.ވެސްޓް ބެންގޯލް ސަރަހައްދުގައި ނިޕާ ވައިރަސް ފެތުރޭތީ، އެ ސަރަހައްދަށް ދަތުރުކުރާ ފަރާތްތަކުން ސަމާލުވުމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން އިލްތިމާސްކޮށްފިއެވެ.

އެޗްޕީއޭއިން މިގޮތަށް ޢިލްތިމާސްކުރީ، ވެސްޓް ބެންގޯލްއިން މި މަހުގެ ތެރޭގައި ނިޕާ ވައިރަސްގެ 3 ކޭހެއް ފެނުމާ ގުޅިގެން ނެރުނު ބަޔާނެއްގައެވެ.
އެޗްޕީއޭއިން ބުނީ، މި ވަގުތު ރާއްޖެއަށް ނިޕާ ވައިރަސްގެ ނުރައްކާ އޮތް މިންވަރު ކުޑަ ކަމަށެވެ. ނަމަވެސް އިންޑިއާގެ ހާލަތު މޮނިޓަރ ކުރަމުންދާ ކަމަށާއި ވެސްޓް ބެންގޯލަށް ދަތުރުކުރާ ފަރާތްތަކުން އެކަމަށް ސަމާލުވުން މުހިންމު ކަމަށެވެ.

އަދި ވެސްޓް ބެންގޯލްއިން ބައްޔަށް ޕޮޒިޓިވްވި މީހުންނާ ގުޅިގެން 180 އަށްވުރެ ގިނަ މީހުން ކޮންޓެކްޓުންގެ ގޮތުގައި ކަރަންޓީނުކޮށްފައިވާ ކަމަށް އެޗްޕީއޭ އިން ބުނެފައި ވެއެވެ.
މި ކޭސްތަކާ ގުޅިގެން އިންޑިއާގެ އެހެން އެއްވެސް ސަރަޙައްދަކުން އަދި އެހެން ޤައުމަކުންވެސް ބަލި ފެނިފައިވާކަމުގެ ރިޕޯޓް މިހާތަނަށް ކޮށްފައިނުވާ ކަމަށާއި ބައްޔާ ގުޅޭގޮތުން އެއްވެސް ކޭސްއެއް ނުވަތަ ކޮންޓެކްޓެއް އެ އެޖެންސީއަށް ރިޕޯޓްކޮށްފައިނުވާ ކަމަށްވެސް އެޗްޕީއޭއިން ބުނެއެވެ.
މިއީ ޓެރޯޕަސް އާއިލާގެ ވާލުންނާއި، އޫރުން އިންސާނުންނަށް ފެތުރޭ ބައްޔެއް ކަމަށް އެޗްޕީއޭއިން ބުނެފައި ވެއެވެ.
ނިޕާ ވައިރަސް ޖެހޭ މީހުންގެ ފަރާތުން އާންމުކޮށް ފެންނަ އަލާމާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ކެއްސުމާއި، ކަރުގައި ރިއްސުމާއި، ނޭވާލާން އުނދަގޫވުން ހިމެނެއެވެ. އަދި ބަލި ބޮޑުވަމުންދާ ވަރަކަށް ސިކުނޑިއަށް އަސަރުކޮށް ވާނުވާ ނޭނގުމާއި، ފިޓުޖެހުން ފަދަ ކަންކަން ހިމެނެއެވެ.
މި ބަލި ޖެހުމުން އެއްވެސް އަލާމާތެއް ނުފެނިވެސް ހިނގައިދާނެ ކަމަށާއި ބައްޔަށް ވަކި ޚާއްޞަ ފަރުވާއެއްނެތް ނަމަވެސް އަލާމާތްތަކަށް ފަރުވާ ކުރެވޭކަންވެސް އެޗްޕީއޭއިން ބުނެފައި ވެއެވެ.