ވެކްސިންގެ ދެ ޑޯޒް ޖަހާފައިވާ މީހުންނަށް 21 ފެބްރުއަރީން ފެށިގެން އޮސްޓްރޭލިއާއަށް ދަތުރު ކުރެވޭނެ ކަމަށް އެ ގައުމުގެ ބޮޑު ވަޒީރު ސްކޮޓް މޮރިސަން ހާމަކުރައްވައިފިއެވެ.
އޮސްޓްރޭލިޔާއަކީ ކޮރޯނާ ވައިރަސް އާ ގުޅިގެން ދަތުރު ފަތުރު ކުރުމުގެ އުސޫލުތަކަށް އެންމެ ބޮޑެތި އަދި ހަރުކަށި ބަދަލުތައް ގެނަސްފައިވާ އެއް ގައުމެވެ. އެ ގައުމުން ތަންފީޒުކުރަމުންދާ އުސޫލުތަކުގެ ދަށުން ގައުމުގެ ބޯޑަރުތައް ބަންދު ކުރިތާ މިހާރު ގާތްގަނޑަކަށް 2 އަހަރު ވަނީ ފާއިތުވެފައެވެ.
ކޮރޯނާ ވައިރަސް ޕެންޑެމިކުން ރައްކާތެރި ވުމަށްޓަކައި 2020ވަނަ އަހަރުގެ މާރިޗް މަހު އޮސްޓްރޭލިއާއިން ވަނީ އެ ގައުމުގެ ބޯޑަރުތައް ބަންދުކޮށްފައެވެ. އޮސްޓްރޭލިއާގެ ރައްޔިތުންނަށް ވަނީ އެ ގައުމުން ބޭރަށްދިޔުން މަނާކޮށްފައެވެ. ބޯޑަރު ބަންދު ކުރުމަށްފަހު އެ ގައުމަށް އެތެރެ ވެވިފައި ވަނީ ހާއްސަ ހުއްދައެއްގެ ދަށުން މަދު އަދަދެއްގެ މީހުންނަށެވެ.
މި ގަވާއިދުތަކުގެ ސަބަބުން އާއިލާތައް ވަކިވެ އެ ގައުމުގެ މަޝްހޫރު ޓުއަރިޒަމް އިންޑަސްޓްރީއަށް ވެސް ވަނީ ބޮޑެތި ދަތި ތަކާ ކުރިމަތިލާން ޖެހިފައެވެ. މިކަމާ ގިނަ އަދަދެއްގެ މީހުން ދަނީ ނުރުހުން ފާޅުކުރަމުންނެވެ.
2021 ވަނަ އަހަރު ކުރިޔަށް ގެންދިޔަ ވެކްސިން ޕްރޮގްރާމުގެ ފަހުން އޮސްޓްރޭލިއާއިން ވަނީ އެ ގައުމުގައި ތަންފީޒުކުރަމުންދާ ބައެއް ގަވާއިދުތަކަށް ލުއިތަކެއް ދީފައެވެ. އަދި ހޯމަ ދުވަހު ހާމަކޮށްފައިވާ މި އުސޫލުގެ ސަބަބުން ކޮވިޑުން ރައްކާތެރިވުމަށް އަޅާފައިވާ ފިޔަވަޅުތަކަށް އެއްކޮށްހެން ނިމުން އަންނާނެއެވެ.
ތަޖުރިބާކާރުން ހާމަކުރާގޮތުގައި އޮސްޓްރޭލިއާއިން ބޯޑަރުތައް ހުޅުވާލި ނަމަވެސް ގިނަ ދުވަސްތަކެއް ވަންދެން ބޯޑަރުތައް ބަންދުކޮށްފައި އޮތުމުގެ ސަބަބުން ބައެއް ދަތިތަކާ ކުރިމަތިލާން ޖެހޭނެއެވެ.
ކޮވިޑް-19 ޕޭންޑެމިކް ފެށުނު އިރުއްސުރެ އޮސްޓްރޭލިއާއިން އަންނަނީ ”ޒީރޯ ކޯވިޑް“ ޕޮލިސީއަކަށް އަމަލު ކުރަމުންނެވެ. މި އުސޫލުގެ ދަށުން ގިނަ އަދަދެއްގެ ލޮކްޑައުން ތަކެއްވެސް ވަނީ ކޮށްފައެވެ. ނަމަވެސް ވެކްސީން ޕްރޮގްރާމަށް ފަހު މި ޕޮލިސީއަށް އަމަލުކުރުން އެ ގައުމުން ވަނީ ހުއްޓާލާފައެވެ. މިހާތަނަށް އޯސްޓްރޭލިއާގެ %79 ރައްޔިތުން ވަނީ ވެކްސިން ޖަހާފައެވެ.
ހޯމަ ދުވަހު އެ ގައުމުން ކޯވިޑަށް ފައްސިވެފައި ވަނީ ޖުމުލަ 23،000 މީހުންނެވެ. އެއީ މި އަހަރު އޮސްޓްރޭލިއާއިން އެއްދުވަހެއްގެ މައްޗަށް އެންމެ މަދުން މީހުން ފައްސިވެފައިވާ އަދަދެވެ.
