އަންނަ އަހަރު ބާއްވަން ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ޕީޕީއެމް ޕީއެންސީ ޓިކެޓްގައި ވާދަކުރާ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީ އަނެއްކާވެސް ފަސްކޮށްފިއެވެ.

އެގޮތުން މިރޭ ޕީޕީއެމުން ނެރުނު ބަޔާނެއްގައި ބުނީ އެ ޕާޓީގެ ފަރާތުން މަޖިލިސް އިންތިޚާބުގެ ޕްރައިމަރީގައި ވާދަކުރާ ފަރާތްތަކުގެ މެދުގައި ބާއްވަން ހަމަޖެހިފައިވާ ޕްރައިމަރީ އަންނަ ޖެނުއަރީ މަހުގެ 20 އަށް ފަސްކޮށްފައިވާ ކަމަށެވެ.

އެ ޕާޓީގެ މަޖިލިސް ޕްރައިމަރީ އެންމެ ފުރަތަމަ ބާއްވަން ނިންމީވެސް  ޖެނުއަރީ 20 ވަނަ ދުވަހު އެވެ. ނަމަވެސް ފަހުން އެ ޕާޓީން ބުނީ މަޖިލިސް ޕްރައިމަރީ މި މަހުގެ 23 ވަނަ ދުވަހު ބާއްވަން ނިންމާފައިވާ ކަމަށެވެ. އަނެއްކާވެސް އެ ޕާޓީގެ ނިންމުން ބަދަލުކޮށް މިރޭ ނެރުނު ބަޔާނުގައި ބުނީ ޕްރައިމަރީ ފަސްކުރީ ޕްރައިމަރީ ބާއްވަން ނިންމާފައިވާ ތާރީހަކީ ސްކޫލް ބަންދު ދުވަސްވަރަށް ވެފައި، ގިނަ އަދަދެއްގެ ރައްޔިތުން އެކިއެކި ބޭނުމަށާއި، އުމްރާއަށް ޤައުމުން ބޭރަށް ދަތުރު ކުރުމަށް ހަމަޖެހިފައިވާތީ، ޕްރައިމަރީގައި ވާދަކުރާ ކެންޑިޑޭޓުންގެ ތެރެއިން ގިނަ ކެންޑިޑޭޓުންނާއި ކޯލިޝަންގެ އާންމު މެންބަރުންގެ އެދުމުގެ މަތިން ކަމަށެވެ.

ހަމަ އެހެންމެ ޕްރައިމަރީގައި ވޯޓު ލެވޭ މީހުންގެ ލިސްޓާއި ވޯޓު ނެގުން ކުރިއަށް ގެންދިއުމަށް ހަމަޖެހިފައިވާ ވަގުތުވެސް އާންމުކޮށް އިއުލާނު ކުރާނެ ކަމަށްވެސް އެ ބަޔާނުގައި ބުނެފައި ވެއެވެ.

މީގެ އިތުރުން ޕްރައިމަރީގައި ވާދަކުރުމަށް ހުށަހަޅާފައިވާ ކެންޑިޑޭޓުންގެ ތެރެއިން ޝަރުތު ހަމަވާކަން ބެލުމަށްފަހު ކެންޑިޑޭޓުން ތަރުތީބު ކުރެވިފައިވާ ގޮތާއި، ކެންޑިޑޭޓުންގެ ނަންތައް ކުރިއަށް އޮތް ހަފްތާ ތެރޭގައި އާންމު ކުރާނެ ކަމަށްވެސް ޕީޕީއެމް ޕީއެންސީގެ ބަޔާނުގައި ބުނެފައި ވެއެވެ.