އިސްތިއުމާރުކޮށްފައިވާ ހުޅަނގު އައްސޭރީގައި ހަދާފައިވާ ޔަހޫދީ އާބާދީތަކުން އެތެރެކުރާ މުދާ މަނާކުރުމަށް އިނގިރޭސިވިލާތުން ނިންމައި، އެކަން ވަނީ އިޢުލާނުކޮށްފައެވެ. މިއީ ފަލަސްޠީނުގެ ދައުލަތެއް ބަލައިގަތުމަށް ފަހު، އިސްރާއީލާ މެދު ލަންޑަނުން ގެންގުޅޭ ސިޔާސަތަށް ގެނައި އެންމެ ވަރުގަދަ ބަދަލެވެ.

ޚާރިޖީ ވަޒީރު އެޑް މިލިބޭންޑް ޕާލަމެންޓުގައި ވިދާޅުވީ، މި ފިޔަވަޅުތަކަކީ އިނގިރޭސިވިލާތުގެ ސިޔާސަތު ”ފުރިހަމައަށް އަލުން ބަދަލުކޮށްލުން“ ކަމަށެވެ. އަދި ހުޅަނގު އައްސޭރީގައި ހަދާފައިވާ ޔަހޫދީ އާބާދީތަކަކީ ޤާނޫނާ ޚިލާފު އެއްޗެއް ކަމަށް ސަރުކާރުން ދެކޭ ކަމަށާއި، ފަލަސްޠީނުގެ ރައްޔިތުންނާ ދެކޮޅަށް އެ އާބާދީތަކުގެ މީހުން ހިންގާ އަނިޔާވެރިކަމާއި ބިރުދެއްކުމުގެ ޢަމަލުތަކަށް އިސްރާއީލުން ޖާގަދޭ ކަމަށް އޭނާ ތުހުމަތުކުރެއްވިއެވެ.

އަލަށް އެކަށައެޅި މި ފިޔަވަޅުތަކުގެ ދަށުން، ހުޅަނގު އައްސޭރީގެ އާބާދީތަކުގައި އުފައްދާ ހުރިހާ މުދަލެއް އެތެރެކުރުން މަނާވާނެއެވެ. އަދި އެ އާބާދީތައް ބިނާކުރުމާއި، އުމްރާނީ ވަސީލަތްތައް ޤާއިމުކުރުމާއި، މާލީ އެހީތެރިކަން ދިނުމާއި، އަދި ރިއަލް އެސްޓޭޓްގެ ވިޔަފާރީގައި ބައިވެރިވާ ވިޔަފާރިތަކަށާއި، ޖަމްޢިއްޔާތަކަށާއި ވަކިވަކި ފަރުދުންނަށް ދަތިކުރުމުގެ ފިޔަވަޅު އަޅާނެއެވެ. މީގެއިތުރުން، އެ އާބާދީތަކުގެ ބިންތަކާއި ގެދޮރު އިޝްތިހާރުކުރުން ޔޫކޭގައި މަނާކޮށް، އަނިޔާވެރިކަމަށް ހިތްވަރުދޭ އަދި އެފަދަ ޢަމަލުތައް ހިންގާ ހައްދުފަހަނައަޅާފައިވާ ޔަހޫދީންނާ ދެކޮޅަށް ވެސް ދަތިކުރުމުގެ ފިޔަވަޅު އަޅާނެއެވެ.

ނަމަވެސް، އިސްރާއީލުގެ އަސްލު ސަރަޙައްދުތަކުން އުފައްދާ މުދަލާއި ޚިދުމަތްތައް މި ފިޔަވަޅުތަކުން އިސްތިސްނާވާނެ ކަމަށް ސަރުކާރުން ބުންޏެވެ. އަދި އިސްތިއުމާރަށް ސީދާ އެހީތެރިވެދޭ ފަދަ ހަތިޔާރާއި އެހެނިހެން މުދާ އެކްސްޕޯޓް ކުރުމަށް އިނގިރޭސިވިލާތުން ދޫކުރާ އާ ލައިސަންސްތައް ދިނުން ވެސް ހުއްޓާލާނެއެވެ.

ޔޫކޭ އާއި އިސްރާއީލާ ދެމެދު ކުރެވޭ ޖުމްލަ ވިޔަފާރިއާ އަޅާބަލާއިރު، މި ނިންމުމުގެ ސަބަބުން އިޤްތިޞާދަށް ކުރާނެ އަސަރު ކުޑަވާނެ ކަމަށް ބެލެވެއެވެ. އެގޮތުން 2025 ވަނަ އަހަރު ދެޤައުމުގެ ދެމެދުގައި ކުރެވުނު ވިޔަފާރީގެ އަގު 6 ބިލިއަން ޕައުންޑަށް އަރާއިރު، އިސްތިއުމާރުކޮށްފައިވާ ސަރަޙައްދުތަކުން އެތެރެކޮށްފައިވަނީ 38 މިލިއަން ޕައުންޑް ގެ މުދަލެވެ.

މިކަމުގެ ރައްދެއްގެ ގޮތުން އިސްރާއީލުން ވަނީ ޤުދްޞުގައި ހުންނަ އިނގިރޭސި ކޮންސިއުލޭޓް ބަންދުކޮށް، ފަލަސްޠީނުގެ އޮތޯރިޓީގެ ސިފައިންނަށް އިނގިރޭސިވިލާތުން ދެމުންދިޔަ ތަމްރީނުތައް ހުއްޓުވައި، އަދި އިނގިރޭސިވިލާތުގެ ޕާލަމެންޓުގެ 12 މެންބަރަކު އިސްރާއީލަށް އެތެރެވުން މަނާކޮށްފައެވެ.

އެމެރިކާއިން ވެސް މި ނިންމުމަށް ފާޑުކިޔާފައިވާއިރު، ފަލަސްޠީނުގެ މަންދޫބުންނާއި އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން ވަނީ މިއީ މާ ކުރިން ވެސް އަޅަންޖެހިފައިވާ ފިޔަވަޅެއް ކަމަށް ބުނެ މަރުޙަބާ ކިޔާފައެވެ. އެހެންނަމަވެސް، ބައެއް ފަރާތްތަކުން ބުނަނީ އިނގިރޭސިވިލާތުން މިއަށްވުރެ ވެސް ހަރުކަށި ފިޔަވަޅުތަކެއް އަޅަންޖެހޭ ކަމަށެވެ.