http://sandhaanu.today/18369/ އައި ގުޅޭ…
މުޣަލް އެމްޕަޔަރ ބަލިކަށިވެގެން ދިޔަ ސަބަބުތަކާއި ހުޅަނގުގެ އިސްތިޢުމާރީ ބާރުތަކަށް އިންޑިއާގެ ސަބްކޮންޓިނެންޓާއި ދުރުއިރުމަތީގެ ރަށްތައް އިސްތިޢުމާރު ކުރެވުނުގޮތުގެ މަސްއޫލިއްޔަތުގެ ވަރަށްބޮޑު ހިއްސާއެއް ބޮލުގައި އަޅަންޖެހެނީ ތާރީޚު ފޮތްތަކުން އެނގޭގޮތުގައި މުޣަލް ރަސްކަމުންނެވެ.
އެ ރަސްކަމުގެތެރޭގައި އުފެދެމުންދިޔަ އަމިއްލަ އެދުންވެރިކަން ހައްދުފަހަނަޅައި ގޮއްސާތިބި ބޮޑުންތަކެކެވެ.ރަސްކަމުގެ ފަރާތުން ސަރަހައްދުތަކަކަށް ބަހާލައިގެން ގަވަރނަރުން ބައިތިއްބައިގެން ހިންގަން އުޅުނު ނިޒާމު ނުރަނގަޅުވެގެންނެއް ނޫނެވެ. އަދި މައިސަރުކާރުގެ އެއްބާރުލުން ނުލިބިގެނެއްވެސް ނޫނެވެ. އެފަދަ ބޮޑު ވެރިކަމެއް ހިންގަން ލިބުނުއިރުވެސް އިންސާނުންގެ ނުކުޅެދުންތެރިކަން ވެރިންނަށް ރޭކާވެސް ނުލީއެވެ.
ބާރު ލިބުނުވަރަކުން އިތުރު ބާރު ހޯދަން ކޮންމެމީހަކުވެސް ބޭނުންވީއެވެ. ނަތީޖާއަކަށް ވެގެންދިޔައީ ކޮންމެ ވެރިޔަކަށް އާ ސަރުކާރެއް އޮންނަން ޖެހޭނެކަމަށް ގަބޫލުކުރެވެންފެށުމެވެ. ވަކިވަކިވެގަތުމުގެ ހިތި ނަޖީޖާއާއި ކުރިމަތިލާންޖެހުނީއެވެ. އަޅުގަނޑުމެންގެ ދިވެހިރާއްޖޭގައި މިހާރު އުފެދެމުންމިދާ ލާމަރުކަޒުގެ ނިޒާމު މިފަދަ ގޮތަކަށް ބަދަލުވެގެން ނުދިއުމަކީ އަޅުގަނޑުމެންގެ ދުޢާއެވެ. އެހެނަސް ބައިބައި ކުރުމުގެ ފުރުސަތަކަށް ބަލަބަލާތިބި ބަޔަކާމެދު ފަރުވާތެރިވާން ވަރަށްބޮޑަށް ޖެހޭނެކަމުގައި ދެކެމެއެވެ.
ހުޅަނގުގެ އިސްތިޢުމާރީ ބާރުތަކުގެ ދަށަށް ދިއުމުން އިންޑިއާގެ ރައްވެހިންގެ އާދަކާދަތަކަށްވެސް ބޮޑެތި ބަދަލުތަކެއް އަންނަމުންދާން ފެށިއެވެ. މާއްދިއްޔަތުގެ ވިސްނުމާ ދުރުވުމާއި ރައްވެހިންގެ ތެރޭގައި އާންމުކޮށް ބޭނުން ކުރެވެމުންދިޔަ އާދަކާދަތަކަށް ވެސް ބަދަލުތަކެއް އަންނަމުން ދިޔައެވެ. ދިއްލީގެ އިގްތިސާދުވެސް ހީނަރުވެ ޝާޢިރުންނާއި ފަލްސަފާއާއި އިލްމުގެ ހޯދުންތަކަށް އިތުރު ދޮރުތަކެއް ހުޅުވިގެން ވެސް ދިޔައެވެ. ޝާހު ވަލިއްޔުﷲ އާއި މީރު ތަގީ މީރު ފަދަ އެތައްބޭފުޅުންނަކާއެކު މިޔުޒިކާއި ކުރެހުމާއި ބަސްމޮށުންތެރިކަމަށް އާވާދު އާއި ބައިކާނަރ އަދި ލާހޯރާއި ތަންޖާވޫރު ފަދަ ޝަހަރުތަކުގައި އިތުރު ޖާގަ ލިބެމުންދިޔައެވެ. މިފުރުސަތުތައް ހުޅުވާލެވިފައިއޮތީ ހަމައެކަނި ވަކި ފަންތިއަކަށް ވަކި ނަސްލަކަށް ނޫނެވެ.
