އެމެރިކާގެ ޑިފެންސް ސެކްރެޓަރީ ޕީޓް ހެގްސެތު އިޒްރޭލަށް ކުރެއްވި ކުއްލި ދަތުރުފުޅެއްގައި، އެ ޤައުމުގެ ބޮޑުވަޒީރު ބެންޖަމިން ނަތަންޔާހޫއާ ސިއްރު ބައްދަލުވުމެއް ބާއްވާފައިވާ ކަމަށް ރިޕޯޓްތައް ބުނެފިއެވެ. މި ބައްދަލުވުމާ ގުޅިގެން އީރާނާ ދެކޮޅަށް އަސްކަރީ ފިޔަވަޅުތައް އަލުން ފަށައިފާނެ ކަމުގެ ކަންބޮޑުވުންތައް ވަނީ އިތުރުވެފައެވެ.

އެކްސިއޯސްއިން ރިޕޯޓްކޮށްފައިވާ ގޮތުގައި، މި ބައްދަލުވުން ކުރިއަށް ގޮސްފައިވަނީ އަންނަ ހަފުތާގައި އޮންނަ އިޒްރޭލުގެ ޕާލަމެންޓް އިންތިޚާބުގެ ކުރިން، އެމެރިކާގެ ރައީސް ޑޮނަލްޑް ޓްރަމްޕް ނަތަންޔާހޫއަށް ތާއީދުކުރެއްވުމާ ގުޅިގެން، ދެ ލީޑަރުންގެ ސިޔާސީ ގުޅުން އަލުން ބަދަހިވަމުން އަންނަ ދަނޑިވަޅެއްގައެވެ. ނަމަވެސް، މިފަދަ ބައްދަލުވުމެއް ބޭއްވިކަން އެމެރިކާއިން ނުވަތަ އިޒްރޭލުން ވެސް ރަސްމީކޮށް ކަށަވަރުކޮށްދީފައެއް ނުވެއެވެ.

މުޙައްލިލުން ވިދާޅުވާ ގޮތުގައި ޓްރަމްޕްގެ ތާއީދުގެ ސަބަބުން ނަތަންޔާހޫގެ އިންތިޚާބީ ކެމްޕޭނަށް ބާރެއް ލިބިގެންދާނެއެވެ. އެހެންނަމަވެސް އޭގެ ސަބަބުން ކުރާނެ އަސަރެއް އަދި ސާފެއް ނޫނެވެ. ޚިޔާލު ހޯދުމުގެ ވޯޓުތަކުން ދައްކާ ގޮތުގައި، ނަތަންޔާހޫގެ ދީނީ-ޤައުމީ ކޯލިޝަނަށް އޮތް އަޣުލަބިއްޔަތު ގެއްލިދާނެ ކަމަށް ބެލެވެއެވެ. އަދި އިދިކޮޅު ޕާޓީތަކަށް ވެސް ސަރުކާރެއް އެކުލަވައިލުމުގައި ގޮންޖެހުންތަކާ ކުރިމަތިލާން ޖެހޭނެ ކަމަށް ދައްކައެވެ.

މާހިރުން އިންޒާރު ދެއްވާ ގޮތުގައި، އީރާނުގެ ހަނގުރާމައަށް ޓްރަމްޕް ދެއްވާ ސަމާލުކަމަކީ އަލުން ހަމަލާތައް ދިނުމަށް ވެވޭ ތައްޔާރީތަކެއްގެ އިޝާރާތަކަށް ވެދާނެއެވެ. އެމެރިކާގެ ބައެއް މީޑިއާ ރިޕޯޓްތައް ބުނާ ގޮތުގައި، ނޮވެމްބަރު މަހުގެ ކުރީކޮޅު އޮންނަ އެމެރިކާގެ މިޑްޓާމް އިންތިޚާބުގެ ކުރިން އަސްކަރީ ފިޔަވަޅެއް އެޅުމަށް ޕެންޓަގަނުން ދަނީ ތައްޔާރުވަމުންނެވެ.

އެހެންނަމަވެސް، މުޙައްލިލުން ފާހަގަކުރައްވާ ގޮތުގައި ޓްރަމްޕް ނަތަންޔާހޫއަށް ތާއީދުކުރެއްވި ނަމަވެސް، އޭގެ މާނައަކީ އިތުރު އަސްކަރީ އޮޕަރޭޝަނެއް ހިންގުމަށް ދެބޭފުޅުންގެ މެދުގައި އެއްބަސްވުމަކަށް އާދެވުނީކީ ނޫނެވެ.

މިދަނޑިވަޅުގައި، އެމެރިކާގެ ނައިބު ރައީސް ޖޭޑީ ވެންސް ވަނީ އިޒްރޭލުގެ އިންތިޚާބާ ދުރުހެލިވެވަޑައިގެންފައެވެ. އަދި އެ ބޭފުޅާ ނަތަންޔާހޫއަށް ތާއީދު ނުކުރައްވާނެ ކަމަށާއި، އަދި ދެކޮޅުވެސް ނުހައްދަވާނެ ކަމަށް ވިދާޅުވިއެވެ. މީގެ ކުރިން ވެންސް ވަނީ މި ހަނގުރާމައާ ގުޅިގެން ނަތަންޔާހޫއަށް ފާޑުވިދާޅުވެ، އެމެރިކާ މި ހަނގުރާމައިގެ ތެރެއަށް ވައްދަން މަސައްކަތްކުރައްވާ ކަމަށް ތުހުމަތުކުރައްވާފައެވެ.

މި ކަންކަން މިގޮތަށް ހިނގަމުން މިދަނީ، 7 އޮކްޓޫބަރުގައި ޙަމާސްއިން އިޒްރޭލަށް ދިން ހަމަލާއަށްފަހު މެދުއިރުމަތީގައި ފެށިގެންދިޔަ ފުޅާ ދާއިރާއެއްގެ ހަނގުރާމައާ ގުޅިގެން، ސަރަޙައްދީ ނުތަނަވަސްކަން އަދިވެސް މަތީ ދަރަޖައެއްގައި ދެމިއޮތް ދަނޑިވަޅެއްގައެވެ.