އެމެރިކާގެ ބޮސްޓަންގައި ހިތްބަދަލު ކުރުމުގެ އޮޕަރޭޝަނަކަށް ތައްޔާރު ވަމުންދިޔަ މީހަކު، ކޮވިޑް-19 ވެކްސިން ނުޖަހާ ހުރުމުގެ ސަބަބުން އެއޮޕަރޭޝަން ނުކުރެވޭނެ ކަން އަންގައިފިއެވެ. ބަލިމީހާ، އުމުރުން31 އަހަރުގެ ޑީ ޖޭ ފާރގަސަން އަށް ހިތުގެ ސީރިއަސް މައްސަލަ ތަކެއް ކުރިމަތި ވުމުގެ ސަބަބުން އޭނާ އައީ ބޮސްޓަން ގެ ބްރިގްހަމް އެންޑް ވިމެންސް ހޮސްޕިޓަލްގައި އެޑްމިޓްވެގެން ފަރުވާ ހޯދަމުންނެވެ.
އަދި ހިތް ބަދަލު ކުރުމުގެ އޮޕަރޭޝަން ބޭނުންވާކަމަށް ޑޮކްޓަރުން ނިންމުމަށްފަހު އޭނާ އައީ އެކަމަށް ތައްޔާރުވަމުންނެވެ.
ނަމަވެސް ފަހުން ހޮސްޕިޓަލުން ނިންމާފައިވާ ގޮތުގައި ފާރގަސަން ކޮވިޑް ވެކްސީން ނުޖަހާ ހުރުމުން އޭނާގެ ނަން މިހާރުވަނީ ގުނަވަން ބަދަލުކުރާ މީހުންގެ ލިސްޓުން ނަގާފައެވެ. އެހޮސްޕިޓަލުން ބުނީ މިގޮތަށް ކަންތައް ކުރީ ބަދަލު ކުރާނެ ހިތް ނުވަތަ އެހެންވެސް ގުނަވަންތައް ލިބުން ނުހަނު ދަތިކަމާއެކު، ހިތް ބަދަލު ކޮށްގެން ކާމިޔާބު ކުރުމުގެ ފުރުސަތު ވީހާވެސް ބޮޑު ކުރުމަށް ކަމުގައެވެ. އޮޕަރޭޝަން އަށް ފަހު އުޅެން ޖެހޭނީ ކޮވިޑްގެ ހާލަތުގައިވެސް ސިއްހީ ގޮތުން ގެންގުޅެންޖެހޭ މިންގަޑުތަކަށް ފެތޭ ގޮތަކަށް ކަމަށް ހޮސްޕިޓަލުން ބުނެފައިވެއެވެ.
މިކަމާ ގުޅިގެން ފާރގަސަން ގެބައްޕަ ބުނީ ވެކްސިން ޖެހުމަކީ އޭނާގެ ދަރިފުޅު ގަބޫލުކުރާ އުސޫލުތަކާ ޚިލާފު ކަމެއް ކަމުގައެވެ.
ހޮސްޕިޓަލުން ބުނީ ބަދަލު ކުރާނެ ގުނަވަން ލިބުމުގެ ދަތިކަން އޮތްވަރުން ، މިހާރުވެސް އެކަމަށް އިންތިޒާރު ކުރަމުންދާ އެއްލައްކައެއްހާ މީހުންނަށް ކުރިޔަށް އޮތް ފަސް އަހަރުތެރޭވެސް ބޭނުންވާ ގުނަވަން ނުލިބޭނެ ކަމުގައެވެ.
