މިއަދުގެ ތާރީޚަކީ (02022022) ވަރަށް ރީތި ތާރީޚެކެވެ. އެހެނަސް އެ ރީތި ތާރީޚުގެ ފަހަތުގައިފޮރުވިފައިވާކަމަށް އެސްޓްރޯލޮޖިސްޓުންނާއި ބައެއް ދީންތަކުގެ އަހުލުވެރިން ދެކޭގޮތް އެހާރީއްޗެއްނޫނެވެ. އުފާވެރިކަމުގެ ޚަބަރާއެކު ބިރުވެރި ކަމުގެ އިންޒާރުވެސް ގެންސް ދެއެވެ.
ކާއިނާތުގައި ލައްވާފައިވާ އެންމެހާ ބުރުޖުތަކާއި ނިޒާމުތަކަކީ ވަކި ތަރުތީބެއްގެ ދަށުން ކަނޑައެޅިފައިވާ މަންޒިލްތަކަކަށް ދަތުރުކުރަމުންދާ އެއްޗެހިތަކެއް ކަމުގައި ދަންނަބޭކަލުން ވިދާޅުވާތީ އެނގިފައި ވެއެވެ. އެ ތަކެތީގެ ދައުރުވުމާއި ގުޅިގެން އުފެދޭ ބައެއްކަންތައްތައް އަޅުގަނޑުމެންގެ ތެރޭގައިވެސް ގަބޫލުކުރެއެވެ. އޮއިވަރާއި ދިޔަވަރު އަދި މޫސުމަށް އަންނަ ބަދަލުތައްވެސް މީގެތެރޭގައި ހިމެނެއެވެ. އަދި ފަލަކީ އިލްމަށް ބިނާކުރެވޭ ގަބޫލުކުރުން ތައްވެސް ފާހަގަ ކުރެވެއެވެ.
މީގެ އިތުރުން އެހެންދީންތަކާއި މަޒްހަބުތަކުގެ އަހުލުވެރިން ގަބޫލުކުރާ ގިނަ ކަންތައްތަކެއްވެސް ހުރެއެވެ. އޭގެތެރޭގައި ކާއިނާތުގެ ނިޒާމުތަކާއި އިންސާނުންގެ ޙަޔާތާއި ގުޅުވައިގެން ގަބޫލުކުރާ ކަންތައްތަކެއްވެސް ހުރެއެވެ. އެހެންކަމުން މިލިއުމަކީ އެއްވެސް ސިފައެއްގައި ދީނީ ނަޒަރަކުން ވަކި ގަބޫލުކުރުމަކަށް ބާރު އެޅުމުގެ ގޮތުން ލިޔެފައިވާ ލިއުމެއް ނޫންކަން ކިއުންތެރިންނަށް ދަންނަވާލަން ބޭނުމެވެ.
2022 ފެބްރުއަރީ 1 ވަނަދުވަހު އުފަންވާ އެކްއާރިސް ގެ އާހުޅެވި ހަނދަކީ ދުނިޔެއަށް އަންނަން އޮތް ބޮޑެތި ބަދަލުތަކެއްގެ ފެށުން ކަމުގައިބުނެ ބައެއް މަޒްހަބުތަކުގެ ފަލްސަފާ ވެރިންނާއި އެސްޓްރޯލޮޖިސްޓުން ޚިޔާލުފާޅުކުރަމުން އެބަ ގެންދެއެވެ. އަދި އެއާ ގުޅުވައިގެން މިއަދުގެ ތާރީޚުގެ މައްޗަށްވެސް ބަލާލާފައި އެބަހުއްޓެވެ.
މިއަދުގެ ތާރީޚް ޚާއްސަގޮތެއްގައި ފާހަގަކުރެވެނީ ކީއްވެގެން ހެއްޔެވެ؟ ސަބަބަކީ 2000 ވަނައަހަރުގައި ފެށުނު 222 ގެ މައްޗަށް ތަރުތީބުކުރެވުނު ދުވަސްތަކުގެ އެންމެފަހުގެ 3 ދުވަސް މި ހިނގާ ފެބްރުއަރީ މަހުގެ 22 ވަނަ ދުވަހާހަޔަށް އައިސް ނިމޭތީއެވެ. އަދި ދެން އެގޮތަށް ތަރުތީބުވެގެން އެންމެފުރަތަމަ ދުވަހެއް އަންނާނީ 2/2/2222 ގައެވެ.