ތަމަޅައިންނާއި މަރާތީންނާއި އެހެނިހެން ބަސްތަކުގެ އަހުލުވެރިންނަށްވެސް ތަފާތުކުރުމެއް ނެތިއެވެ. ހަމައެއާއެކު ހިންދީންނާއި މުސްލިމުން މެދުގައިވެސް މުގައްދަސް ތަންތަނަށް އިޙްތިރާމުގެ ދަތުރުތައްކުރުމާއި ދީނުގެ ވިސްނުމުގެ ތެރެއަށް އާދަކާދައިގެ ރަހަތައް ތަޢާރުފް ކުރެވިގެންދާތަން ފެންނާން ފެށިއެވެ. މިޔުޒިކުގެ ދުނިޔޭގައި ތިޔާގަރާޖާއާއި މުއްތުސާމީފަދަ ފުންނާބު އުސް އެތައް ބޭފުޅުންނެއް ފާޅުވެ ހަރަކާތްތެރިވަމުން ގެންދާތަންވެސް ފެންނާން ފެށިއެވެ.
ހުޅަނގުގެ ގައުމުތަކުން އިންޑިއާގައި އިސްތިޢުމާރީ ހަންފަތުރަމުން ގެންދިޔަގޮތް:
1500 އިން ފެށިގެން 1858 އަށް ހުޅަނގުގެ ގައުމުތަކުން ގެންދިޔައީ އިންޑިއާގައި ހަންފެތުރުމަށް އެމީހުންގެންގުޅުނު ވިސްނުމުގައި ކުލަ ޖެއްސޭނެގޮތްތަކަށް މަގު ފަހި ކުރަމުންނެވެ. 1498 ވަނައަހަރު ޕޯޗުގީޒުންގެ ދަތުރުވެރިޔާ ވަސްކޯ ޑަ ގާމާ ކާލިކޯޓްއަށް އައުމާއެކު އެތައް ޒަމާނެއް ކުރިން ހުޅަނގުން އިރުމައްޗަށް ހުޅުވިފައި އޮތް ސިނާއަތު އިތުރަށް ތަރައްގީކުރެވޭނެގޮތްތައް ހޯދަން މަސައްކަތް ފަށާގަތެވެ. ތާރީޚުން އެނގޭ ގޮތުގައި މި ސިނާއަތު އެންމެ ފުރަތަމަ ހުޅުވިގެން ދިޔައީ 325 ބީ. ސީ. އީ. ގައި އެލެގްޒެންޑަރ ދަ ގްރޭޓް ޕަންޖާބު ފަތަހަ ކުރުމާ ގުޅިގެންނެވެ. ބީ. ސީ. އީ. އިން 2 ވަނަ ގަރުނުގައި ކުޑަ ދުވަސްކޮޅަކަށް ގްރީކުންގެ ވެރިކަމެއްވެސް ޕަންޖާބު އާއި އަފްޣާންގެ ފަރުބަދަ ތަކުގައި ގައި ހިންގިއެވެ. މިއީ ވެރިކަމަކަށްވުރެންބޮޑަށް މައިގަނޑުގޮތެއްގައި އިގްތިސާދީ ފައިދާތަކަކަށް އަމާޒުކުރެވިގެން ދިޔަ ހަރަކާތްތަކެއްކަމުގައި ބެލެވެއެވެ.
