުދޭނެކަން މެލޭޝިއާއިން ވަނީ އަންގާފައެވެ.
