މިދިޔަ އަންގާރަދުވަހު އީރާނުގެ ކަނޑުގެ ލަޝްކަރުގެ ކޮމާންޑަރ، ރިއާ އެޑްމިރަލް ޝަހްރާމް އިރާނީ (ފޮޓޯ) އާއި އޮމާންގެ އެސިސްޓެންޓް ޗީފް އޮފް ސްޓާފް ފޯ އޮޕަރޭޝަންސް އެންޑް ޕްލޭނިންގް، ބްރިގޭޑިޔާ ޢަބްދުލް ޢަޒީޒް ޢަބްދުﷲ އަލް މަންތްރީ ވަނީ ބައްދަލު ކުރައްވަވާފައެވެ.
ދެ ގައުމުގެ އަސްކަރީ ގުޅުން ވަރުގަދަ ކުރުމާ ބެހޭ ގޮތުން މަޝްވަރާކުރުމަށް ބޭއްވި މި ބައްދަލުވުމުގައި އިރާނުން އޮމާން ސިފަކޮށްފައި ވަނީ ވަރަށް ގާތް އެކުވެރި ގައުމެއްގެ ގޮތުގައެވެ. އަދި ދީނީ، ސަގާފީ، އިގުތިސާދީ އަދި މި ނޫންވެސް އެހެނިހެން ދާއިރާތަކުގައި ދެ ގައުމަކީ ގުޅިގެން މަސައްކަތް ކުރަމުން އަންނަ ދެ ގައުމުކަން މި ބައްދަލުވުމުގައި ޝަހްރާމް އިރާނީ ފާހަގަކުރައްވާފައިވެއެވެ. މުސްތަގުބަލުގައި ވެސް ދެ ގައުމުގެ ގުޅުން އިތުރަށް ވަރުގަދަ ކުރުމަށް ކުރެވެން ހުރި ހުރިހައި ކަމެއް ކުރުމަށް ފަސްނުޖެހޭނެކަމަށްވެސް މި ބައްދަލުވުމުގައި އޭނާ ވިދާޅުވިއެވެ.
މި ބައްދަލުވުމުގައި މައިގަނޑު ގޮތެއްގައި ދެ ގައުމުގެ ދެމެދުގައި މަޝްވަރާ ކޮށްފައި ވަނީ ޢަސްކަރީ ގުޅުންތައް ހަރުދަނާ ކުރުމާ ބެހޭގޮތުންނާއި، ޓެރަރިޒަމާ ދެކޮޅަށް މަސައްކަތްކުރުމާ ގުޅޭގޮތުންނާއި، ދެ ގައުމުގެ ސަރަހައްދީ އިން ބެލެހެއްޓުމާއި ގުޅޭގޮތުންނެވެ.
