އެމެރިކާގެ ކެލެފޯނިއާ ސްޓޭޓްގެ ބިގް ސުރް ސަރަހައްދުގައި ހުކުރު ދުވަހުގެ ރޭ އަލިފާން ރޯވެ އެ ސަރަހައްދުގައި ދިރުއުޅެމުން ދިޔަ ރައްޔިތުން އެ ސަރަހައްދުން ދުރަށް ދިޔުމަށް ވަނީ މަޖުބޫރު ވެފައެވެ. މި އަލިފާންގަނޑު ރޯވެފައި ވަނީ ބިގް ސުރް ސަރަހައްދުގެ ފަރުބަދަތަކުގެ ތެރޭގައެވެ. އަލިފާންގަނޑާ ގުޅިގެންކަމާބެހޭ ފަރާތްތަކުންވަނީ އެސަރަހައްދުގެ މައިމަގު ކަމަށްވާ ހައިވޭ 1 ވެސް ބަންދުކޮށްފައެވެ.

އެ ސަރަހައްދަށް ޖެހެމުން ދިޔަ ބާރު ވައިގެ ސަބަބުން އަލިފާންގަނޑު ވަނީ ހަލުވި ކަމާއެކު ފެތުރިފައެވެ. ކަމާ ބެހޭ ފަރާތްތަކުން ބުނެފައިވާ ގޮތުގައި އަލިފާންގަނޑު ފެތުރެމުން ދިޔައިރު 80 ކިލޯމީޓަރުގެ ބާރު މިނުގައި ވައިޖެހެމުން ދިޔައެވެ.

މިހާދިސާގައި 6 ކިލޯމީޓަރުގެ ސަރަހައްދެއް އަނދައި ހުލިވެފައިވާކަމަށް ކެލެފޯނިއާގެ ޑިޕާޓްމެންޓް އޮފް ފޮރެސްޓްރީ އެންޑް ފައަރ ޕްރޮޓެކްޝަންގެ ތަރުޖަމާނު ސެސިލް ޖޫލިއެޓް ބުނެފައިވެއެވެ.

ކަމާބެހޭ އިދާރާތަކުން ވަނީ ކާމެލް އަދި ބިގް ސުރް ސަރަހައްދުގައި ދިރިއުޅޭ 500 އެއްހާ ރައްޔިތުންނާ ބައްދަލުކޮށް އެ ސަރަހައްދުން ދުރަށް ދިޔުމަށް ނަސޭހަތްތެރިވެފައެވެ.

އަލިފާންގަނޑު ނިއްވުމުގެ މަސައްކަތުގައި އެކި ޖަމިއްޔާތަކުން 250 އަށް ވުރެ ގިނަ އަލިފާން ނިއްވާ މީހުން ދަނީ ހަރަކާތްތެރިވަމުންނެވެ. ފަޔަރ ފައިޓަރުންގެ އިތުރުން ފެން ޖެހުމަށް ބޭނުންކުރާ މަތިންދާ ބޯއްޓުގެ އެހީގައި އަލިފާންގަނޑުގެ %20 ވަނީ ހޮނިހުރި ދުވަހު ކޮންޓްރޯލް ކުރެވިފައެވެ.