ޔުކްރޭންގެ ސަރަހައްދީ މައްސަލައިގެ ތެރެއަށް އިނގިރޭސިވިލާތުން ވެސް ވަދެ އިތުރު ޑިޕްލޮމެޓިކް މަސައްކަތްތަކެއް ފަށަން ގަސްތުކުރާކަން އެގައުމުން އިއުލާން ކޮށްފިއެވެ. މިގޮތުން ބޮޑުވަޒީރު ބޮރިސް ޖޯންސަން ރަޝިޔާގެ ރައީސް ވްލަޑިމިއަރ ޕޫޓިންއަށް ފޯނުން ގުޅުއްވައި ކުރައްވާ މަޝްވަރާތަކުގެ އިތުރުން ބޮރިސް ޖޯންސަން އިރުމަތީ ޔޫރަޕްއަށް ދަތުރު ފުޅުތަކެއް ކުރައްވަން ގަސްތު ކުރައްވާކަން ވެސް ބޮޑުވަޒީރުގެ އޮފީހުން ވަނީ ހާމަކުރައްވާފައެވެ. އަދި ޕުޓިން އާއެކު ބާއްވަވާ ވާހަކަފުޅުތަކުގައި ރަޝިޔާއިން ފަހަތަށް ޖެހި ޑިޕްލޮމެޓިކް އުސޫލުތައް އިސްކުރުމުގެ މުހިންމު ކަމުގެ މައްޗަށް ބާރު އަޅުއްވާނެ ކަން ހާމަ ކޮށްފައިވެއެވެ.
ބޮރިސް ޖޯންސަން ކުރިން ވަނީ ޔުކްރޭންގެ މައްސަލަ ގޯސްވެގެންގޮސް ރަޝިޔާއިން ޔޫކްރޭނަށް ސިފައިން ފޮނުވާ ހިސާބަށް ހިނގައްޖެ ނަމަ ނޭޓޯ ފައުޖުގެ ހިމާޔަތުގައި އިގިރޭސި ސިފައިން ޔޫކްރޭނަށް ފޮނުވަން ޖެހިދާނެ ކަމަށް ވިދާޅުވެފައެވެ.
ރަޝިޔާއިން ތަކުރާރުކޮށް ބުނަމުން ގެންދަނީ ޔުކްރޭން ހިފުމުގެ ވިސްނުމެއް ނެތް ކަމުގައެވެ. އެހެން ނަމަވެސް ލައްކައެއްހާ ސިފައިންނާއި ޓޭންކްތަކުގެ އިތުރުން ބަރުހަތިޔާރު ޔޫކްރޭނާ ގުޅޭ ސަރަހައްދީ އިމުގެ ކައިރިޔަށް ޖަމާ ކޮށްފައެވެ. އަދި މިއީ ދެވަނަ ބޮޑުހަގުރާމަޔަށް ފަހުވެސް ރަޝިޔާއިން މިސަރަހައްދުގައި އެންމެ ބޮޑަށް ”ބާރު“ ދައްކާލި ފަހަރުކަމަށް ޚަބަރުތައް ބުނެއެވެ.
އިގިރޭސިވިލާތުން ޔުކްރޭން-ރަޝިޔާ ސުލްހަ ކުރުމަށް ފެށި މަސައްކަތުގެ ތެރޭން އިގިރޭސި ފޮރިން ސެކްރެޓަރީ ވެސް މޮސްކޯއަށް ދަތުރުފުޅުތަކެއް ކުރައްވަން ވަނީ ހަމަ ޖެހިފައެވެ.