މީގައި އެސްޓްރޯލޮޖިސްޓުންނާއި ބައެއް ދީންތަކާއި އާދަކާދައިގެ އަހުލުވެރިން ފާހަގަކުރާ ކަންތައްތަކުގެ ތެރޭގައި ބުނެވޭގޮތުގައި 222 އަކީ މަލާއިކަތުންނާ ގުޅުންހުރި ނަމްބަރެކެވެ. އަދި 2 އަކީ ހަކަތައާއި ގުޅުންތައް އުފައްދައި ތަފާތުތައް ނައްތާލައި އެއްބައިވަންތަކަން އާލާކުރުން ރަމްޒުކޮށްދޭ ނަންބަރެއްގެ ގޮތުގައިވެސް ފާހަގަކުރަމުން ގެންދެއެވެ. އަދި މިގޮތަށް 222 ތަރުތީބުވެގެން އައުމުން ކާމިޔާބީގެ ލަނޑުދަނޑިއަށް ވާސިލުވުމަށްޓަކައި ގުޅިގެން މަސައްކަތް ކުރަންޖެހޭ ފުރުސަތު އަތުވެއްޖެކަމާއި އަދި ހެޔޮގޮތުގައި އެފުރުސަތުގެ ބޭނުން ނުކުރެވިއްޖެނަމަ އެއީ ގެއްލުމާއި ހަލާކަގެ ކުރިމައްޗަށް ހުރަހޮޅި ދާނެކަމުގެ އިންޒާރެއްކަމުގައި ވެސް ގަބޫލުކުރެއެވެ. ފާއިތުވެގެން މިދާ 22 އަހަރު ފެނިގެންމިދާ ހެކިތަކަކީ ކާމިޔާބީއަށް ވާސިލުވުމަށްޓަކައި އެކަތިގަނޑަކަށް ވުމުގެ މުހިންމުކަން ހާމަކޮށްދޭ ދިރިހުރި މިސާލެއްގެ ގޮތުގައި އެމީހުން ގަބޫލުކުރެއެވެ.
ޚާއްސަކޮށް 2020 ވަނައަހަރު މުޅިދުނިޔެއަށް ކުރިމަތި ވެފައިވާ ސިއްޙީ މުސީބާތުގެ މައްޗަށް އަލި އަޅުވާލާފައިވެއެވެ.
222 ތަރުތީބުވެގެން އައުމުގެ މައްޗަށް އެސްޓްރޯލިޖިސްޓުންނާއި އެހެން ބައެއްދީންތަކާއި މަޒްހަބުތަކަށް ތަބާވާ މީހުންދެކޭގޮތުގައި އެތަރުތީބުވުމާއެކު ކާއިނާތުގެ ތެރޭން ޕުލޫޓޯއެވެ ކިއުނު ބުރުޖު ނުވަތަ ކުޑަ ޕްލެނެޓް ވަކި އަމާޒަކަށް ވާސިލުވުމުން ދޭހަކޮށްދެނީ އެ ތަނަކަށް އަންނަންއޮތް ބޮޑު ބަދަލެއްގެ ފެށުންކަމުގައެވެ. ޕުލޫޓޯއަކީ އެމީހުންގެ ގަބޫލުކުރުންތަކުގައި އަބަދުވެސް ހަކަތައާއި ބާރުބޭނުންވެގެން އުޅޭ ބުރުޖެކެވެ.
ޔުނައިޓެޑް ސްޓޭޓްސް އޮފް އެމެރިކާއަކީ ވަރަށް ޒުވާން ގައުމެކެވެ. އަދި އެމެރިކާގެ ތާރީޚުގައި މިހާތަނަށް ޕުލޫޓޯ އެމެރިކާއަށް 222 ގެ ތަރުތީބުން އަމާޒު ވެފައެއް ނެތެވެ. މި ތަރުތީބުގެ މަތިން ޕުލޫޓޯ ވަކި އަމާޒަކަށް ވާސިލު ވުމަށްޓަކައި 247 އަހަރު ނަގާކަމަށްވެއެވެ.