ބީ. ސީ. އީ. އިން 4 ވަނަ ގަރުނުގައި ރޯމަން އެމްޕަޔަރ ވެއްޓުމާހަމަޔަށް މި ޙަރަކާތްތައް ކުރިއަށް ދިޔަކަމަށްވެއެވެ. އޭގެފަހުން އެކަމުގައި އިސްކޮށް ޙަރަކާތްތެރިވަމުން ގެންދިޔައީ މުސްލިމް އަރަބީންނެވެ. މިދުވަސްތަކުގެ ތެރޭގައި މެދުމިނުގެ އިސްލާމީ ވިސްނުމެއް ގެންގުޅެމުން ދިޔަ ތުރުކީންނާއި މޮންގޯލުންވެސް ހަރަކާތްތެރިވަމުން ގެންދިޔައެވެ. 15 ވަނަގަރުނާ ހަމަޔަށް މިގޮތުގައި ދުވަސްތައް ފާއިތުވެގެން ދިޔައިރު އިޓަލީގެ މާރކޯޕޯލޯ އާއި ނިކޯލޯ ޑި ކޮންޓީ އަދި ރަޝިއާގެ އަފަނާސީ ނިކިޓިން ފަދަ ދަތުރުވެރިން އިންޑިއަން ސަބްކޮންޓިނެންޓުގެ ރަށްތަކުގައި ބަނދަރު ކޮށްލުން ފިޔަވައި ޔޫރަޕްގެ ގައުމުތަކާއި މާބޮޑު ގުޅުމެއް ނޯވެއެވެ.
މިތާގައި އިންޑިއާ އޭ މި ބުނެވެނީ މިހާރުގެ އިންޑިއާ ޕާކިސްތާނު ކަމުގައި ބެލެވޭ ސަރަޙައްދަށް ވުރެން މާފުޅާ ދާއިރާއަކަށެވެ. އޭގައި އަފްޣާނިސްތާނުވެސް ހިމެނެއެވެ. ޔޫރަޕުގެ އަހުލުވެރިންނަށް އިންދިއާ ތަޢާރުފް ވެފާ އޮންނަނީ ހަވާދުގެ ބާވަތްތައް އުފައްދާ ސަރަހައްދުގެ ނަމުގައެވެ. އަރަބީންނަށް ޔޫރަޕް ތަޢާރުފް ވެފާއޮންނަނީ ކޮންސްޓެންޓިނޯޕޯލް ނުވަތަ ރޫމީންގެ ގޮތުގައެވެ. އިންޑިއާގެ ވަޒަންވެރިންނަށް ޔޫރަޕް އެނގިފައިއޮންނަނީ ބިދޭސީން ދިރިއުޅޭ ހިސާބުގެ ގޮތުގައެވެ.
އިރުމައްޗަށް ދަތުރުކުރުމުގައި އެންމެފުރަތަމަ ކާމިޔާބީތަކެއް ޙާސިލުކުރިކަމަށް ވަނީ ޕޯޗްގީޒުންނެވެ. އެމީހުންނަކީ ދަތުރުފަތުރު ކުރުމުގައި އެޒަމާނަށް ބަލާއިރު ވަރަށް ކުރިއަރާފައިތިބި ބައެކެވެ. 15 ވަނަ ގަރުނުގައި ޔޫރަފުން ރަތްކަނޑު ހުރަސްކޮށް ވިޔަފާރިދަތުރުތައް ސީދާ އިންޑިއާއަށް އެމީހުން ދަތުރުކުރަންފެށިއެވެ. މިދަތުރުތަކުގައި މިސްރު ސީރިއާ ފާރިސްކަރަ އަށްވެސް އެމީހުން ދަތުރު ކުރިއެވެ. ފަހުން އެ ދަތުރުތަކަށް އުސްމާނީ ރަސްކަމުގެ ފަރާތުން ތަފާތު ގިނަގޮތްގޮތުން ހުރަސްތައް ކުރިމަތިކުރަމުންގެންދިޔައެވެ. މި ޙާލަތުން އަރައިގަތުމަށްޓަކައި ޕޯޗްގީޒުންނާއި ސްޕޭން ގުޅިގެން އެފްރިކާގެ ބައްރަށް އަމާޒުކޮށްގެން އެހެން މަގުތަކެއް ހޯދައި އެމަގުތައް ހުޅުވުމަށްޓަކައި އުތުރު އެފްރިކާގެ އައިބީރިއާ އާއި މުސްލިމް މޫރުންގެ މައްޗަށް ހަނގުރާމަފެށިއެވެ.
