ރާއްޖޭގެ ކަނޑުގެ އަޑީގެ ސަރަހައްދުގެ ދިރާސާކުރުމުގެ މަސައްކަތް އެމްއެންޑީއެފްގެ ބެލެހެއްޓުމުގެ ދަށުން ކުރިއަށްގެންދިއުމަށް ރުހުން ހޯދުމަށް މަޖިލީހަށް ހުށަހަޅައިފިއެވެ.

ރާއްޖޭގެ ސަރަހައްދުތަކުގެ ހައިޑްރޯގްރަފިކް ސާވޭތައް ކޮށް މައުލޫމާތު އެއްކޮށް ބެލެހެއްޓުމަށް ރައީސުލްޖުމްހޫރިއްޔާ ”މޯލްޑިވްސް ހައިޑްރޯގްރަފިކް ސަރވިސް“ގެ ނަމުގައި އިދާރާއެއް އުފައްދާފައިވަނީ މިދިޔަ މަހުގެ 22 ވަނަ ދުވަހުއެވެ.

މި އިދާރާގެ މަސައްކަތްތަކުގެ ތެރޭގައި ދިވެހިރާއްޖޭގެ ސަރަހައްދުތަކުގެ ނިޔަމިކަމުގެ ޗާޓުތައް ކުރަހައި އަދާހަމަކޮށް އާންމުކުރުމާއި، ނޯޓިކަލް ޕަބްލިކޭޝަންތައް ޝާއިއުކޮށް އަދާހަމަކުރުން ހިމެނެއެވެ.

އަދި  ދިވެހިރާއްޖޭގެ ސަރަހައްދުތަކުގައި ކަނޑު ދަތުރުފަތުރު ކުރުމަށް ބޭނުންވާ ނިޔަމިކަމުގެ ސަލާމަތާއި ރައްކާތެރިކަމާބެހޭ މައުލޫމާތު ކަމާބެހޭ ފަރާތްތަކަށް ފޯރުކޮށްދިނުމާއި، ކަނޑައެޅިފައިވާ އުސޫލުތަކާ އެއްގޮތަށް އެފަދަ މައުލޫމާތު އާންމުކުރުންވެސް މި އިދާރާގެ މަސައްކަތްތަކުގެ ތެރޭގައި ހިމެނެއެވެ.

ހައިޑްރޯގްރަފިކް މަސައްކަތްތައް އެމްއެންޑީއެފްގެ ބެލުމުގެ ދަށަށް ގެންދަން މަޖިލީހަށް ހުށަހަޅާފައިވާއިރު އެކަމާ ގުޅޭގޮތުން މަޖިލިސް ރައީސް މުހައްމަދު ނަޝީދު ވިދާޅުވީ މިއީ ހައިޑްރޯގްރަފީގެ މަސައްކަތް ޑިފެންސް މިނިސްޓްރީގެ ދަށުގައި ބޭއްވުމަށް މިނިސްޓްރީއަށް ގެންނަން ހުށަހަޅުއްވާފައިވާ ބަދަލެއްކަމަށެވެ.

ރައީސް ނަޝީދު ވިދާޅުވީ މިހާރުގެ ޓެކްނޮލޮޖީއާއި ގުދުރަތީ ގޮތުން އަންނަމުންދާ ބަދަލުތަކާއިއެކު، ކަނޑުގެ ސަރަހައްދުގެ މައުލޫމާތު ފުރިހަމަކުރުމަކީ މިއަދު ރާއްޖެއަށް ކޮންމެހެން ބޭނުން ވެފައިވާ ކަމެއް ކަމަށެވެ.