ރަޝިޔާގެ އިރްކުޓްސްކް ސަރަޙައްދުގައި ތޯޢޫން ބަލި ޖެހިގެން 28 އަހަރުގެ ލެބޯޓްރީ ޓެކްނީޝަނަކު މަރުވުމާއި ގުޅިގެން ބިރުވެރިކަން އުފެދި، 200 އަށް ވުރެ ގިނަ މީހުން ކަރަންޓީނުކޮށް، ފަސް ހޮސްޕިޓަލެއް ވަގުތީ ގޮތުން ބަންދުކޮށްފިއެވެ.

މި ހާދިސާ ހިނގާފައިވަނީ ސައިބީރިއާގެ އެކަހެރި ސަރަޙައްދެއްގައި އޮންނަ އަވަށެއް ކަމަށްވާ ޝެލެޚޯވްގައި ހުންނަ އެންޓި-ޕްލޭގް ރިސާޗް އިންސްޓިޓިއުޓުގައެވެ. ދާރިޔާ ޝިޕިލޯވާ ކަމަށް ދެނެގަނެވިފައިވާ މި ޓެކްނީޝަން މެޑިކަލް ސްޓާފުންނަށް ކިޔައިދީފައިވާ ގޮތުގައި، ޓެސްޓު ކުރުމަށް ސާމްޕަލް ނަގަމުން ދަނިކޮށް، ދިރިހުރި ބެކްޓީރިއާ އެކުލެވޭ ޓެސްޓް ޓިއުބެއް އޭނާގެ އަތުން ވަނީ އޮޅުމަކުން ތެޅިފައެވެ.

ނިއުމޯނިއާގެ ނުރައްކާތެރި އަލާމާތްތައް ފެނުމާ ގުޅިގެން ޝިޕިލޯވާ ހޮސްޕިޓަލުގައި އެޑްމިޓްކުރީ ސެޕްޓެމްބަރު 29 ގައެވެ. ރިޕޯޓްތައް ބުނާ ގޮތުގައި އޭނާގެ ހާލަތު ވަރަށް އަވަހަށް ގޯސްވެ، ވެންޓިލޭޓަރަށް ލުމަށްފަހު، އޮކްޓޫބަރު 1 ގައި ވަނީ މަރުވެފައެވެ.

އޭނާއާ ދިމާވެފައިވާ ކަމަށް ބެލެވޭ 200 އަށް ވުރެ ގިނަ މީހުން މިހާރު ވަނީ ކަރަންޓީނުކޮށްފައެވެ. އަދި މި ޝައްކުކުރެވޭ އިންފެކްޝަން ކޮންޓްރޯލް ކުރުމަށް ކަމާބެހޭ ފަރާތްތަކުން މަސައްކަތް ކުރަމުންދާތީ، އިރްކުޓްސްކް ސަރަޙައްދުގައި ބޭއްވުމަށް ހަމަޖެހިފައިވާ އާންމު ހަރަކާތްތައް ވެސް ވަނީ ކެންސަލްކޮށްފައެވެ.

ތޯޢޫން ބައްޔަކީ ފުއްޕާމެޔަށް އަސަރުކުރާ، އަދި ފަރުވާ ނުދެވި ލަސްވެއްޖެނަމަ ފުރާނައަށް ނުރައްކާވާ ފަދަ ވަރަށް ފަސޭހައިން ގައިންގަޔަށް އަރާ ބައްޔެކެވެ. މިއީ ނޭވާލާ ނިޒާމުގެ ޒަރީއާއިން ބުރައިގެންދާ ތިކިތަކުގެ ސަބަބުން ވެސް މީހުންގެ މެދުގައި ފެތުރޭ ބައްޔެކެވެ.

އިރްކުޓްސްކްގެ ގަވަރުނަރު އިގޯރް ކޮބްޒެވް ފުރަތަމަ މި ހާދިސާ ސިފަކުރެއްވީ ”ވަކިން ޚާއްޞަކޮށް ނުރައްކާތެރި އިންފެކްޝަނެއް“ ގެ ގޮތުގައެވެ. އަދި ރައްޔިތުން ހަމަޖެހިގެން ތިބުމަށް އޭނާ އިލްތިމާސްކުރެއްވިއެވެ. ނަމަވެސް، ފަހުން އޭނާ ވިދާޅުވީ މިއީ ސަބަބު ނޭނގޭ ނިއުމޯނިއާ ކޭހެއްގެ ގޮތުގައި ބަލަން ފަށާފައިވާ ކަމަށެވެ.

ކޮބްޒެވް ވިދާޅުވި ގޮތުގައި ޝިޕިލޯވާގެ މަސައްކަތާ ގުޅުންހުރި މައިކްރޯއޯގަނިޒަމްތަކެއް އޭނާގެ ސާމްޕަލްތަކުން ފެނިފައެއް ނުވެއެވެ. އަދި ވޭތުވެދިޔަ 10 ދުވަހުގެ ތެރޭގައި އެ ރިސާޗް އިންސްޓިޓިއުޓުގެ އެއްވެސް މުވައްޒަފެއްގެ ފަރާތުން ގައިންގަޔަށް އަރާ ބައްޔެއްގެ އެއްވެސް އަލާމާތެއް ރިޕޯޓްކޮށްފައި ނުވާ ކަމަށްވެސް އޭނާ ވިދާޅުވިއެވެ.

ކަމާބެހޭ ފަރާތްތަކުން ބުނީ ކޮންޓެކްޓްވި ކަމަށް ފާހަގަކުރެވުނު ހުރިހާ އެންމެން ޓެސްޓުކޮށް، މެޑިކަލް އޮބްޒަވޭޝަންގެ ދަށަށް ގެނެސް، ކޮންމެ ދުވަހަކު ލެބޯޓްރީ ޓެސްޓުތައް ހަދަމުންދާ ކަމަށެވެ. މީގެއިތުރުން، ރަޝިޔާގެ ކޮންސިއުމަރ ސޭފްޓީ ވޮޗްޑޮގް، ރޮސްޕޮޓްރެބްނަޑްޒޯރ އިން ވެސް ދަނީ ބަލި ފެތުރުން ހުއްޓުވުމަށް ކުއްލި ފިޔަވަޅުތަކެއް އަޅަމުންނެވެ.

އަވަށްޓެރި ބުރިޔާތިއާގެ ގަވަރުނަރު އެލެކްސީ ސިދެނޯވް އޮކްޓޫބަރު 2 ގައި ވިދާޅުވީ، އިރްކުޓްސްކް ސަރަޙައްދުގެ އަންހެނަކު މަރުވީ ތޯޢޫން ބަލި ޖެހިގެން ކަމަށް ބެލެވޭ ކަމަށެވެ. ނަމަވެސް ބުރިޔާތިއާގައި ތޯޢޫން ބަލީގެ ބަލިމަޑުކަމެއް ފެތުރިފައި ނުވާ ކަމަށް އޭނާ ވިދާޅުވިއެވެ.