ވަސްކޯ ޑާ ގާމާ ކާލިކޯޓް އަށް އާދެވުމާއެކު އެންމެފުރަތަމަ މަސްކަތަށް ހެދީ އެ ސަރަޙައްދުގައި ދިރިއުޅޭ ނަސްރާނީންގެ ބައިވެރިވުން ހޯދުމަށެވެ. ވަރަށްފަސޭހައިން އޭނާގެ މަގްދަސު ޙާސިލް ކުރެވުނެވެ. އަދި އޭނާގެ ބާރުގެދަށަށް ކޮޗިން އާއި ޓްރިވެންކޯރ ގެ ވިޔާރި ގެނެސްފިއެވެ. އެއަށްފަހު ފްރާންސިސްކޯ އަލްމެއިޑާ އާއި އަލްފޯންސޯ ޑި އަލްބުކާކޭ އެހެން ސަރަޙައްދުތަކަށް ބާރުގަދަކޮށްފިއެވެ. އޭގެތެރޭގައި ގޯވާ އާއި މަލަކާ އިންޑޮނޭޝިއާ އަދި އީރާނުގެ ހޮރްމޯޒް ހިމެނެއެވެ. މިއިން ކޮންމެ ސަރަހައްދެއްގައި ޕޯޗްގީޒުން އައްޔަން ކުރާމީހަކީ ގަވަރނަރ ކަމުގައި ކަނޑައަޅައި އަމިއްލަ ވެރިކަމެއް ހިންގަން ފެށިއެވެ.
އުސްމާނީ ރަސްކަމުގެ ބާރުތަކަށް ކުރިމަތިލާން ބޭނުން ނުވާތީ ޕޯޗްގީޒުންގެ މައި މަރުކަޒެއްކަމުގައި ކަނޑައެޅީ ގޯވާއެވެ. ހަގީގަތުގައި އެމީހުންނަކީ ދަތުރުވެރިންނެވެ. އެހެންނަމަވެސް އެމީހުންގެ އަނިޔާވެރިކަމުގެ ކުރިމަތީގައި ކުޑަކަކޫ ޖެހުން ނޫން އެހެންގޮތެއް އެތަންތަނުގެ އަހުލުވެރިންނަކަށް ނޯވެއެވެ. އެމީހުންގެ އުޅަނދުތަކަކީ ކަނޑަށްގަދަ އަދި އޭގައި ބޮޑުބަޑި ހަރުކޮށްފައި ހުންނަ އުޅަނދުފަހަރެވެ. އެހެންކަމުން މެލޭންނާއި އަރަބިންގެ އުޅަނދުފަހަރަށް ހަމަލަދީ ފައްތާލުމަކީ ޕޯޗްގީޒުންނަށް އުނދަގޫކަމެއްނޫނެވެ. އެހެންނަމަވެސް ޕޯޒްގީޒުންގެ މީސްކޮޅު މަދުކަމުން އެކަންޙައްލުކުރުމަށްޓަކައި އަވަސްފިޔަވަޅުތަކެއް އޮތީ އަޅަންޖެހިފައެވެ. އެގޮތުން އިރުމަތީ އިންޑިއާގެ މަސްވެރިންނަށް ނަސޯރާދީން ކިޔަވައިދީ ދޮން މީހުންނާ ކައިވެނިކުރުމުގެ ފުރުސަތު ޢާންމުކޮށް ތަނަވަސް ކޮއްލިއެވެ.
ނަތީޖާއަކަށްވެގެންދިޔައީ ދެ ޖިންސުންވެސް ދޮންމީހުންނާ ކައިވެނިކުރުން ޢާންމުވެ އިސާހިތަކު ދެބައިމީހުންނަކީ އެއްބަޔަކު ކަމުގައިވެގެން ހިނގައްޖެއެވެ. ދޮން އަންބަކު ނުވަތަ ފިރިއަކު ލިބުމުން މާބޮޑު ދީނީ ހޭލުންތެރިކަމެއް ނެތް މުޖުތަމާއެއްގައި ދީނީ ފިކުރު ފަސޭހައިން ބަދަލުވަމުން ދާން ފަށައިފިއެވެ. އަދި ގޯވާއަކީ އިރުމައްޗާއި ޔޫރަޕް ގުޅުވައިދޭ ވިޔަފާރީގެ މުހިންމު މަރުކަޒެއްގެ ގޮތުގައި ފާހަގަކުރެވިއްޖެއެވެ. ވިޔަފާއިކުރިއަރުވައި ތަރައްގީކުރެވޭނެ ހުރިހާ އިންތިޒާމެއް އޮތީ ހަމަޖައްސާފައެވެ. ޓެކްސް ފްރީކުރުމާއި އަދިވެސް ގިނަގުނަ ލުއިތަކެއް އޮތީ ތަޢާރުފް ކޮށްފައެވެ.