ބުނެވޭގޮތުގައި ޔުނައިޓެޑް ސްޓޭޓްސް އޮފް އެމެރިކާއަށް ފުރަތަމަ ފަހަރު ޕުލޫޓޯ ގެ އަމާޒުވުން އޮތީ 2/20/2022 ގައެވެ. އެއީ މިމަހުގެތެރޭގައި އަންނަ 222 ތަރުތީބުގެ ދެވަނަ ދުވަހެވެ.
ކޮންމެ 247 އަހަރަކުން އެއްފަހަރު އެނބުރި އަންނަ ފަނާކުރުމާއި ބަދަލުކުރުމުގެ ގަދަފަދަކަން ރަމްޒުކޮށްދޭ ބުރުޖު ޕުލޫޓޯ އެމެރިކާއަށް އަމާޒުވުމުން އެތަނުގެ އަހުލުވެރިންނަށް އެންމެ ރަނގަޅުގޮތް ދެނެގަނެ އިސްލާޙްވުމުގެ ފުރުސަތު ހުޅުވިގެން ދާނެއެވެ. ނުވަތަ ގަސްދުކުރާގޮތެއްގެ ނަތީޖާއާއި ކުރިމަތި ލާން ޖެހޭނެއެވެ.
މާޒީގެ ތެރެއަށް ބަލާއިރު ފަރަންސޭސި ވިލާތަށާއި ރަޝިއާއަށް ޕުލޫޓޯގެ އަމާޒުވުން އައުމުން ނެޕޯލިއަން އާއި ސްޓާރލިން ގެ ނިމުން ފާހަގަ ކުރެވިގެން ދިޔައެވެ. ސްޕޭނަށް އަމާޒުވުމުން ސްޕޭނުގެ ޑިކްޓޭޓަރ ފްރާންސިސްކޯ ފްރެންކޯ އިސްތިއުފާދިނުން މަޖްބޫރު ކުރުވިއެވެ. އިނގިރޭސިވިލާތަށް ޕުލޫޓޯ އަމާޒުވުމުން އެ ގައުމުން މުޅިދުނިޔެއަށް ބާރުފޯރުވަމުން ގެންދިޔަ ވެރިކަމުގެ ނިމުން ފެށުނެވެ.
ތާރީޚީ ގޮތުން ބަލާއިރު މިއީ އެމެރިކާއަށް ޕުލޫޓޯއާއި ކުރިމަތިލާން ޖެހޭފަހަރެވެ. 222 ގެ ތަރުތީބުން ފަނާކުރުމާއި ނެތިދިއުމަށް މަގުހުޅުވިގެންދާފަދައިން އިސްލާހާއި ބަދަލަށްވެސް ފުރުސަތު ހުޅުވިގެންދާނެއެވެ. އެހެންކަމުން ދެ ގޮތުންކުރެން ގޮތެއް ޚިޔާރުކުރުމުގެ ފުރުސަތުވެސް އެމެރިކާއަށް ލިބިގެން ދާނެއެވެ.
ކަންތައްތައް ވަމުންދާގޮތް ތާރީޚުން ހެކިދޭނެއެވެ. ހަމަގައިމުވެސް އެނގޭކަމަކީ މިއަދަކީ (02022022) ވަރަށް ރީތި ދެން އެނބުރި ނާންނާނެފަދަ ފުރިހަމަ ތާރީޚްއެކެވެ.
One Response
އެމެރިކާގެ ހަލާކު ޖެހެނީ މިދައްކާގޮތުން. ބަލަމާ ހިނގާ. ސޯވިއެޓް ޔޫނިއަން ރޫޅުނުހެން އެމެރިކާ ރޫޅިގެން ދުނިޔޭގެ އަައު ނިޒާމް ހަމަޖެއްސޭނީ . އެވެރިން މިހާރު ދެން މާ ނުލަފާލީއެވެ.