ސްކޫލްތަކުގެ ހާލަތާއި މެދު ހިތްހަމަނުޖެހުން ފާޅުކޮށް ފަރަންސޭސިވިލާތުގެ ދަރިވަރުން ކުރަމުންދާ އިހުތިޖާޖުތައް ހުކުރު ދުވަހު މުޅި ގައުމަށް ފެތުރިގެން ގޮސްފައިވާއިރު، އެކި ސިޓީތަކުގައި މުޒާހަރާގެ ބައިވެރިންނާއި ފުލުހުންނާ ދެމެދު ވަނީ ކުރިމަތިލުންތަކެއް ހިނގައިފައެވެ.

ފްރާންސްގެ އެޑިއުކޭޝަން މިނިސްޓްރީން ބުނި ގޮތުގައި ގާތްގަނޑަކަށް 400 ސްކޫލް ބަންދުކޮށްފައިވާއިރު، އެ ގައުމުގެ 3،700 ހައިސްކޫލްގެ ތެރެއިން 564 ސްކޫލެއްގައި ކިޔަވައިދިނުމަށް ވަނީ ބުރޫއަރައިފައެވެ.

މި އިހުތިޖާޖުތައް މުޅި ގައުމަށް ފެތުރުމުގެ ކުރިން، މުޒާހަރާތައް ފުރަތަމަ ފެށުނީ ސެޕްޓެމްބަރު މަހު ޕެރިސްގެ ސަރަހައްދުގައެވެ. ދަރިވަރުން ވަނީ ސްކޫލްތަކުގެ ގޭޓުތައް ބަންދުކޮށް، ކިޔަވައިދޭ ވަގުތު ދިގުވުމާއި، ވަސީލަތްތައް އެކަށީގެންވާ ގޮތެއްގައި ނެތުމާއި، ކްލާސްރޫމްތައް މާބޮޑަށް ހޫނުވުމާއި، މުވައްޒަފުން މަދުވުން ފަދަ ކަންބޮޑުވުންތަކަށް ކަމާބެހޭ ފަރާތްތަކުން ހައްލު ހޯދައިދީފައި ނުވާ ކަމަށް ބުނެ އަޑުއުފުލައިފައެވެ.

ޕެރިހުގައި ރޯކޮށްލި އަލިފާނުގެ ސަބަބުން ދެ ހައިސްކޫލެއްގެ ދޮރޯށްޓަށް ގެއްލުން ލިބިފައިވާއިރު، އަލިފާން ނިއްވުމަށް ފަޔަރފައިޓަރުން ވަނީ ހަރަކާތްތެރިވެފައެވެ. ބްރެސްޓް، ޓޫލޫޒް އަދި އޮބަރވިލިއަރސް ހިމެނޭ ގޮތަށް ބައެއް ސިޓީތަކުގައި މުޒާހަރާ ރޫޅާލުމަށް ފުލުހުން ވަނީ ކަރުނަގޭހާއި މުގުރު ބޭނުންކޮށްފައެވެ.

އިންޓީރިއަރ މިނިސްޓަރު ލޯރެންޓް ނޫނޭޒް ވަނީ ބެލްފޯޓްގައި ޒުވާނުންތަކެއް ވެގެން ފުލުހަކަށް ހަމަލާދިން ހާދިސާ ކުށްވެރިކުރައްވައިފައެވެ. މި ހާދިސާއާ ގުޅިގެން އުމުރުން 17 އަހަރުގެ ދަރިވަރަކު ވަނީ ހައްޔަރުކޮށްފައެވެ.

އެޑިއުކޭޝަން މިނިސްޓަރު އެޑުއާޑް ގެފްރޭ ވިދާޅުވީ އިހުތިޖާޖުތައް ފެށުނު ފަހުން ސްކޫލްތަކުގެ 65 މުވައްޒަފަކަށް އަނިޔާވެފައިވާ ކަމަށާއި އޭގެ ތެރޭގައި 40 ޕްރިންސިޕަލުން ހިމެނޭ ކަމަށެވެ. އަދި ގާތްގަނޑަކަށް 170 ދަރިވަރަކަށް އަނިޔާވެ، 100 އަށް ވުރެ ގިނަ ސްކޫލަށް ބޮޑެތި ގެއްލުންތަކެއް ލިބިފައިވާ ކަމަށްވެސް އޭނާ ވިދާޅުވިއެވެ.

ކަމާބެހޭ ފަރާތްތަކުން ބުނި ގޮތުގައި ގާތްގަނޑަކަށް 2،000 މީހުން ފުލުހުންގެ ބަންދަށް ގެންގޮސްފައިވާއިރު، އޭގެ ތެރެއިން 90 އިންސައްތައަކީ ކުޑަކުދިންނެވެ. ޖަސްޓިސް މިނިސްޓަރު ޖެރަލްޑް ޑަރމަނިން ވިދާޅުވީ ކުދިން ދޭ ގެއްލުންތަކަށް އެކުދިންގެ މައިންބަފައިން މާލީ ގޮތުން ޒިންމާވާން ޖެހިދާނެ ކަމަށެވެ.