ފަތުރުވެރިކަން ޕްރޮމޯޓްކުރުމުގެ މަޤްޞަދުގައި ވިސާއާއި ނުލައި 33 ގައުމެއްގެ ރައްޔިތުންނަށް އިރާނަށް ދަތުރުކުރެވޭގޮތް ހަދައިފިއެވެ.
އިރާނުގެ ފަތުރުވެރިކަމާއި ބެހޭ ވުޒާރާއާއި ހަވާލާދީ އިރާނިއަން ސްޓޫޑެންޓްސް ނިއުސް އޭޖެންސީއިން ރިޕޯޓުކޮށްފައިވަނީ، އެކި އެކި ގައުމުތަކާއެކު ގުޅުން ބަދަހިކުރުމަށް އިރާނުން އޮތް ޝައުގުވެރިކަން ދައްކައިދެވޭނީ ”އޯޕަން-ޑޯ ޕޮލިސީ“ އަކަށް އަމަލުކުރަން ފެށިގެންކަމަށެވެ.
މިނިންމުމާއެކު، ވިސާއާއިނުލާ އިރާނަށް ދަތުރުކުރެވޭ ގައުމުތަކުގެ އަދަދު 45 އަށް ވަނީ އަރާފައެވެ.
މިގޮތުން، ވިސާނުލައި އިރާނަށް ދަތުރުކުރެވޭ ގޮތަށް ހަމަޖެއްސީ ރަޝިއާ، ޔޫއޭއީ، ސައުދީ އަރަބިއާ، ބްރެޒިލް، މޮރިޝަސް، ސެޝެލްސް، ޖަޕާން، ބޮސްނިއާ، ޓެންޒޭނިއާ، ވިއެޓްނާމް ހިމެނޭގޮތަށް 33 ގައުމަކާއި ބައިނަލްއަޤްވާމީ ސަރަހައްދުތަކުގެ ރައްޔިތުންނަށެވެ.
މީގެތެރޭގައި ސައުދީ އަރަބިއާވެސް ހިމެނެއެވެ. އަދި ގަލްފުގައި ތެޔޮ ވިޔަފާރީގެ ވާދެވެރީންގެ ގޮތުގައި އޮވެ، ގުޅުންތައް ހީނަރުވެފައިވާ އިރާނާއި ސައުދީ އަރަބިއާގެ ދެމެދުގައި އުފެދިފައި އޮތް ނުތަނަވަސްކަމަށްވެސް، މިކަމުގެ ސަބަބުން ރާހަތެއް ލިބޭނެކަމަށް އައިއެސްއެންއޭއިން ރިޕޯޓުކޮށްފައިވެއެވެ. އިރާނާއި ސައުދީ އަރަބިއާގެ ޑިޕްލޮމެޓިކް ގުޅުންތައް 2016 ވަނަ އަހަރު ނިމުމަކަށް އައުމަށްފަހު، ޗައިނާއިން އިސްނަގައިގެން ކުރިއަށް ގެންދިޔަ ސުލްހައިގެ މަޝްވަރާތަކެއްގެ ނިވަލުގައި އިރާނާއި ސައުދީއަރަބީއާ އިން ގުޅުން ބަދަހިކުރުމަށް އެއްބަސްވެފައިވަނީ ނިމިދިޔަ މާރޗު މަހުގެތެރޭގައެވެ.
8 އަހަރުގެ މެދުކެނޑުމަކަށްފަހު، ސައުދީ އަރަބިއާއަށް ހައްޖާއި އުމުރާގެ އަޅުކަން ފުރިހަމަކުރުމަށްޓަކައި އިރާނުގެ ރައްޔިތުންނަށް ދަތުރުކުރަން ފެށޭނެކަމަށް އެގައުމުން އަންގާފައިވަނީ މިއަހަރުގެ ޑިސެމްބަރު މަހުގެ 19 ވަނަ ދުވަހުގެ ފަހުންނެވެ.