ޕޯޗްގީޒުންނަކީ އެދުވަސްވަރު ކަނޑުމަތީގެ ގަދަ ބާރަކަށް ވުމުގެ އިތުރުން ވަރަށް އަނިޔާވެރި ބައެއްވެސް މެއެވެ. އެމީހުންގެ މަގްސަދު ޙާސިލުކުރުމަށްޓަކައި ކޮންމެ ކަމެއް ކުރުންވެސް ހުއްދަ ކަމަކަށް އޮންނަނީ ހަދާފައެވެ. މި އަމާޒުގައި އެންމެ ބޮޑަށް ފާހަގަކުރެވެނީ އިސްލާމުންނާ އިދިކޮޅު ޙަރާކާތްތަކެވެ. އެމީހުންގެ ބާރުގެ ދަށުގައި އޮންނަ އެއްވެސް ސަރަހައްދެއްގައި ނަސޯރާދީން ފިޔަވައި އެހެން ދީނެއް އޮވެގެން ނުވާނެއެވެ. ނަސްރާނީ އަކަށް ނުވާ ކޮންމެ މީހަކީ އެހެންދީނަކަށް ތަބާވާ މީހަކަށް ވެގެންނުވާނެއެވެ. ޕޯޗްގީޒުންގެ މި ވިސްނުމާއި ފަލްސަފާގެ ސަބަބުން އިންޑިއާގެ ތެރޭގައިވެސް އެމީހުންނަށް ނުރުހުމުގެ އޮއިވަރުތަކެއް ފެށިގެންދިޔައެވެ.
އެހެންކަމުން ޔޫރަޕްގެ އިތުރު ސަރަހައްދުތަކުން އިންޑިއާގެތެރެއަށް ވަނުމުގެ ފުރުސަތުއް ހުޅުވެމުންދިޔައެވެ. ޕޯޒްގީޒުންނާއި ސްޕޭނަކީ އެކުގައި މަސައްކަތްކުރަމުން ގެންދިޔަބަޔަކަށް ވެފައި ނެދަރލޭންޑްގައި އުތުރި އަރަންފެށި ޑަޗުންގެ ޙަރާކާތްތައް ހުއްޓުވުމަށްޓަކައި ސްޕޭނަށް އެހީތެރިވާންޖެހުމުގެ ސަބަބުން ޑަޗުންނާއި އިނގިރޭސީންނަށް އިންޑިއާއަށް އައުން ފަސޭހަވެގެންދިޔައެވެ.
މިތާގައި ދިވެހިރާއްޖެއަށް (އަޅުގަނޑުމެންނަށް) އެދުވަސްވަރު ޕޯޗްގީޒުންގެ ފަރާތުން ކުރަމުންދިޔަ ދުއްތުރާތައް ހަނދާންކޮށްލަންޖެހެއެވެ. އަޅުގަނޑުމެންގެ ދުޢާއަކަށް ވާންވީ ބޮޑުތަކުރުފާނު ފަދަ ގައުމީ އަބްތޯލުންތަކެއް މާތް ﷲ އަޅުގަނޑުމެންނަށް ދެއްވައި އަޅުގަނޑުމެންގެ ދީނާއި އެއްބައިވަންތަކަމަށް އަންނަ އެންމެހާ ނުރައްކަލުން އަޅުގަނޑުމެންގެ ގައުމާއި ރައްޔިތުންނަށް ސަލާމަތާއި ރައްކާތެރިކަން މިންވަރު ކޮށްދެއްވުމެވެ. އާމީން!
…ނުނިމޭ…
One Response
ވަރަށް ޢިބުރަތްތެރި ފިލާވަޅެއް. ދުނިޔޭގެ ދަހިވެތިކަމުގައި ކޮންމެފަދަ ނުލަފާލެއްވެސް ވެދާނެއެވެ. މިހާރު ދެން ކޮވިޑް. ދުނިޔޭގެ ބާރާއި ފައިސާޔާހެދި މޮޔަވީމާ އަތަށް ގޮވާނެއެވެ. މުޣަލް ސްޓޯރީން ވަރަށް ގިނަ ކަންތަކެއް އެނގިގެން ހިނގައްޖެއެވެ. ޝުކުރިއްޔާ ސަންދާނު ގުރޫޕް..
ސަންދާނު ތަފާތުވާނެ ދޯ؟؟