ދުބާއީން އިސްރާއީލަށް ދަތުރުކުރި ފްލައިދުބާއީގެ ފްލައިޓެއް، ހައިޖެކްކޮށްފައިވާ ކަމަށް ބެލެވޭ ފަދަ ކުއްލި ނުރައްކަލުގެ ކޯޑުތަކެއް ފޮނުވުމަށްފަހު، ސައުދީ އަރަބިއްޔާއަށް ކުއްލި ހާލަތުގައި ޖައްސައިފިއެވެ.

ބޮއިންގ 737 މެކްސް 8 މަރުކާގެ މަތިންދާބޯޓެއްގައި ދަތުރުކުރި ފްލައިޓް އެފްޒެޑް1073 ދުބާއީ އިންޓަނޭޝަނަލް އެއާޕޯޓުން ބެން ގޫރިއަން އެއާޕޯޓަށް ދަތުރުކުރަމުން ދަނިކޮށް، ފުރަތަމަ ފޮނުވީ ބައިނަލްއަގުވާމީ ކުއްލި ހާލަތުގެ ކޯޑު 7700 އެވެ. އަދި އޭގެ ފަހުން، ގަވާއިދާ ހިލާފު ނުފޫޒެއް ފޯރުވުން ނުވަތަ ބޯޓު ހައިޖެކްކޮށްފިކަން އަންގައިދޭ ކޯޑު 7500 އަށް ބަދަލުކުރިއެވެ.

އިސްރާއީލުގެ ގާތްގަނޑަކަށް 180 ފަސިންޖަރުންނާއެކު ދަތުރުކުރި މި ބޯޓު ވަނީ ސައުދީ އަރަބިއްޔާގެ ތަބޫކަށް ރައްކާތެރިކަމާއެކު ޖައްސާފައެވެ. ކުއްލި ނުރައްކަލުގެ ސިގްނަލް ލިބުމާއެކު، އިސްރާއީލުގެ ކަމާބެހޭ ފަރާތްތަކުން އަސްކަރީ ޖެޓުތައް ފޮނުވި ކަމަށް ރިޕޯޓުތައް ބުނެއެވެ.

އިސްރާއީލުގެ މީޑިއާތަކާއި އޮފިޝަލުން ފަހުން ރިޕޯޓުކުރި ގޮތުގައި، މި ހާދިސާ ހިނގަން މެދުވެރިވީ ކޮކްޕިޓް ތެރޭގައި ދެ ޕައިލެޓުންގެ ދެމެދުގައި ހިނގި ވަރުގަދަ މާރާމާރީއަކާ ގުޅިގެންނެވެ. ފަސިންޖަރުން އެ ގައުމުގެ މީޑިއާތަކަށް މައުލޫމާތު ދިން ގޮތުގައި، ކޮކްޕިޓްގެ ދޮރު ހުޅުވުމުގެ ކުރިން ހަޅޭއްލަވާ އަޑު އިވުނު ކަމަށާއި، ކޮކްޕިޓް ތެރެއިން ލޭ ފެނުނު ކަމަށް ވެއެވެ.

ފަސިންޖަރަކު ބުނި ގޮތުގައި އެއް ޕައިލެޓުގެ ގަޔަށް ވަޅިއަކުން ހަމަލާދީފައިވާ ކަމަށާއި، އެ މާރާމާރީ ހުއްޓުވުމަށް ފަސިންޖަރުންނާއި ކްރޫއިން ވަނީ ވަދެފައެވެ. އެހެން ބައެއް ރިޕޯޓުތައް ބުނާ ގޮތުގައި އެއް ޕައިލެޓު ވަނީ ބޯޓު ވައްޓާލަން މަސައްކަތްކޮށްފައެވެ. ނަމަވެސް މި ތަފްސީލުތައް އަދި ކަށަވަރުވެފައެއް ނުވެއެވެ.

ސީ.އެން.އެން އިން ހަވާލާދީފައިވާ ފްލައިޓް ޑޭޓާތަކުން ދައްކާ ގޮތުގައި، ކުއްލި ނުރައްކަލުގެ ސިގްނަލް ފޮނުވުމުގެ ކުރިން، ދެ މިނެޓުގެ ތެރޭގައި ބޯޓު ވަނީ ގާތްގަނޑަކަށް 17،400 ފޫޓު ތިރިއަށް ތިރިވެފައެވެ.