ކޮވިޑް-19 އައު ވޭރިއަންޓެއް ކަމަށްވާ އޮމިކްރޮން ރާއްޖެއިން ފެނިއްޖެއެވެ.
އެޗްޕީއޭ އިން ވިދާޅުވީ ރާއްޖެ އިން އޮމިކްރޮން އަށް ފައްސިވެފައި ވަނީ ފަތުރުވެރިއެއް ކަމަށެވެ. ނަމަވެސް އޭނާ އަކީ ކޮން ގައުމަކަށް ނިސްބަތްވާ މީހެއް ކަމެއް، އަދި އޭނާ ކޮވިޑަށް ފައްސިވީ ކޮންއިރަކު ކަމެއް އެޗްޕީއޭ އިން ހާމައެއް ނުކުރެއެވެ.
ވޭރިއަންޓް ކަށަވަރު ކުރެވިފައިވަނީ ފަތުރުވެރިޔާ ކޮވިޑް-19 އަށް ފައްސިވުމުން، ޖިނޮމިކް ސީއުއެންސް ހެދުމުން ކަމަށްވެސް އެ ފަރާތުން ވިދާޅުވިއެވެ.
އެޗްޕީއޭ އިން ވިދާޅުވީ އޮމިކްރޮން އަށް ރާއްޖެ އިން މީހަކު ފައްސިވުމާއި ގުޅޭ އިތުރު މައުލޫމާތު ފަހުން ހާމަކުރާނެ ކަމަށެވެ.
އޮމިކްރޮން ވޭރިއަންޓް ފުރަތަމަ ފެނިފައިވަނީ ދެކުނު އެފްރިކާއިންނެވެ. މިހާރު ދުނިޔޭގެ ގިނަ ޤައުމުތަކުން މި ވޭރިއަންޓްދަނީ ފެންނަމުންނެވެ.