މި ހިނގާ ނޮވެމްބަރު މަހުގެ 8 ވަނަ ދުވަހު ޖަޕާނަށް އައި ބިންހެލުމެއްގައި 24 މީހުން ޒަޚަމްވެ، ނަންކާއީ ޓްރަފްގައި ބާރުގަދަ ”މެގާކުއޭކް“ އެއް އަތުވެދާނެކަމުގެ ބިރުވެރިކަން އަލުން އުފެދިފައިވާ ދަނޑިވަޅެއްގައި، ކޮންމެ ވަގުތެއްގައި ވެސް ފަނާކުރަނިވި ބިންހެލުމެއް އަތުވެދާނެ ކަމުގެ އިންޒާރު ޖަޕާނުން ދީފިއެވެ.

ނޮވެމްބަރު 8 ވަނަ ދުވަހުގެ ހެނދުނު އައިޗީ ޕްރިފެކްޗާގެ އިރުމައްޗަށް އައި މި ބިންހެލުން ރެކޯޑުކުރެވިފައިވަނީ ޖަޕާނުގެ ހަތް ދަރަޖައިގެ ސިސްމިކް އިންޓެންސިޓީ ސްކޭލްގެ ”އަޕަރ 5“ ގައެވެ. މިއީ ފާއިތުވި ގާތްގަނޑަކަށް 30 އަހަރު ދުވަހުގެ ތެރޭގައި އެ ޕްރިފެކްޗާއަށް އައި އެންމެ ބާރުގަދަ ލޮޅުމެވެ. އަދި އަވަށްޓެރި ޝިޒުއޯކާ ޕްރިފެކްޗާއިން ވެސް މީހުންނަށް އަނިޔާވި ކަމަށް ރިޕޯޓުކޮށްފައިވެއެވެ.

މި ހާދިސާ ހިނގާފައި މިވަނީ، ބޮޑެތި ކުއްލި ނުރައްކަލުގެ ހާލަތްތަކަށް ގައުމުގެ އިޖާބަދިނުމުގެ ގާބިލުކަން އިތުރުކުރުމުގެ ގޮތުން ޖަޕާނުގައި އައު ޑިޒާސްޓަރ މެނޭޖްމަންޓް އެޖެންސީއެއް ނޮވެމްބަރު 2 ގައި އުފެއްދިތާ މަދު ދުވަސްކޮޅެއްގެ ތެރޭގައެވެ.

މި ބިންހެލުމާ ގުޅިގެން ޖަޕާން މީޓިއޮރޮލޮޖިކަލް އެޖެންސީން އެކުލަވައިލި މާހިރުންގެ ޕެނަލަކުން ނިންމާފައިވަނީ، މި ލޮޅުމުގެ ސަބަބުން ނަންކާއީ ޓްރަފްގައި ބޮޑު ބިންހެލުމެއް އައުމުގެ ފުރުސަތު އިތުރުވެފައިވާ ކަމުގެ އެއްވެސް ހެއްކެއް ނެތް ކަމަށެވެ. ނަމަވެސް، ކުރިއަށް އޮތް 30 އަހަރު ދުވަހުގެ ތެރޭގައި އެފަދަ ބިންހެލުމެއް އައުމުގެ ފުރުސަތު 60 އިންސައްތައާއި 90 އިންސައްތައާ ދެމެދު ނުވަތަ އެއަށްވުރެ ވެސް މަތި ކަމަށް މާހިރުން ލަފާކުރެއެވެ.

ޕެނަލްގެ ޗެއާމަން ނާއޯޝީ ހިރާތާ އިންޒާރު ދެއްވި ގޮތުގައި، މި ދިރާސާއަކީ ބޮޑު ބިންހެލުމެއް ނާންނާނެ ކަމުގެ ޔަގީންކަމެއް ކަމަށް ބަލައިގެން ނުވާނެއެވެ.

ޑިޒާސްޓަރ މެނޭޖްމަންޓް މިނިސްޓަރު ހޮސޯނޯ ވަނީ، ކާރިސާތަކަށް ތައްޔާރުވުމަކީ ފަރުދީ ޒިންމާއެއްގެ ގޮތުގައި ދެކުމަށް އާންމުންނަށް އިލްތިމާސްކުރައްވައި، ބާރުގަދަ ބިންހެލުންތަކަށް ތައްޔާރުވެ ތިބުމުގެ މުހިންމުކަން ފާހަގަކުރައްވާފައެވެ.

މީހުންގެ ފުރާނައަށާއި މުދަލަށް ލިބޭ ގެއްލުން ވީހާވެސް ކުޑަކުރުމަށްޓަކައި، ކޮންމެ ގެއަކުން ވެސް ރައްކާތެރިކަމުގެ ފިޔަވަޅުތައް އިތުރަށް ވަރުގަދަކުރަންޖެހޭ ކަމަށް ކަމާބެހޭ ފަރާތްތަކުން ވަނީ ބާރުއަޅުއްވާފައެވެ.