ދުބާއީން ފުރައިގެން އިސްރާއީލުގެ ތެލް އަވީވަށް ދަތުރުކުރި ފްލައިދުބާއީގެ ފްލައިޓެއްގެ ކޮންޓްރޯލް އަތުލަން އުޅުނު ކަމަށް ތުހުމަތުކުރެވޭ ކޯ-ޕައިލެޓް، އެ ފްލައިޓުގެ ކެޕްޓަނަށް ކުއްލި ހާލަތްތަކުގައި ބޭނުންކުރާ ކޯރާޑިއަކުން ހަމަލާދީފައިވާ ކަމަށް ޔުނައިޓެޑް އަރަބް އެމިރޭޓްސްގެ ޕްރޮސެކިއުޓާ ޖެނެރަލް ވިދާޅުވެއްޖެއެވެ.

170 އަށް ވުރެ ގިނަ މީހުންނާއެކު ދަތުރުކުރި މި ފްލައިޓް، ދުބާއީން ފުރިތާ ގާތްގަނޑަކަށް ދެ ގަޑިއިރާއި ބައި ފަހުން ވަނީ ގާތްގަނޑަކަށް 17،000 ފޫޓު ތިރިއަށް ވެއްޓިފައެވެ. އެ މަތިންދާބޯޓުން އެންމެ ފުރަތަމަ ފޮނުވީ އާންމު ކުއްލި ނުރައްކަލުގެ ސިގްނަލެކެވެ. ނަމަވެސް އޭގެ ފަހުން ވަނީ ޣައިރުގާނޫނީ ނުފޫޒެއް ނުވަތަ ބޯޓު ހައިޖެކް ކުރަން އުޅޭކަން އަންގައިދޭ ކޯޑަކަށް ބަދަލުކޮށްފައެވެ.

މި ހަމަލާގައި އިންޑިއާގެ ރައްޔިތެއް ކަމަށްވާ ކެޕްޓަން ސްމިތު މަޗާރަށް އަނިޔާވި ނަމަވެސް، ބޯޓުގެ އުސްމިން ދަށްވަމުންދާކަން އެނގުމުން އޭނާ ވަނީ ކޮކްޕިޓްގެ ދޮރު ހުޅުވޭތޯ މަސައްކަތްކޮށް އެކަން ކާމިޔާބުކޮށްފައެވެ. އެއަށްފަހު ފަސިންޖަރުން ކޮކްޕިޓަށް ވަދެ، ހަމަލާދިން މީހާ ހިފަހައްޓައި ކޮންޓްރޯލް ކުރިއެވެ.

އޭގެ ފަހުން، އެ ބޯޓުގައި ތިބި ރިޒާވް ދެ ޕައިލެޓުން ބޯޓުގެ ކޮންޓްރޯލް ނަގައި، ސައުދީ އަރަބިއްޔާގެ ހުޅަނގު އުތުރުގައިވާ ތަބޫކް އެއާޕޯޓަށް ބޯޓު ސަލާމަތްތެރިކަމާއެކު ޖެއްސިއެވެ. މަޗާރު ހޮސްޕިޓަލަށް ގެންދިއުމަށްފަހު، އިތުރު ފަރުވާއަށް ވައިގެ މަގުން އަބޫދާބީއަށް އޭނާ ވަނީ ބަދަލުކޮށްފައެވެ. އިންޑިއާ އެމްބަސީން ބުނީ އޭނާގެ ހާލު ރަނގަޅުވަމުން އަންނަ ކަމަށެވެ.

ޔޫއޭއީގެ އެޓާނީ ޖެނެރަލް ހަމަދު ސައިފް އަލް ޝަމްސީ ވިދާޅުވީ، ކޯ-ޕައިލެޓް މަސައްކަތްކުރީ ޓެރަރިސްޓް އަމަލެއް ހިންގަންކަން ތަހުގީގަށް އެނގިފައިވާ ކަމަށެވެ. ކަމާބެހޭ ފަރާތްތަކުން ދަނީ މި ހާދިސާ ހިނގަން މެދުވެރިވި ސަބަބާއި، އޭނާގެ މަގްސަދާއި، އަދި މިކަމާ ގުޅުންހުރި އެއްވެސް އިތުރު ގުޅުމެއް ވޭތޯ ބެލުމަށް ތަހުގީގު ކުރިއަށް ގެންދަމުންނެވެ.

ހަމަލާދިން މީހަކީ އޮމާންގެ ރައްޔިތެއް ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ވިދާޅުވެފައެވެ. ބައެއް މީޑިއާތަކުން އޭނާގެ ނަމަކީ ހަމާމް އަލް-ހައްމާމީ ކަމަށް ބުނި ނަމަވެސް، ކަމާބެހޭ ފަރާތްތަކުން ރަސްމީކޮށް އޭނާގެ ނަން ކަށަވަރުކޮށްދީފައެއް ނުވެއެވެ.

ނަތަންޔާހޫ ވިދާޅުވީ، ހަމަލާދިން މީހާ ކޮންޓްރޯލް ކުރުމުން، އޭނާ މަރާލުމަށް ފަޅުވެރިންގެ ކިބައިން ހަޅޭއްލަވައި އެދުނު ކަމަށެވެ. މިއިން ދޭހަވަނީ އޭނާގެ މަގްސަދަކީ ބޯޓު ވައްޓާލުން ކަމަށް ވެދާނެ ކަމަށެވެ. މީގެ އިތުރުން، އެމީހާއަކީ ހަރުކަށި އިސްލާމީ ފިކުރުގެ ނުފޫޒު ފޯރުވާފައިވާ މީހެއް ކަމަށްވެސް އޭނާ ތުހުމަތު ކުރެއްވިއެވެ. އެހެން ނަމަވެސް މިއީ މުސްލިމުންގެ އަގު ވައްޓާލުމަށްޓަކައި ފަތުރާ ދޮގު ޚަބަރަކަށް ވުމާއި ގާތެވެ.

މި ހަމަލާ ހުއްޓުވުމުގައި ފަސިންޖަރުން ވަނީ ވަރަށް މުހިންމު ދައުރެއް އަދާކޮށްފައެވެ. ރިޕޯޓްތައް ބުނާ ގޮތުގައި، ހަމަލާދިން މީހާ ހިފެހެއްޓުމަށް އެހީތެރިވުމަށްފަހު، އެއް ފަސިންޖަރަކު ވަގުތީ ގޮތުން ބޯޓުގެ ކޮންޓްރޯލާއި ވެސް ހަވާލުވިއެވެ.

މި ހާދިސާ ތަހުގީގު ކުރަމުން ދަނީ ވަރަށް ”ސެންސިޓިވް“ ބައިނަލްއަގުވާމީ ރޫޓެއްގައި ހިނގައިދިޔަ ސަލާމަތީ ގޮތުން ނުރައްކާތެރި ބޮޑު މައްސަލައެއްގެ ގޮތުގައެވެ.