ޑިމޮކްރެޓިކް ރިޕަބްލިކް އޮފް ކޮންގޯ ނުވަތަ އާންމު ނަމުން ނަމަ ޑީއާރު ކޮންގޯ ގެ ތާރީހުގައިވެސް ކުރިމަތިވި އެބޯލާ ބަލިމަޑުކަމުގެ އެންމެ ނުރައްކާތެރި ރާޅުގައި، އެ ބަލި ޖެހުނު މީހުންގެ އަދަދު 8،000 އިން މައްޗަށް އަރައި، މަރުވި މީހުންގެ އަދަދު 3،901 އަށް އަރައިފިއެވެ.
އެ ގައުމުގެ ޕަބްލިކް ހެލްތު އިންސްޓިޓިއުޓުން އާންމުކުރި އެންމެ ފަހުގެ މައުލޫމާތުތަކަށް ބަލާއިރު، ބަލިޖެހުނު މީހުންގެ ތެރެއިން މަރުވި މީހުންގެ ނިސްބަތް އުޅެނީ 48.4 އިންސައްތައިގައެވެ.

މި ހިނގާ 2026 ވަނަ އަހަރުގެ މޭ 15 ގައި ރަސްމީކޮށް އިއުލާންކުރި މި ބަލިމަޑުކަން ކޮންޓްރޯލްކުރުމަށް އޮތް އެންމެ ބޮޑު ގޮންޖެހުމަކީ ސަރުކާރުގެ ސިޔާސަތުތަކާމެދު އާންމުންގެ އިތުބާރު ނެތުމާއި އުފެދިފައިވާ ނުރުހުމެވެ. އެގޮތުން، ނޯތު ކިވޫ ޕްރޮވިންސްގެ ބުޓެމްބޯގައި ރޭޑިއޯ މެދުވެރިކޮށް އިބޯލާއިން ރައްކާތެރިވުމުގެ މައުލޫމާތު ދިނުމަށްފަހު އެނބުރި ވަޑައިގެންނެވި، ވެރިކަން ކުރާ ޔޫޑީޕީއެސް ޕާޓީގެ އިސް މެންބަރެއް ކަމަށްވާ މޭރީ-ސެލެސްޓިން ކަރޮންޑްވާ އަށް އާންމުންގެ ބަޔަކު ހަމަލާދީ ވަނީ އަވަހާރަކޮށްލާފައެވެ.
އެފްރިކަން ޔޫނިއަންގެ ހެލްތު އެޖެންސީއިން ބުނާ ގޮތުގައި، ހަލުވިކަމާއެކު އިތުރުވަމުންދިޔަ ކޭސްތަކުގެ އަދަދު މިހާރު އެއްވަރެއްގައި ހިފެހެއްޓިފައިވީ ނަމަވެސް، ބަލިމަޑުކަން އޮތީ ”ކޮންޓްރޯލް ކުރެވިފައި“ ނޫން ކަމަށެވެ.
މިފަހަރު ފެތުރެމުންދަނީ އެޕްރޫވް ކުރެވިފައިވާ ވެކްސިނެއް ނުވަތަ ފަރުވާއެއް ނެތް ”ބުންޑިބުގްޔޯ“ ސީކުއެންސްގެ އިބޯލާ ވައިރަހެކެވެ. ނަމަވެސް، މި ވައިރަހަށް ހާއްސަކޮށްގެން ތައްޔާރުކުރާ ބައެއް ފަރުވާތަކާއި ވެކްސިންތަކުގެ ޓްރަޔަލްތައް އަންނަނީ ހިންގަމުންނެވެ.
ޑީއާރު ކޮންގޯގައި ފެތުރޭ އެބޯލާ ބަލީގެ 17 ވަނަ ރާޅު ހަލުވިކަމާއެކު ފެތުރެން ދިމާވި މުހިންމު ސަބަބުތަކުގެ ތެރޭގައި ސިއްހީ ނިޒާމު އެކަށީގެންވާ ވަރަށް ތަރައްގީވެފައި ނެތުމާއި، އެކަހެރި ސަރަހައްދުތަކަށް ވާސިލުވާން އުނދަގޫވުމުގެ އިތުރުން ސައުތު ސޫދާން، އުގަންޑާ އަދި ރުވާންޑާގެ އިންތަކާ ކައިރީގައި ހިނގަމުންދާ ހަމަނުޖެހުންތައް ހިމެނެއެވެ.
ޑަބްލިއުއެޗްއޯ އިން އިންޒާރު ދީފައިވާ ގޮތުގައި މި ބަލިމަޑުކަން އަދި ”ނިމުމާ ގާތަށްވެސް ނުދެއެވެ“.
މި ބަލި ކޮންޓްރޯލް ކުރުމަށްޓަކައި އެމެރިކާއިން ވަނީ އިތުރު 267 މިލިއަން ޑޮލަރުގެ އެހީއެއް ދޭން ނިންމާފައެވެ. އަދި މި ބައްޔާ ދެކޮޅަށް ކުރެވޭ މަސައްކަތަށް ބޭނުންވާ 2 ބިލިއަން ޑޮލަރުގެ އެހީ ހަމަކުރުމަށް އެހެން ގައުމުތަކުންވެސް އެހީތެރިކަން ފޯރުކޮށްދިނުމަށް އެމެރިކާއިން ވަނީ އެދިފައެވެ.