ރާއްޖެޔަށް ފަތުރުވެރިން ޒިޔާރަތްކުރާ އަދަދު މިދުވަސްވަރު ވަނީ މީގެ ކުރިން ދުވަހަކުވެސް ނުދާހާ މައްޗަށް ޖެހިލާފައެވެ.

މިއީ ކޮވިޑްގެ މި ހާލަތުގައި ވެސް ވަކިވަކި ޖަޒީރާ ތަކުގެ ގޮތަށް އުފެދިފައިވާ ދިވެހިރާއްޖޭގައި ރައްކާތެރިކަން ލިބޭނެ ކަމަށް އޮންނަ އިތުބާރު ބޮޑުވުމުން ދިމާވެގެން އުޅޭ ކަމަކަށް ވެސް ވެދާނެއެވެ. ނޫންނަމަ ރާއްޖެ އިސްތިހާރު ކުރުމަށް ކުރެވޭ ގިނަ މަސައްކަތްތަކުގެ ނަތީޖާ ކަމަށް ވެސް ވެދާނެއެވެ. ކޮންމެ ސަބަބަކާ ހެދި ނަމަވެސް ރާއްޖެ އަށް މިހާރު ދުވާލަކު އެވްރެޖް ގޮތެއްގައި ހަތަރު ހާހަށްވުރެގިނަ ފަތުރުވެރިން އަންނަ ކަމީ މިއީ ހަގީގަތެވެ.

ޓުއަރިޒަމް މިނިސްޓްރީން އެންމެ ފަހުން ހާމަކޮށްފައިވާ ގޮތުގައި މިއަހަރުގެ މިހާތަނަށް ރާއްޖެއަށް 82479 ފަތުރުވެރިން ޒިޔަރާތްކޮށްފައިވެއެވެ. މިއީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި 55729 ފަތުރުވެރިންނާއި އަޅާ ބަލާއިރު، 48 އިންސައްތަ އިތުރު އަދަދެކެވެ.

ޓުއަރިޒަމް މިނިސްޓްރީން އާއްމުކޮށްފައިވާ ތަފާސް ހިސާބުތައް ދައްކާގޮތުން، އަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ޒިޔާރަތްކޮށްފައި ވަނީ ރަޝިއާ ފަތުރުވެރިންނެވެ. އެގޮތުން ރާއްޖެއަށް ރަޝިއާއިން 16616 ފަތުރުވެރިން އައިސްފައިވާއިރު، މިއީ މި މުއްދަތުގައި ރާއްޖެއަށް އައި ޖުމްލަ ފަތުރުވެރިންގެ 20.1 އިންސައްތައެވެ.

މިދިޔަ އަހަރު ނިމުނުއިރު ރަޝިއާއަކީ ރާއްޖެއަށް ދެވަނައަށް އެންމެ ގިނަ އަދަދަކަށް ފަތުރުވެރިން އަންނަމުން ދިޔަ ގައުމެވެ. އޭރު ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަމުން ދިޔައީ އިންޑިއާއިންނެވެ.

މިހާރު އިންޑިއާއަކީ ރާއްޖެއަށް 4 ވަނަ އަށް އެންމެ ގިނަ އަދަދަކަށް ފަތުރުވެރިން އަންނަ ގައުމެވެ. މިއަހަރުގެ ފުރަތަމަ 19 ދުވަހުގެތެރޭ އިންޑިއާއިން ރާއްޖެއަށް އައިސްފައި ވަނީ 6657 ފަތުރުވެރިންނެވެ. މިހާރު ރާއްޖެއަށް ދެވަނައަށް އެންމެ ގިނަ ޢަދަދަކަށް ފަތުރުވެރިން އަންނަނީ އިނގިރޭސިވިލާތުންނެވެ.

މިއަހަރު މިހާތަނަށް އެ ގައުމުން ރާއްޖެއަށް 7544 ފަތުރުވެރިން އައިސްފައިވެއެވެ.

ޓުއަރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 4341 ފަތުރުވެރިން އާދެއެވެ. އަދި ރާއްޖެއަށް އަންނަ ފަތުރުވެރިން ރާއްޖޭގައި ޢާއްމުގޮތެއްގައި 9 ދުވަހުގެ ޗުއްޓީއެއް ހޭދަކުރާކަމަށް ވެސް ރަސްމީ ތަފާސް ހިސާބުތަކުން ދައްކައެވެ.

ރާއްޖެޔަށް ޒިޔާރަތްކުރާ ފަތުރުވެރިންގެ އަދަދު މިހާ މައްޗަށް ދާއިރު ފާހަގަ ކޮށްލެވޭ އެހެން ބަޔެއް ކަންތައްވެސް އެބަ ހިނގައެވެ. މިގޮތުން އެންމެ ފާހަގަ ކޮށްލެވޭ އެއްކަމަކީ ސިންގަޕޫރުގެ ކުންފުންޏެއް ކަމަށްވާ ”މިކްސްޑް މާޝަލް އާޓްސް“ ގެ ވެރިޔާ ސިޓްޔޮޓޮން އެކުންފުނީގެ ހުރިހާ މުވައްޒަފުންނަށް ދިން ހަދިޔާއެއްގެ ގޮތުގައި ރާއްޖެޔަށް ޗުއްޓީ ދަތުރެއް ދިނުމެވެ. ”މިކްސް މާޝަލް އާޓްސް“ އަކީ ކަސްރަތުކުރުމާއި މާޝަލް އާޓްސް ދަސްކޮށް ދިނުމުގައި މުޅި އޭޝިޔާއަށް ވެސް މަޝްހޫރު ކުންފުންޏެކެވެ.

ހުރިހާ ޚަރަދެއް ކުންފުނިން ދޭގޮތަށް ހުރިހާ މުވައްޒަފުންނަށް ރާއްޖެއަށް ޗުއްޓީ ހޭދަކޮށްލުމަށް އައުމަށް ދިން ދަތުރަކީ ފާއިތުވި އަހަރު ކުންފުންޏަށް ފާހަގަކޮށްލެވޭ ވަރަށް ފައިދާ ވެފައި ވުމާއެކު މުވައްޒަފުންނަށް ޝުކުރު އަދާ ކުރުމަށް ދިން ހަދިޔާއެއްކަމަށް ”ބޮސް“ ބުނެފައިވެއެވެ. އެކުންފުންޏަށް ނަގަނީ ވަޒީފާއަށް އެދޭ 200 މީހުންގެ ތެރޭން އެކަކު ކަމަށާ އެހެން ކަމާއެކު ކުންފުންޏަށް ލިބެނީ އެންމެ ރަނގަޅު، މަސައްކަތަށް އެންމެ އެކަށީގެންވާ މީހުން ކަމަށް އޭނާ ބުނެފައިވެއެވެ. ބުރަކޮށް މަސައްކަތް ކޮށްފައި މަޖާކުރާނީ ވެސް ބުރަކޮށް ކަމަށް ސިޓްޔޮޓޮންގ އޭނާގެ މުވައްޒަފުންނަށް އަންގާފައިވާނެ ކަމަށް އޭނާ ބުނެފައި ވެއެވެ.