އެމެރިކާއިން އީރާނުގެ އެކި ސަރަޙައްދުތަކަށް އަމާޒުކޮށް އާ ހަމަލާތަކެއް ދިނުމާ ގުޅިގެން މެދުއިރުމަތީގެ ހަމަނުޖެހުންތައް އިތުރަށް ގޯސްވެފައިވާއިރު، އެކަމަށް ވަރުގަދަ ރައްދެއް ދޭނެ ކަމަށް އީރާނުން ބުނެފިއެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބުނި ގޮތުގައި، އުރުދުންގައި ހުންނަ ޕްރިންސް ޙަސަން އެއާބޭސް އަދި އެމެރިކާގެ މެރިން ބޭސްއަކަށް އަމާޒުކޮށް ”ބާރުގަދަ“ ބެލިސްޓިކް މިސައިލް ހަމަލާތަކެއް ވަނީ ދީފައެވެ. އަދި މިއީ އާންމުން މަރުވި ކަމަށް ރިޕޯޓްކޮށްފައިވާ އެމެރިކާގެ ހަމަލާތަކުގެ ބަދަލުހިފުމެއް ކަމަށް ވެސް އެ ފަރާތުން ބުންޏެވެ.

އީރާނުގެ އެންމެ މަތީ ވެރިޔާ މުޖުތަބާ ޚާމަނާއީ ވެސް ވަނީ ވޮޝިންޓަނަށް އިންޒާރު ދެއްވައި، އެމެރިކާއަށް ”ދުވަހަކުވެސް ހަނދާން ނުނެތޭނެ ފަދަ ފިލާވަޅުތަކެއް“ އީރާނުގެ ސިފައިން ދަސްކޮށްދޭނެ ކަމަށް ވިދާޅުވެފައެވެ. މިއީ އީރާނާއި އެމެރިކާއާ ދެމެދު އަލުން ހަނގުރާމަ ފެށުނު ފަހުން އޭނާ ދެއްވި ފުރަތަމަ މެސެޖެވެ.

އީރާނުގެ ދައުލަތުގެ ނޫސް އެޖެންސީ އިރްނާ އިން ރިޕޯޓްކޮށްފައިވާ ގޮތުގައި، އީރާނުގެ ޚޫޒިސްތާން ޕްރޮވިންސްގެ ތިން ތަނަކަށް އެމެރިކާއިން ދިން މިސައިލް ހަމަލާތަކުގައި މަދުވެގެން ހަތް މީހުން މަރުވެ، އިތުރު އަށް މީހުން ވަނީ ޒަޚަމްވެފައެވެ. މީގެ އިތުރުން ހުޅަނގު ދެކުނުގެ ރަށްތައް ކަމަށްވާ އަހްވާޒް އަދި އަޣާޖާރީ ކައިރިއަށް ވެސް ހަމަލާތަކެއް ދީފައިވާ ކަމަށް ރިޕޯޓްތައް ބުނެއެވެ.

މި ދަނޑިވަޅުގައި، އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނުން އިތުރަށް ބަދަލުހިފަން އުޅެފިނަމަ މިއަށްވުރެ ވަރުގަދަ ރައްދެއް ލިބޭނެ ކަމުގެ އިންޒާރު ދެއްވާފައެވެ. އަދި އީރާނުން މި މައްސަލަ އިތުރަށް ހޫނުކުރަމުން ގެންދާނަމަ، އެ އިސްލާމީ ޖުމްހޫރިއްޔާއިން ”ބާކީވާނީ ވަރަށް ކުޑަ މިންވަރެއް“ ކަމަށް ވެސް އޭނާ ވިދާޅުވިއެވެ.

މި ކުރިމަތިލުންތައް ފުޅާވަމުން ދިއުމާއެކު، މި ހަމަނުޖެހުން އީރާނާއި އިސްރާއީލުގެ ބޭރަށް ފެތުރިގެން ހިނގައިދާނެ ކަމުގެ ކަންބޮޑުވުން ވަނީ އިތުރުވެފައެވެ. އިސްރާއީލުން ލުބްނާނުގެ ދެކުނުގައިވާ ކަފްރު ރައްމޫން އަދި އަރަބް ސަލީމްގެ ބޭރު ސަރަޙައްދުތަކަށް ވައިގެ ދެ ހަމަލާއެއް ދީފައިވާއިރު، ލުބްނާންގެ ސަރަޙައްދުން ވަން ވައިގެ އަމާޒެއް ހުއްޓުވާފައިވާ ކަމަށް އިސްރާއީލުގެ އަސްކަރިއްޔާއިން ބުނެއެވެ.

ހޫޘީން ވަނީ އީރާނާއެކު ސާބިތުވެ ތިބިކަން ހާމަކޮށް، އެމެރިކާގެ ސިފައިން ތިބޭ ޤައުމުތަކަށް އެކަމުގެ ނަތީޖާއާ ކުރިމަތިލާން ޖެހިދާނެ ކަމުގެ އިންޒާރު ދީފައެވެ.

މި ހަނގުރާމައިގެ ސަބަބުން ސަރަޙައްދީ ވިޔަފާރިއަށާއި ހަކަތަ ފޯރުކޮށްދިނުމަށް ވެސް ދަނީ ނުރައްކާވަމުންނެވެ. އެމެރިކާގެ އެނާޖީ ސެކްރެޓަރީ ވިދާޅުވި ގޮތުގައި ހޯމަ ދުވަހު 17 މިލިއަން ފީފާގެ ތެޔޮ ހޮރްމުޒް ކަނޑުއޮޅިން ދަތުރުކުރިއެވެ. ނަމަވެސް ބޯޓުފަހަރުގެ ދަތުރުފަތުރާ ގުޅޭ ފުރަތަމަ މަޢުލޫމާތުތައް ދައްކާ ގޮތުގައި ތެޔޮ ޓޭންކަރުތަކުގެ ދަތުރުފަތުރު ވަނީ ވަރަށް ބޮޑަށް ދަށްވެފައެވެ.