ދެ މީހުން ޖާމިނު ކުރުމަށް ފަހު، ސީލައިފްގެ މެނޭޖިންގް ޑިރެކްޓަރ އަހުމަދު މޫސާ (އަންމަޓީ) ކަފާލާތުގެ ދަށުން ދޫކޮށްލި މައްސަލަ ބާޠިލްކޮށް އޭނާ އަލުން ބަންދުކުރުމަށް ހައި ކޯޓުން އަމުރުކޮށްފިއެވެ.
ކްރިމިނަލް ކޯޓުން ކަފާލާތުގެ ދަށުން އަންމަޓީ ދޫކޮށްލާފައި ވަނީ އޭނާގެ އެއްބަނޑު އެއްބަފާ ދައްތަ މަރިޔަމް ނައީމާ އަދި ކޮއްކޮ އަފީފާ މޫސާ ޖާމިނުކޮށްފަ އެވެ. ކްރިމިނަލް ކޯޓުން ނިންމި ނިންމުމާމެދު ހިތްހަމަ ނުޖެހިގެން ދައުލަތުން އެ މައްސަލަ ހައިކޯޓުގައި އިސްތިއުނާފް ކުރި އެވެ. ފަހުން ހައިކޯޓުން މިގޮތަށް އަމުރު ކޮށްފައި ވަނީ މައްސަލަ ބެއްލެވި ތިން ފަނޑިޔާރުންގެ ތެރެއިން ދެ ފަނޑިޔާރެއްގެ އައުލަބިއްޔަތުންނެވެ.
ހައިކޯޓުގެ އަމުރުގައި ބުނެފައި ވަނީ އައްމަޓީގެ ޕާސްޕޯޓް ހިފަހައްޓަން އަމުރެއް ނެެރެފައި ނެތުމުން ފިލުމުގެ ފުރުސަތު އޮތް ކަމަށް ބެެލެވޭތީ އޭނާ ބަންދުން ދޫކޮށްލަން ދަށު ކޯޓުން ކުރި އަމުރު ބާތިލްކޮށް އަލުން ބަންދު ކުރަން އަމުރު ކުރާ ކަމަށެވެ.
އައްމަޓީގެ ކޮއްކޮ އަފީފާ މޫސާއާއި ދައްތަ މަރިޔަމް ނައީމާ ވެސް ކްރިމިނަލް ކޯޓަށް ހާޒިރުކޮށް އައްމަޓީ ފިލައިގެން ނުދާނެ ކަމުގެ ޔަގީން ކަން ދިނެވެ. ގާޒީ ދެން ވަނީ އައްމަޓީ ފިލައިގެން ގޮސްފި ނަމަ، އެ ދެ މީހުންނަށް އަންނާނެ އަބަދުތައް ވެސް ކިޔައިދެއްވައިފައެވެ.
މިއީ އާންމުންގެ ބަޔަކު އަތުން މަކަރާ ހީލަތުން ފައިސާ ހޯދި މައްސަލައަކަށްވާއިރު، އެމީހުންގެ އަތުން އެ ފައިސާ ހޯދާފައި ވަނީ އަނިޔާ ކޮށްގެންނެއް ނޫނެވެ. ފަނޑިޔާރު ވިދާޅުވެފައި ވަނީ، ނަމަވެސް ހިޔާނާތުގެ ސަބަބުން އެ މީހުންނަށް ބޮޑު ގެއްލުމެއް ލިބި ވަރަށް ބޮޑަށް އަސަރުކޮށްފައިވާ ކަމަށެވެ. އެހެންކަމުން މި މައްސަލައިގެ ބާވަތުން ކަފާލާތުގެ ދަށުން އަންމަޓީ ދޫނުކޮށްލެވޭނެ ކަމަށެވެ.
ކަފާލާތުގެ ދަށުން އައްމަޓީ ދޫކޮށްލަން ކްރިމިނަލް ކޯޓުން އަމުރުކޮށްފައިވަނީ މިދިޔަ މަހުގެ 20ވަނަ ދުވަހުއެވެ.
