ވެރިކަމާ ހަވާލުވެވަޑައިގަތުމަށް އިންތިޚާބީ ރައީސް ޑރ.މުޙައްމަދު މުޢިއްޒު މިއަދު މާލޭ ސިޓީގެ މޭޔަރުގެ މަގާމުން އިސްތިއުފާ ދެއްވައިފިއެވެ.
މާލެ ސިޓީގެ މޭޔަރުކަމުން އިސްތިއުފާ ދެއްވިކަން ހާމަކުރައްވައި އެކްސްގައި ކުރެއްވި ޕޯސްޓެއްގައި ޑރ.މުޢިއްޒު ވިދާޅުވީ މި ފުރުސަތުގައި މާލެ ސިޓީ ކައުންސިލުގެ އެންމެހާ ކައުންސިލަރުންނާއި، ވެރިންނާއި، މުވައްޒަފުން އެމަނިކުފާނަށް ދެއްވި ފުރިހަމަ އެއްބާރުލެއްވުމަށާއި، ކުރެއްވި ބުރަ މަސައްކަތްޕުޅަށް ނުހަނު އިޚްލާސްތެރިކަމާއެކު ޝުކުރު އަދާކުރައްވާ ކަމަށެވެ.
“އަދި މާލެ ސިޓީގެ ލޮބުވެތި ރައްޔިތުން އަޅުގަނޑު މޭޔަރ ކަމަށް ހޮވުމަށް ކުރެއްވި ތާއީދަށާއި، މޭޔަރު ކަމުގައި ޚިދުމަތް ކުރުމުގައި ދެއްވި ތާއީދާއި އެއްބާރުލެއްވުމަށް ފަށްފަށުން ޝުކުރު ދަންނަވަން!“
މާލެ ސިޓީގެ ރައްޔިތުންގެ އުއްމީދުތައް ހާސިލު ކޮށްދިނުމުގައި ވަރުގަދަ އަޒުމުގައި މަސައްކަތްކޮށް އެ އުއްމީދުތައް ހަގީގަތަކަށް ހަދައިދެއްވާނެ ކަމަށް ޑރ.މުޢިއްޒު ވިދާޅުވިއެވެ.
