އީރާނާ ގުޅުން އޮންނަ ހޫތީ ޖަމާއަތާއި ސައޫދީ އަރަބިއްޔާއާ ދެމެދު ހިނގަމުންދާ ހަނގުރާމަ އިތުރަށް ވަރުގަދަވަމުންދާ ދަނޑިވަޅެއްގައި، ރިޔާޒުގައި ހުންނަ އަރާމްކޯގެ މަރުކަޒަކަށް މިސައިލާއި ޑްރޯން ބޭނުންކޮށްގެން ހަމަލާދިން ކަމުގެ ޒިންމާ ޔަމަނުގެ ހޫތީ ހަނގުރާމަވެރިން އުފުލައިފިއެވެ.ހޫތީންގެ އަސްކަރީ ތަރުޖަމާނު ޔަޙްޔާ ސަރީޢު ހޮނިހިރު ދުވަހު ވިދާޅުވީ، ސައޫދީގެ ތެޔޮ ކުންފުނީގެ މަރުކަޒަކަށް ބެލިސްޓިކް މިސައިލާއި ޑްރޯން ބޭނުންކޮށްގެން އެ ޖަމާއަތުން އަސްކަރީ އޮޕަރޭޝަނެއް ހިންގާފައިވާ ކަމަށެވެ. އަދި މި ހަމަލާތައް އަމާޒަށް ސީދާ ވާސިލުވެ، އެ ތަނުގައި އަލިފާން ރޯވި ކަމަށް އޭނާ ދައުވާ ކުރެއްވިއެވެ.ހޮނިހިރު ދުވަހު ރިޔާޒުގެ ދެކުނުގައި ހުންނަ އަރާމްކޯގެ މަރުކަޒެއްގެ ކައިރިން ބޯ ދުމާއި އަލިފާންގަނޑު އަރަމުންދާތަން ވަނީ ފެނިފައެވެ. ނަމަވެސް، އެ މަރުކަޒަށް ހަމަލާއެއް ދީފައިވާ ކަން ސައޫދީގެ ކަމާބެހޭ ފަރާތްތަކުން ކަށަވަރުކޮށްދީފައެއް ނުވެއެވެ. އަދި އަލިފާން ރޯވާން މެދުވެރިވި ސަބަބާ ގުޅޭގޮތުން އަރާމްކޯއިން ވެސް އެއްވެސް އެއްޗެއް ބުނެފައެއް ނުވެއެވެ.މި ދައުވާ ކޮށްފައި މިވަނީ، ޔަމަނުގައި ހޫތީންނާ ދެކޮޅަށް ސައޫދީ އިސްވެ އޮންނަ ކޯލިޝަނުން ކުރިއަށްގެންދާ އަސްކަރީ އޮޕަރޭޝަންތައް ވަރުގަދަކޮށްފައިވާ ދަނޑިވަޅެއްގައެވެ. ކޯލިޝަނުން އާދީއްތަ ދުވަހުގެ ފަތިހު ބުނި ގޮތުގައި، މަތިންދާބޯޓާއި، ޑްރޯން، އާޓިލަރީ، މިސައިލް އަދި ސްނައިޕަރުން ބޭނުންކޮށްގެން، ތޯރުލް ބާހާ ފްރަންޓާއި ތާއިޒްގެ ސަރަހައްދުގައި ހޫތީންގެ އިތުރު ބާރުތަކާ ދެކޮޅަށް 97 އޮޕަރޭޝަނެއް ވަނީ ހިންގާފައެވެ.ޔަމަނުގެ ސަރުކާރުގެ ފައުޖުތަކުން ބުނި ގޮތުގައި، މި އޮޕަރޭޝަންތަކުގައި މަދުވެގެން ހޫތީންގެ 260 ހަނގުރާމަވެރިންނަށް އަމާޒުކޮށްފައިވާ އިރު، އަސްކަރީ 44 އުޅަނދެއް ވަނީ ހަލާކުކޮށްލާފައި ނުވަތަ ބޭނުން ނުކުރެވޭ ވަރު ކޮށްލާފައެވެ.މީގެ އިތުރުން ޔަންބޫގައި ހުންނަ އަރާމްކޯގެ މަރުކަޒުތަކަށާއި މަދީނާގެ އިންޖީނުގެއަކަށް ފަހުން ހަމަލާދިން ކަމަށް ވެސް ހޫތީން ވަނީ ބުނެފައެވެ. ސައޫދީ އަރަބިއްޔާއިން މީގެ ކުރިން ބުނެފައިވަނީ، ތާއިފާއި ޔަންބޫއާ ދިމާއަށް ފޮނުވާލި ބެލިސްޓިކް ހަ މިސައިލެއް ވައްޓާލާފައިވާ ކަމަށެވެ.މި ފަހަކަށް އައިސް ހަމަނުޖެހުންތައް އިތުރުވެގެން ދިޔައީ މިއަހަރުގެ ޖުލައި މަހު އެކުލަވާލި ނާޒުކު، ހަނގުރާމަ ހުއްޓާލުމުގެ އެއްބަސްވުން ރޫޅުމާ ގުޅިގެންނެވެ. ސެޕްޓެމްބަރު މަހު ހޫޘީން ވަނީ މޯކާ އަދި ބާބުލް މަންދަބު ކަނޑުއޮޅި ކައިރީގައިވާ ސްޓްރެޓީޖިކް ރަށްތަކެއްގެ ބާރު ނަގާފައެވެ. ނަމަވެސް ފަހުން ހޫޘީންނާ ދެކޮޅު ފައުޖުތަކުން ވަނީ ކުރީ ސަފުގެ ކޮންޓްރޯލް ހަމައަކަށް އަޅުވާފައެވެ.ޔަމަނުގެ ހަނގުރާމަ ފެށުނީ 2014 ވަނަ އަހަރު ހޫތީންގެ ވެރިރަށް ސަންޢާގެ ބާރު ނަގައި، ބައިނަލްއަޤްވާމީ ގޮތުން ބަލައިގަންނަ ސަރުކާރު އަބަދަށް ފަހަތަށް ޖެހެން މަޖުބޫރު ކުރުވުމާ ގުޅިގެންނެވެ. އަލުން ހަނގުރާމަ ފެށުނު ފަހުން އެ ގައުމުގެ އެތައް ލައްކަ ބަޔަކު ވަނީ ގެދޮރު ގެއްލި ހާލުގައި ޖެހިފައެވެ.